Ore chojningame “parábola” aja Jesus acajnaquéode uñane:
Jesus chacãra dacajnaquéode aja cuchade gu ujetiga quigode u uje chise jnani bajade nanique. Ore chojningame parábola aja Jesus ojñane udore nanique. Mu chi ca ore chiraja acajnaquéode quigode ome ore. Jecute ore chojningame Jesus: “¿Chimo jóroque bacajnaquéode quitígo? Que yirajágo quitígo ome bacajnaquéode.”
Uje chi Jesus chojninga: “Jnani utácai ga chutãre,” chojninga. “Mu chugúperone di enga ore tagu acadie iji quigade. Chugúperone chijnime acadie enga ore tagu.” Ga que ore chiraja quitígo iji unojo, parábola uté. (Mateo 13:14,15 ore)
Ga Jesus chacãra dacajnaquéode aja cuchade. Jecute jé ojningane chojninga ujeta ca darasade chiraja quitígo ome. Que yiraja jeta jé u, mu a jé u uje chojninga: “Asi ome gajnúone ome ore,” chojninga. “A ore chiraja quigode jnenga jĩrique ore chiraja yocojningane cucha,” chojninga. “Mu ujetiga ore cho cucha bisidéguiji yacajnaquéode enga a yirajágo jne uje ore cho cucha bisidéguiji yu to, enga jé u uje yipógu yacajnaquéode quigode ome udore ore.”
Mu Jesus cho quique dacajnaquéode ome dacadigode enga chojningame ore:
“Utácai udore u anire, uje ore jno Dupade Uruode údi aja erámi jnenga ore chacate Dupade Uruode ome ore iji erámi. Enga chojninga: “Mu chugúperone u Satanás anírone utocaidode demónionie. Satanas u uje chi doi Dupade Uruode iji ayoréode ajéode, cojñone ajéode enga tagu. Que tagu mu chetaque ome ore, enga chetaque ore ome Dupade Uruode. Enga Dupade Uruode u semilla enga gajnui unojo u ujeta chugúperone tagu Dupade uruode iji ore ajéode.”
Jesus qué jno doquigode cucha údi enga chojninga: “Yacajnaquéode quigode unojo u uje anóningacho uje utácai chutãre mu ajñunie basája anírone pore ojnacúcode, ga pore ojnacúcode sué, sué gáyode ga toi. Gajnui u ayorérique uje chudute Dupade uruode, mu áyipieraque que jnoji cucha ponáyone iji erámi údode enga diga chicadiguipise yuruode.”
Enga adi jé u uje Satanas chĩro Dupade Uruode iji ayoréode yocajéode. Enga chejna Dupade Uruode iji ayoréode, cojñone yocajéode, ga yejnángo yocáyipiedie aja cuchade iji erámi tudé, enga gajnúone u pore ojnacúcode uje sué, sué iji utácai acadie iji jnumi.
Jesus pota jeta Dupade uruode chise dajogadi iji yocáyipiedie:
Enga Jesus chojninga: “E yimate yacajnaquéode aja yanguresṍrone ore gari, jecute a yiji ome ore jne, enga a yicapóji gaté rĩ,” chojninga. “Yiraja gu uje que cho na yuruode ome ore, enga yuruode udore u uje e chise dajogadi iji ore áyipiedie enga u uje a chátaja ore iji erámi udé ujetiga diga yiji ome ore.”
Mu a pujnusiétigai u ome Jesus uje jno nanique iji aníri dayé gari iji gatajnoquei jeta chise jnumi tudé. Jé basa ga uje Jesus jnome gatajnoquei nanique ga urasade, anguresórone ore timíninga uje jno enga pujnusiétigai jogadi u ome ore uje jnoji ore gari gu enga qui tu gaté. Mu chi adi a jé u to jne jetiga diapo jne rĩ ome danguresórone uyoque. A otigayasórone ore timíninga Jesus aja gatajnoquei jeta jno danguresórone yocúdi, enga pujnusiétigai a u ome ore uje noñome ore iji jnumi gu.
Jesus chiroque ore jeta ore jno ujnomei údi aja erámi údode:
Iji deréjnai uté nanique uje Jesus jnorásiji ore gari enga cho ore quique jeta angoninguite guesaque ore ome Dupade Uruode. Jé u to ujetiga ore jno ujnomei údi aja erámi údode. Yocajnécho to Jesus uruode udore; chingo yoque jetiga yicoi Dupade Uruode údi aja erámi ga yingongo yocujode ayoréo uje chi Jesus a diapo iji jnumi tuné jne rĩ. Enga qué piotiguei cuse ome yoque ujeta yingongo Dupade Uruode aja yocujode ayoréo. Ise ga ca cachi yocacajnaquéo ome ayoréode uñéngo, cojñone uñéngo. Jé yico enga yipéco Jesús uruode udore enga yejnángo yogaja. (Hechos 1:8)
Uje Jesus chejna daruode udore guesi enga jnome gaté yui uje qué ore chajire. Enga gue abujadie suru gai, jecute que toc ujetiga ore chimópo rĩ. Uje qué ore chajire gaté uje Jesus jno, ga jnani gáreode chiqueta raja ore. Enga póroropisi ore iguidedie. Enga ore catecã́ri Jesus irógode enga ore chojninga: ‘Galiléa gosode uaque á, ¿gotique gu a uje que ayáyo amíningacho Jesus aja jnoringai? Jec ũré uje e jnoji uacari que enga qui tu gaté, mu adi a jé u to jne ujetiga diapo jne rĩ.’ (Hechos 1:10 aja 11)
Dupade Ujopié Espíritu Santo chátaja yoque uje yajnerangome Jesus uruode ome ore:
Ga chi Jesus jno nanique ga ore jnusi jórogui. Ore chamáta ñane iji guijnatajéode. Ore catecã́ri Dupade. Mu ore chuningame eti Dupade Ujopié base ore gáyode enga ore chiraja ojningane unojo cucha, enga jĩrique ore chacate cojñone ome Jesus ujnomei. Chi cojñone udore uje ore chise Jerusalen iji dirode udore nanique, chi ore tṍraji erámi údode jnese enga ore uruode cãra ome ñane. Enga chi ore tijapísa Jesus anguretasórone ore uje chi ore dopísi ore uruode to jnese, uje que Jesus anguretasórone ore urúo múñi.
Pujnusiétigai jogadi tu ome ore jne ujétiga Jesus noñome ore iji jnumi:
Jecute a Jesus chojningasíarása ome ayoréode uyoque: “A yĩri jne enga a yise báguedie iji erámone,” chojninga. “Yise disorane iji erámone. Mu gare ore aja dajesúode mu que chimoc uje yijna uñai,” chojninga. “A yise ore iji mongone ore; gapua changureta Dupade, ga jé basa abai que changureta to. Enga yijíñome abai iji ore mochádi. Mu yijna acoté uje anire changureta Dupade.”
Enga a Jesus di jne enga pujnusiétigai jogadi tu. Pujnusiétigai jogadi tu ome ayoré acoterãchui, jeoga ayoré amanachugué uje pingãra ore jogadi ome ñane uje Jesus noñome uñai mu jno uñáraque údi. Pujnusiétigai jogadi tu to ome udore uñane uje ore angurenone u date arégode, uje chiese a piquetaque ore gu ore ate omone udore. Mu cachi ore ãrai u raque, uje que piquetangore uñeque cuse. Gusu Jesus uje chiqueta ayoréode, cojñone ore. (Efesios 2:8,9)
Jesus uruode qui tu enga a chojningarása: “Piotiguei déji diríca ujetiga ore tibágui yu enga yĩrórase ore isijnaringuéone,” chojningarása. “Mu dicotãrechoqui ore, enga ore chisi dabáyode ome dapesudode udore. A ore pógu dasijnaringuéone, enga que ore tibágui yu ujetiga yĩro orate gajnaréngone.” Jecute Jesus a chojninga: “Acai uaiti. Que yiraja ua to. Chamáñaje basijnaringuéone qué jogate ua. Uje que abidi yu gu ujetiga ĩro basijnaringuéone.”
Yirajágo uje gusu Jesus iyoi uje chĩro pisijnaringuéode:
Jecute que uerate gosi isocade ome Dupade ujetiga uté gosi pógu dasijnaringuéone enga jé udore jogate gosi. Jecute a Jesus uruode u ome dicotãrechoquíode ore jnese: “Que yimo uaque to go. Boyóji yejode ome uacapesudode cucha gajnárecho.” (Romanos 1:18,19,20,21)
Uñane chojninga: “Que toc jeta Jesus chicadígui yadode. Gajnárecho gu.”
Jé ca ayorérique, ca cojñotique ojnicho: “Que yangureta Jesus to. Chamáñaje cojñoque yuquejnagṍri yu gu. Jesus chi chĩro pisijnaringuéone jnese, mu ise ga ca chĩro yisijnaringuéone gu udore úringane gajnarechopise.”
Ujetiga gosi urúo udore, enga uté gosi cho parac. Cho jetiga yoquijnose carubode déji Dupade gari nanique uje yiyógo áyipiedie gáyode gu. Enga yocajnei pujuyaqueque déji yoquiquei. Mu Jesus cho yoquisijnaringuéone oré ome dáringai chuque uje toji curesei gai ome yoque, enga jé u uje Dupade chĩro yoquijnose carubode udore iji dari. (Romanos 3:25,26 ore)
Jesus sue cuchade jnese gai iji erámi tudé:
Jecute Jesus chingome yoc uje Dupade tẽra úringai dacasuté ome iji guéode, erámi ore jnese; jecute sue cuchade jnese gai iji erámi enga sué yote quedéjnane gáyode to. Jecute uacadúcho to uje diguiji gáyode nanique, yote quedéjnai. Chijna dai Dupade ujopié uje chajnésãrapo yote quedéjnai tome rĩ enga chise dacadigode iji ore pi cuco. Enga chi aníri, Jesus suépo pitoringai gai te rĩ.
Yirajágo uje Jesus acajnaquéode a chimate raja jnumi jnese jne. Jecute a ca ayorérique chojningárasa: “Que yirajágo Dupade atique gotique. Que yirajágo Dupade ojningane cucha. Jecute que yanguretágo to go.”
Mu Jesus ojningane unojo que piyaque gotique. Ayoré yoque ga obiréjna yocuruode quigode. Obiréjna Jesus acajnaquéode iji yocuruode quigode. Mu yoque gosi jeta ca changureta Dupade to jnenga, jeta apota angureta to, enga piotiguei qué u deréjnai unojo jeta ojninga: “Yingo yu aja ua, Jesus á, enga ajnoque yate gajnaréngone enga ṍra ore aja yote quedéjnai údi enga jé u ujetiga yijína banguresórone ore to jne jeta ãri.”
Gajño pioi jogasórone ayoréo ore áyipiedie chejna raja daguiose uecade iji jnumi:
Jecucha yingome uaque uje chi ayoré, jeoga chequé, jeoga cojñoi, jeoga uñeque, yocajnui tu cojñoc ugucharãi uje chi chojninga uje chimo yocai jnani bajai Abraham: “Ango yesade ore iji jnumi enga ca ore chicai gajño pioi to. Que yisapo yijóningai iji rĩ,” chojninga. “A ayoréode, Dupade guetesórone ore yocuruode taratágome jeta yisi ore ome Dupade,” chojninga. “Aroque Dupade anguresõre uñéngaja jnumi enga chacate yijorane ore,” chojninga.
Yirajago uje Abraham toi nanique, mu áyipie ecáji pijogadi uñeque uje Dupade anguresõre togode ore jogadi u to. Mu yocai uñai jnani bajai Abraham uté chajnai cojñoc ugucharãi enga chojninga: “Mu Dupade Uruode déji jnumi, jeta ore chimesẽre enga ore changureta. Moises urusarane déji bajorane ore gari jeta chingo Dupade Uruode ojningane cucha aja ore.”
Enga adi jec u ga gosi chise Dupade iji gatajnoquei ga chimo dojórigo iji jnaropié te ga, gajño pioi te ga, a uñeque chojningárása: “Dupade á, jé go que ango ore iji Tobité te ga, jé ca ore chicáji gajño pioi uté to.”
Mu Dupade a chojningárása ome uté gosi: “Yuruode déji ore gari iji Tobité. A ore chudute ga, ore changureta ga, ore chicai yoque to. Que yetaque ore to,” chojninga. “Jeta ore íjnogaja yibai te ga. Ueradipise jeta ore íjnongaja yibai,” chojninga.
Mu a chojningárása ome gajño pioi jogosórone ore: “Jé basa ore chetaque yu enga ore ajnane u uaque,” chojningárása Dupade. “Ore ajnane u uaque iji gajño pioi,” chojningárása. “Jé basa ore chimesẽre yatígo jnenga jeta ore changureta yu ga, a ca ore chicai uaque to,” chojningárása. “Apotáyo jóronga ayoréode iji yari,” chojningárása.
Yirajágo uje chi Dupade Ujnacari a diapo jne rĩ. Jecute ujetiga apota jeta bajorane nóna uágaja Dupade idai jne, enga ango Jesute ujnomei ome ore; jé socaseti ore changureta to. Jogadi u uté jeta bajorane, bajoranie ore nóna Jesute to ujetiga diga diapome danguresórone ore uyoque jne rĩ. E gusu.
Ecarai – Tobité, Bolivia – 1960
Marina de Morarie churúsãre Ecarai acajnaquéode unojo
