Jesus chiqueta raja dacaditígo uñéngo mu que ore chiraja míraque: (Lucas 24:13-16)
Jesus acadique gárerigo chi ore chicai ore idánique uje chi i tu Emaús, mu uje ore déji dajei enga qué ore déji dojñane gai uje chi ore botãre ñane ome Jesus adode, mu Jesus chi diga sose udore ore yui. Ga unojo u uje que ore chiraja Jesuse gosi go. Ore catecã́ri Jesus enga chi ore chojninga: “Chi cojñone ore chujé Jesuse diríca ga ore chijóchame diríca, enga a ca yimóngopo jne rĩ, yocacadisṍre case, yoqueduguéjna case, Dupade ujnacari,” chi ore chojninga.
Mu chise ore idai te ga Jesus chojninga: “E yiji que á. E yiyo uacabai te jne.”
Mu chi ore chojninga: “Jé acarape ga agu yoquibotígo to.”
Jecute Jesus chacája ore gari iji ore upusiédi to. Mu uje e ore chamáta ñane aja dagapié ejode ujetiga ore taque mu chi Jesus chisa arurétigo mu chi qué catecã́ri dayé Dupade bajaque. Mu jé u uje chi chajúgaja jnumi ga jé u uje chi chisi ome dajorane ore to. Mu chi quene ore chiraja Jesus ome úringai Jesus, ga jé jogadi u uje bijnapome ore rĩ.
Mu uje ore chiraja uje Jesuse jé ũré uje ecápo rĩ ga que ore chajirape cuchárique. Chi jĩrique ore jno ga ore chajnésarapo Jerusalen rĩ ujetiga ore chingo cucha dacadode udore ome Jesus iroguipísode. Mu chi udojo ore chojninga: “Yimóngosi Jesus ucacabí casé diríca ga e ecasiapo rĩ, ga a jec ũrepísome darúrigo ome darijíningai iji datoringai.”
Tomás e chiraja uje Jesus ecápo rĩ:
Tomás chi ca déji ore gari to uje Jesus chiqueta raja darógode uñane, mu ore chingome uje ore angarádejnai ecapo rĩ. Mu Tomás chotigase ore enga chojinga, “Qué yotigase uaque,” chi chojninga: “A que yimósi to jne enga jetiga ca yimo ojnaquérodie pié casidé iji jmana ajáronie ga a ca yangureta to,” chojninga.
Chi dirode gadioque iji udojo quigade enga Jesus chiquetapo raja ore rĩ enga Tomás déji to. Chi chimo uje Jesute supúsu ga ojnaquerodie piedie qué déji udojo jmanane, déji guídade rĩ, jecute Tomás chojningame Jesus, “Yangaráni tu ua. Enga yidupade upo ua rĩ.”
Pirajatigai ome Dupade úringai pujnengaisṍri que chiqueta gosi:
Deréjnai tudé cojñone ore chiraja Dupade úringai pujnuéngaisṍri mu que ore changureta Jesuse go. Ore chucué dáyipiedie, ore chucué doré gaté iquetangóño cucha mu que ore changureta Dupade abi ome raque go. Chamáñaje ore déji erámi udé jogonórone cucha ajei te ga que ore chiraja dasocárique. Gusu Dupade ipotigasṍripísode uje ore chiraja dasocai. Gusu Dupade ipotigasṍripísode uje ore chiraja re iji Dupade adode ga ore chiraja rágome Dupade ga udojo ore u uje ore changureta Dupade Ujnacari Jesus uje toi ome ore. (Santiago 2:19,20)
Que toque jetiga Dupade jno cojñotique, ayorérique údi bisideque go:
Cojñone jecucha catecã́ri yóguiji *cucha sereréode ica. Udore uñai chojninga: “Yapade, jé ore changureta Dupade to.”
Mu yojninga: “Cojñomi á, ujeta Jesus dirási ahorita, ¿orase rique to a?”
Mu chojningasia: “Mu jetiga Dupade ajéo ga jno yúdi, jeoga chetaque yu ga que jno yúdi go.”
Mu yojninga: “U arĩ́a, uje que toque jetiga Dupade jno cojñotique, ayorérique údi bisideque go. Ujetiga caniraque ua, caniraque ua ome bojode cojñoque, mu Dupade que gaidode yoquicaniratiguéode gotique ome yoque ujetiga chiqueta yoque. Gaidi tu uje yanguretágo ome yoque ga Dupade chĩro yoquisijnaringuéone, chĩro yocajé dotáningane ga jé u uje jno yocúdi.”
Ga chojningasia: “A jec ũré, mu a Dupade ajéo ga jnorase yúdi, jeoga a ca jnorase yúdi jeta jé ca ajéo.”
Ga cojñone iji erámi jnese orajéo jetiga Dupade jno ore údi bisidec. Enga chiese ca cuchárique chona ore ome ore ajéode.
Dupade ũrajémi atíape: (Mateo 7:13,14)
Mu jé uacamóño, uacadúcho uje Dupade Uruode chojninga: “Uje chi Dupade ũrajémi atíape.” Enga que toque jetiga yajnágosi Dupade ũrajémi jetiga diga Jesus e di ome danguresórone.
Yirajágo uje chi dajéode gare ujetiga ayoréode chajna iji dacuecaringuei tudé. Dupade ũrajémi sudé ojningai tu uje que toc jetiga ayorérique qué chimesa erámi tuné jogonónique cucha iji dajei te ga jogadi tu uje cho jetiga ajei doi ñane. Cho jéta chajna dajeque ajámatique ga, anire, que chimo guesaringárique iji darosatíque. Ga unojo u uje Dupade ũrajé chi ajãpe gu udojo. Jé basa cojñone ga ore ũrajei chi cuchape, mu que toc jeta ore chajna jeta ore toi. Que ore chajna go. Ore guetétigai ome Dupade jé querújna, ga ore chirase raque ga ore doi ga ore sué Dupade gai ome dajéode, ga ore doi edáyode ga ore sué Dupade gai ome dajéode. Ore doi dajñaminone, ga jé cachi ore ũrajéreraque dacódejna mu que toc ujetiga ore chajna udaque jne, dajere uté jetiga ore toi, que ore chajna go.
A erámi jogonórone a ore cho dáyugu re jne jetá Jesuse di:
A erámi jogonórone cojñoque a ore chope dáyugu re jne. A ore po jórogui Jesus iquei ujetiga chiqueta ore. Mu Jesus e di, ga e que toque jeta chiqueta ore. E mu Dupade anguresórone ga ore irasique re jne, uje Dupade ujnacari e jno ore údi. Ga unojo u uje Jesus chingo yoque bajaque.
Que cucha Jesus itoringai iji curesei gai ome erámi unirisórone ore nanique:
Que cojñoque, ayorérique déji siñeque go ujetiga poji Dupade ujnacari ejode nanique. Que cuse go, gusu ayoré gárode uje ore poji Jesute ejode. Mu que ayorépise ore go. Mu chi guedé tudé jé chi toi durasede, a jé ayoré urásu chi guedé edo. Chi guedé doi ta mu que chuságaja dejai uje topié ore ejode. Jnumi té ga chi tãrara, jnumi agoyé jéc u to uje ore poji Jesus ejoi. Ore chiraja uje ore chujé uraque dapesusṍri Jesute gu iji curesé gai.
Que yiraja jeta ore chiraja quigode uje ore chujé Jesus iji curesei gai nanique, mu Dupade ujopié ipesute anírone udojo, cuchade udojo aja quigode, ome ujnacari Jesus jetiga ore chiraja uje Dupade ipesute cuchade udojo aja quigode. Mu ujetiga Jesus diapo jne rĩ enga udore ore uje ore ichajuque iji curesei gai, a quene ore chiraja quigode enga a quene ore popise Jesus ejode jne. (Apocalipsis 1:7)
Jesus toi nanique ga pujnusiétiga nanique ome danguresórone:
Jé basa erámi unirisórone ore nína raque uje ore chimate detei taja jnumi. Jé basa ga Dupade anguresórone a ore nina re uje Jesus chimate detesórone aja ore qui.
Jecute yingome uac, gusu yacajnaquéode ome uac, mu yirajágo uje que gusu gotique. Domíngo, guedé jnoringai déji jeta yicoi Dupade Uruode iji rĩ. Mu dirode déji jnese jetiga gosi pota changureta Dupade ujnacari Jesute ga ango ua aja yoqueduguéjnane uje cáma Dupade di.
Chi Dupade di jne enga que toc jetiga uñeque chojninga: “Aquirañope Dupade.” Que yocuñane que chojninga go: “Aquirañope ga chacarape garósirique, chacarape cutucutuque ga yijína uaque to jne. Yajéode qué chĩrope yisijnaringuéone iji dire uñeque.”
Mu que u go Dupade Uruode qui uje chojninga: “Ujeta adúcho yuruode, ga jé ca ajose ua iji guesi tome yuruode. Angureta Dupade ga Dupade doi ga chijóchame basijnaringuéone.” (Hebreos 3:15)
Jé uacamóño uje dequejnaréngone sué ayoréode gáyode nanique, ga ijochagome ore uje ore toi. Jé basa ga Jesus sué yoquejnaréngone, yoquisijnaringuéone gáyode, ga chijóchame yóguiji yodi údi te ga jogadi tu uje anire, Jesus ujopié e sué yoquisijnaringuéone gáyode uje chi ijochagome yoc iji yodi údi. Yodi gajnui tu yocode uje jnumi pénuji ayoré togode ga, nanique ga, que toc jetiga qué uñeque chisapo guesi gotique rĩ. Ga adi tu jne uje yodi jno yoquisijnaringuéone údi aja yodi údi te ga, gajnui tu cucha imenui tome yoquisijnaringuéone.
Jesus chi chague yoquimánique jne:
Gusu yacajnaquéode ome yoque mu jecucha yuruode qui u ujeta gosi pota changureta Dupade ga pirotiguéode u unojo. Pirotiguéode u unojo uje qué Dupade Uruode déji jnumi. Jé basa ga gosi a chojninga jne: “Yangureta Jesus tiji dire, sequere ejórique to.” Mu que yimóngo Jesus diringai. Jesus chi chague yoquimánique jne, ga que yojnijo gotique chi di jne iji sequere ejo. Chi chague yoquibai te jne enga jno danguretasórone údi. Mu jecucha yingo uaque uje Jesuse a di jne, Jesus chi di ji jnumi tuné ga jno danguretasórone údi aja gaté yui. Ga quigade ga erámi unirisórone chi ore soca rome ñane iji ne jnumi. Ga unojo u uje ayoréode, cojñone a ore chimo unojo cucha gajnaréngone unojo. (Mateo 24:21)
Gusu yacajnaquéode, mu jetiga Rósadé pota ga chingo yógaja Dupade. Enga yimóngoji gaté ga Dupade chátaja yoc.
Rósadé catecã́ri Dupade:
Amoñomi gaté ga yatecã́ri Dupade to. “Yacaranguipise uje Ecarai chacate yogome Dupade Uruode. Yoque Dupade Dios, yacaranguipis ome ua. Yatecã́ri ua ji de. Yacaranguipise ome bajnacari Jesus gajnerĩ uje bagúsi yocari iji de jnumi, Dupade á. Yacaranguipise to uje jé areque yogome ua, Dupade á. Jé areque yoque uje jé barote yoquejode ome pejnaréngone, Yoque Dupade. Ajócãre Satanas utocaidode iji yoquejode. Ga gusu baruode iji yocari iji yoquidai. Yicatecã́ri ua ome bajnacari Jesucristo i. Amẽ.
Clave:
Dupade – Dios
Dupade Uruode – Palabra de Dios
*cucha sereréode – serrería
Ecarai – Tobité, Bolivia – 1960
Marina de Morarie churúsãre Ecarai uruode udojo
