Ecarai catecã́ri Dupade:
Átaja yoque ujetiga yijnórango ñane iji jnumi gajnerĩ, enga ca yimóngo pajei dotáningane ome ñane gajnerĩ, Yoqui-Dupade, iji de jnumi uje qué yugúcoji, Yoqui-Dupade.
Icatecã́ri ua ujetiga ajnime Satanas píode cucha gajnarécho iji ayoréode yocujade, banguresórone ore uyoguiji ne, Yoqui-Dupade. Enga aru yocajéode gajnerĩ ome banguresórone ga ichapise orajéode, Yoqui-Dupade. Iraja uje Satanase etoque ga ujopie píode etócho, mu, Yoqui-Dupade, icatecã́ri ua jetiga adotápise yoque to, Yoqui-Dupade. Enga ca yibacója Satanase jmainie to gajnerĩ jetiga chetingare yoque.
Yoqui-Dupade, átaja gapudíe gajnerĩ uje ore changureta ua. Átaja chequedíe gajnerĩ uje ore changureta ua, jnanione uje ore changureta ua, ga arodipise ore gajnerĩ, enga jé ca uñeque cho caru ome baruode, Yoqui-Dupade, jetiga ore tangãri ua.
Icatecã́ri ua ome Iguíjnamúiné ore uje ore changureta ua, ga ore pota jeta ore chijnórapise ua, Yoqui-Dupade, ga ore chijnóra darasade ga ore chijnóra bajnoraquei aja darasade to, Yoqui-Dupade, enga ore chijnóra ñane iji jnumi.
Yicatecã́ri ua ome yocurasade to iji Tobité uje que yimo jetiga ore doi badode tome yocurasade ore, mu gusu ua uje baraja cuchade, Yoqui-Dupade. Yicatecã́ri ua gajnerĩ ujetiga átaja uñeque jeta uñeque chacate ore ome baruode iji guidai jne. Enga etoguipise ore jnese to gajnerĩ, Yoqui-Dupade.
Átaja yoque jnese iji gajnerĩ iji dejai tuné údode. Ga acha bajmainie, bajopié yoquibáyode jnese iji dati jnenga yicapóji diri jnese, Yoqui-Dupade.
Jecute yicatecã́ri ua gajnerĩ ome cuchade jnese ome bajnacari Jesuse i. Amẽ.
Ecarai cho ‘Amẽ́’ quique ome ore:
¿Ja arajayo gotique uje ojníjo ‘amẽ́? Que yimo jetiga arajágo uje yojnijo ‘amẽ́’. ‘Amẽ́ qui tu gu uje yimesẽ́co ñane, yimesẽ́co gosi anírone, ojñane ga yojníjo ‘¡yiraja!’ Yirajágo gu uje yimesẽco jnese ga yojníjo ¡yiraja! Enga jé adi jé u uje ojníjo ‘amẽ́ ga uacarajáyo anírone. Que yiraja yuru quigode ga uacamesẽcho ga jecute uacojnicho ‘amẽ́. Ga gajnui jec u uje uacojnicho ‘¡yiraja!’ Enga jé u uje ojnijo ‘amẽ́.
Ecarai – Rincon de Tigre, Bolivia – 1960
Marina de Morarie churúsãre Ecarai uruode udojo nanique
