Ecarai catecã́ri Dupade:
Yoque Dupade Dios, yocacaranguipis ome bacajnaquéode iji gajnerĩ uje bango bacajnaquéode aja yoque. Uje chi yijínango ua aja gaté, Yoque Dupade, ujetiga ãri. Yoque Dupade Dios, yicatecãcoi ua ome cuchade unojo iji gajnerĩ. Yocacaranguipísome baruode quigode uje batata ome yoque: betégode cucha iji darujna arone, iji Dupade uruode. Átaja yóguiji gajnerĩ enga yirajágo baruode quigode to gajnerĩ. Yacaco yocujode ayoré ore ome baruode to gajnerĩ. Dupade, yicatecãcoi ua ome bajnacari Jesuse i. Amẽ.
Ecarai chacate yogome Dupade ate omone ome yoque:
Dupade uruode chingo Dupade ate omone ome yoque. Chingo Jesuse isocáringome yoque ujetiga jno yocúdi, uje yocatoi gajnúi tu Jesuse. Jé basa Jesuse gatoi u dayé Dupade, a Dupade anguresórone gatoi u uté Jesuse. Jesuse chingo yoque Dupade adode uje chojninga: “Yatoi u yapade,” jé basa chojninga, “Uacatoi u yu.”
Pablo chojningame dojode Dupade anguresórone: “Yingo uaque ujetiga oyo yu uje yangureta Dupade. Enga jé ca ajníñopo aja uacaquigánique rĩ.”
Jesuse u Pablo angaráni. Enga yacajnaquéode u uje ingome uaque uje piquetangóri Jesus adode ome yoque, ga jé u yacajnaquéode ome uaque. Enga jé adi u ome yoque iji gajnerĩ. Yacaco uñane ome Jesuse adode uje yirajágo uje Jesuse u yoquiquetangóri. Jesuse u yoquijõrai. Pablo acajnaquéode udojo u ome darasade nanique uje chacate darasade ome Jesuse adode. Jé adi u uyoque gajnerĩ iji ne, uje yacaco ñane ome Dupade adode uje yirajágo uje Dupade u yoquipesungóri.
Dupade u yocátajasṍri. Que yimóngo Dupade jmanérac ujetiga chátaja yoquisatique aja yoque, mu yirajágo uje Jesuse guẽrate yocucuecaringuei ome yoque. Jesuse guerané yocáyipie tome yoque, yoquijóningai tome yoque. Jecute yojníjo: “Dupade chátaja yoque.”
Ujetiga gosi que chiraja, jetiga ca chimo Dupade jmanéraque, jeta ca chátaja isatígaja gosi, cho jetiga ca chiraja cuchárique. Gosi uje chiraja uje Jesuse, Dupade guẽrate ucuecaringuei ome, ijóningai, úringai etógome ga gosi chiraja unojo uje Jesuse gueranone u.
Que yimóngo Jesuse, Dupade jmanéraque ujeta cháta yoquisatígaja yoque mu yojníjo ome cuchade: “Jesuse chátaja yu gu uje yirajágo gu uje yipesungóri, cuchade ipesungóri u Jesuse.” Jecute yingongo cuchade unojo aja ñane gajnerĩ uje Jesuse átapie cuchádaja yoc. Chisíome yocucuecaringuei ome yoc. Guẽrate yoquijóningai ome yoque.
Cojñotique chojninga: “Qué yirodape Dupade yui ujetiga chátaja yu.”
Uje cojñotique chi chojninga nanique: “Yajo yajopídi jne, mu qué yirodape Dupade yui ujetiga chátaja yu gajnerĩ.”
Enga chi chicháji dajnosode iji ejode. Chisõre iji data. Chi di mu chojninga: “Jé go uje que yimo Dupade ajopític. Que chátaja yu, Dupade.” Mu uné que chiraja gu uje uné jos eti Dupade chátaja ajopídi aja, guejnai aja enga chajo to.
Mu Dupade chátaja uyoque gu yojñane. Yirajágo uje Jesuse guẽrate yocucuecaringuei aja yoque. Jecute yirajágo uje Jesuse átapie cuchade aja yoque. Jnani uné gotique chi chojninga nanique: “Que Dupade chátaja yu gotique, yajopídi. Dupade que chajo yejnai gotique to.” Mu uné que chiraja uje Jesuse u átajasṍri. Jesuse ipesute ome, ucuecaringuei. Ipesute ome, etotiguei. Mu ipotigádi upúsu ujetiga cháta guejnatígaja jeta chĩrase. Que chiraja Dupade uruode quigode uñane gu. Jecute chojninga: “Que Dupade chátaja yajopídi aja yu.”
Uté que chacãre Dupade gai ome ucuecaringuei, etotiguei, ijóningai ore. Cho dojo ayoré iji Dupade, mu que áyipie déji uje Dupade u ayoréode yoquipesusṍri. Beyoi ga ca yoco yoquiroi iji Dupade, mu ueradi tu jeta yoco yoquirósõri iji. Yicoi yoquirósõri iroquéode, enga yacãcó gai ome gueranone cucha ome yoque gatuaque. (Hechos 17:26 aja 28)
Ecarai – Tobité, Bolivia – 1960
Marina de Morarie churúsãre Ecarai acajnaquéode
