Jé ca yangácoi Dupade Uruode bisideque:
Mu yacaranguipis ome Dupade Uruode unojo uje que cuchárique chona gotique ome yoque. A jé cuchade chona udore, cuchade píode iji erámi jnese. Jé basa Dupade Uruode iji darujna aode que cuchárique chona gotique. (Santiago 1:22 aja 24)
A ayorérique déji siñeque jeta chojninga: “Cachi ipesucho.” A ayorérique a déji siñeque jeta chojninga: “Ore chimo que uje gajnáreque ore adode ga e ore chijnime.” Mu Dupade Uruode, cuchade déji ajei jnese.
Gosi atígo gajnárecho ome Dupade jeta cho jmiti, jmiti ome dojode Dupade anguretasóño ga déji iji de. Jetiga gosi pésu cucha gajnarétique jeta gajnáreque ipesudode cucha enga déji jeta ore tṍra guesi iji Dupade Uruode unojo. Dupade ujnacari Jesucrísto adode déji Dupade Uruode, enga cho yocúringane piquetaque isocade ome yoque.
Dupade Uruode chingo yu iji darujna aode uje chi Dupade Uruode gajnui tu aníri ajicaradéjnai, mu ise ga jec ũré Dupade Uruode uje ayorérique a ca déji siñeque jetiga ca ajicaratique déji iguíjnai. Chajire dedodie iji aníri ajicarani ga chimo uje edodie uécha uñai topié. Jé basa ga iguirode catája. Jé basa icha uécha uñai ga gajnúi jec u Dupade Uruode uje Dupade Uruode unojo chingo yoque jnese cucha utatade iji yoc. Chi uje ayorei ca chajire re iji ajicarani enga jé ca chimo dedodie jeta ichai. Adi jec u Dupade Uruode, a yajico Dupade Uruode enga Dupade Uruode chingo yoque. Ujeta yingongo yoquipesudode cucha gajnárecho – yoquipesudode, yocuru patáringane, yocoriquéode aja Dupade enga Dupade chĩro, enga gajnui u uje gosi churu dedodie iji aníri yodi ga chajirapo dajicarani rĩ enga jé chimo uje que iguínique cuse gotique.
Jecute Dupade Uruode chacãra unojo. A gosi chajire dedodie enga chojninga: “Yacaranguipis uje que iguínique cuse,” choninga. Enga a gosi chajirapo rĩ, chajire re ome Dupade Uruode enga chojninga: “Yacaranguipis uje ome Dupade Uruode que yatique gajnáreque déji yu uje Dupade chíro gu.
Ujetiga yajico Dupade Uruode enga chãraque yogome pisijnaringuéone:
A purupatáringai déji yajei te mu que unojo chise yu gotique,” chojninga. Gosi chajire Dupade Uruode mu chojninga, “Que piboqueréringai déji gotique,” chojniga.
Gosi chajire udojo, purupatáringa, chajire Dupade ojningane, chojninga:
‘Que purupatáringai déji yu gotique iji uné darujna aro.” Déji Dupade Uruode uje purupatáringane a déji ajei te, mu gosi que pésu ga gosi chojninga: “Yacaranguipis uje cáma chise yu go ga yujnué purupatáringane gáyode gu yajirigode Dupade urúo.”
Daniel ajicaradéjnai cuse nanique uje chiraja Dupade Uruode gu:
Jé uacamóño uje jnani bajade ga chi eduguéjna cuchábode chi ore isaque udore, Daniel, urasade ore, ga chi Daniel chojningame dajõrane: “Adotáyo uágome anírone to, ore ipesudode cucha gajnárecho. Ca yiracója ore adode to.”
Enga a Dupade jé noñome yóguiji erámi te jne, enga yocajnui, uaque gosi gajnui ta urásu uje uaque gosi chidota re iji erámi. Chi ore isasórone chisi ome ore posode, cucha ueradéjna ome ore. Ore chijna jóronga udore aja ore. Uje ore chirore ore yui enga ore chicha ore iquei enga ore catecã́ri mu que ore chajire yui.
Chojningame ore, darásade ore: “Adotáyo uágome ore adode to. Jé ca yajo ore posode uje chi ore tẽrame dangurenone bajaque gu,” chojninga. “Unejaque ore angurenone cucha ga a jé ca yicatecãcoi udore jne,” chojninga. “Enga yocangureni tu Dupade enga yocangurete ugurui u, jé basa que chimoque yocatique. Que chimoque uje nóna uágaja quedéjnane,” chojninga.
Enga uaque gosi gajnui jec u uje jé yoque gajnui urásu Daniel uté. Gosi ajicarani cuse enga que chimoque cuchárique go. Chise durasei te ga uté chajire re. Chajire re iji gatócoro rĩ. Gaidi u ujetiga ca edodie iguínique cus.
Enga gosi pota jetiga ca cucha gajnarétique déji ga chise dire jnime to ga gosi a chajire Dupade Uruode ome re. Enga chojninga: “Yiraja Dupade chãraque unojo, purupatáringane ore,” chojninga. “Dupade chãraque poriquéode ome yu,” chojninga.
Enga unojo u uje chatata anírone ajicarani adode unojo. Jecute yingome yoc ujetiga anóningacho uje uaque gosi pota edo ichai ga ajicarani que chimoque go. Churu ga chajirapo rĩ ga chojninga: “E icha, yacaranguipis ome.”
Enga guedé jno enga gosi chuchẽre Dupade Uruode gai. Enga chojninga:
“Yacaranguipis ome Dupade Uruode ojningane unojo. Cáma pisijnaringuei chise yu gotique uje Dupade Uruode chãraque yu gu,” chojninga. (Salmo 119:11)
Dupade Uruode qui tu ujetiga ca yirango ome uruode ga jé ca basíji yoquijmanérac:
Gosi jé qui u ome anírone dajirigode Dupade acho. Uje que chimoque chajire Dupade Uruode aja quedéjnane. Enga chojningame re, “Dupade adode jé u uje gosi chajire Dupade Uruode ome re. Enga pininaquei jogadi tu ome gosi. Dupade ijnoraquei jogadi tu uje Dupade Uruode que pota jeta uruode basíji ejode iji yoquijmainie.
Uje uacamóño uje jecucha yingome uaque, chi cojñotique jno ga chicai gatajnoquei. Choru cucarani. Chi ujode Dupade anguretasṍri chojninga: “Jé ca amóji sañeque.” Mu chise ta ga chijna Dupade Uruode. A moi chujé ga basíji aníri jmainie enga a Dupade Uruode e base.
Enga adi jec u uje Dupade Uruode unojo chingo yoque. Chojninga: “Ujetiga ca amorase Dupade Uruode iji bajei ujetiga ca jnoji batoi. Cho que ujeta yocajnei mu chise tõ uñeque.”
Jnani uté uje choru cucarani chiraja uje Dupade Uruode udac. Mu uje e niji enga chorupo rĩ enga chimo uje íjnoque Dupade Uruode iji jmainie. Jecute chajniapo gai te rĩ. Enga que Dupade Uruode qui u ujetiga ajníngo Dupade Uruode gai. Dupade Uruode qui tu ujetiga ca yirango ome Uruode ga jé ca basíji yoquijmanérac. Jé ca moi chujé yoque iji ganic.
Gusu unojo yacajnaquéode ome yoque. Mu ca yicadíjoi Dupade Uruode jeta yicoi acajnaquéode gatuaque.
Dupade Uruode cho yoquiquique ome yoqueranone cucha, yoquicatecãraitigade ore: (Mateo 6:4 aja 6)
Jeta angureta Dupade enga ca ango ua aja erámi enga ca acota ua ome udore. Jé adi u to bacatecãraitigade ome Dupade. Acatecã́ri bayé Dupade iji baguíjnai ajei ga gusu bayé uje ore chimo ua. Enga Dupade irasi tu uté gosi uje changureta Dupade. Enga a anguretaretigade que doi ga chingo raja erámi gotique jeta picotaque ome dojode ayoréo.
Adi tu ayoré uje chisi ome dojórique ayoré ome dagúchárique. Jé dicotare ga chingo derani taja erámi. Gaidi tu urásade icotaquéode ome jeta ore chojninga: “Caniraque.” Enga gajnui u uje picotaquei jogadi tu erámi tuné. Jé basa uaque gosi que uacajegaidi tu erámi icotaquei enga gusu bayé Dupade ome ua uje bagaidi tu gu jeta picotaque uté.
Yujnusina uje yugúcoi poridie nanique iji yoquitrabajádoringáne enga ore chojninga: “Que ore catecã́ri Dupade.” Mu Dupade Uruode qui u uje que yingongo yógaja erámi ujetiga yicoi ga yicatecãcoi Dupade. Jé que yingongo yógaja erã́tique ujetiga yicatecãcoi Dupade iji yoquiguíjnane ajei te ga yoquicatecãraitigátigo chijna raja Dupade iji gatajnoquei.
Gusu yacaditigade ome yoc. Mu que yimo ujetiga don Len, ujetiga ore uñeque catecãri. Jeta gosi chatata datígo, jeta chingo danguretaretigai ome Dupade Ujnacari enga gosi chingo ore. Dupade Uruode chojninga: “Ango barasade ujetiga jec ũré banguretigai déji Jesuse. Jé u to basijnaringuéone, ango barásade basijnaringuéode enga barasade ore chĩro dajei dotáningane ome ua. Ore chĩro dáyipie unejángome ua, enga pajesereringai dépoji uágome ñane rĩ.” (Santiago 5:16)
Ecarai catecã́ri Dupade:
Baruode diringai tuné jetiga yacaco yoquejórique ayoré ome baruode enga ca yicadíjoi ua, Yoqui- Dupade. Mu yacaranguipis ome ua, Yoqui- Dupade, uje baruode déji ujetiga yetájo yocatígo. Yingongo ua, yingongo banguretasórone iji jnumi ujetiga ore chĩro detétigade iji yoc. Ga cuchiyi tupúsu ua uje bãro cuchade, Yoqui- Dupade, jetiga bãro yoquisijnaringuéone, yocurupatáringai, yoquipesudode cucha gajnarécho, ga jé ca bopo ome yoque rĩ, yoque Dupade.
Jecute yicatecã́ri ua iji guedé jnoringai ujetiga arodipise yoque gajnerĩ ome Satanas. Yirajágo uje Satanas uniri tu ejopie jeta yoquijogadi tu, yoque Dupade. Mu ujetiga ca yicadíjoi ua, ga bajína yógaja quedéjnane ga que toc jeta Satanas chijnime bajopie tiji yocajéode.
Yoqui- Dupade, átaja jnanione iji gajnerĩ iji dínique ujetiga ore doi dasatígo ga etoguipise ore aja ore isatígo iji gajnerĩ. Ore nína re gajnerĩ ome dáringane etócho, ayoré ijóño.
Yoqui- Dupade, yicatecã́ri ua ome chequedíe ore jnese ga ore irasé re to. Ore nína re ome baruode, yoque Dupade.
Yicatecã́ri ua ujetiga yiyágo yocate bajade. Yiraja uje ayoréode yoco yoquijogadi iji yocúringai ayoré, mu jetiga ajmare báyipie icha taja yocajéode, yoque Dupade.
Yoqui- Dupade, yicatecãri ua ome jnanione iji monte caside jeta átapísaja ore gajnerĩ jetiga ca cuchárique chosi ti iji uñeque enga gusu ua jeta ore irasique. Gusu ua gajnerĩ jetiga ore nína re ome dajnimitíode dagúcha yuode. Gusu gajnerĩ jeta yico ua iji gatajnoquei jeta yijínango ua, yoque Dupade. Átaja yoque jnese gajnerĩ iji guidáyode, ayoréode uyóguiji erámi jnese ga baruode déji erámi jnese jeta ca ayorérique chãra re iji cuchárique. Jeta ore chojninga: “Que yi baruode to gu uje que ore chingo yu.”
Mu yocacajnaquéode e chise erámi jnese ome bajnacari Jesuse adode. Ujetiga ãriapo jne rĩ enga a o bajuñame jnumi. Jecute yicatecã́ri ua gajnerĩ ujetiga be yicatecãraitigade jeta jec ũré yangureta ua. Ãro pajé dotáningane iji guidai údode, Yoqui- Dupade. Ãro pangoneparitigade iji guidai gajnerĩ, yoque Dupade, iji Tobité. Jecute yicatecã́ri ua ome cuchade jnese ome bajnacari Jesuse i. Amẽ.
Ecarai – Tobité, Bolivia – 1970
Marina de Morarie churúsãre Ecarai uruode
