Jesus catecã́ri Dayé Dupade ome dacadigode uje idógosi jeta jnome gaté:
Jesus uruode u uje chingo yóguiji San Juan 17 uje chi idógosi jeta jnome gaté nanique, ga qué catecã́ri dayé iji jnumi ome dacadigode ore. Ga chi chojninga iji dacatecãraitigade: “Yapá, a yijíñome yocurasade ore to iji jnumi, jnutiminórone. Icatecã́ri ua jeta arodipise ore iji jnumi to,” chojninga, “enga arodipise ore ga jé adi tu gajnerĩ uje ugúsi ore gari diríca ga yirodipise ore iji jnumi. Yingo baruode aja ore. Yingo baruode ojningane cucha aja ore, ga jé ore doi jnese. Yimate baroquéode iji jnumi te ga, a yajnésara uaque ga jé ca etaque uñeque.”
Jesus cho quique uje dayé ojningane cucha tocade ome Júdas: (San Juan 17:12)
¿Jé gotique uje que chojninga? ‘Que qué ijnájoi uñeque, baru casodica.’ Jesute déji jnumi nanique ga irógode gare ore iji yirídai, ga que ore chijnángui uñeque. Mu udojo quigade enga chojninga, “A yirótigo a gare ore iji yirídai. A uñeque chijnángui. Yijnájoi uñeque.”
Enga chojninga, “Yapá, cáma yijnángui yoc uñeque. Mu Satanás u uje jno yocuñai casica údi. Mu baruode ojningane jé u,” chojninga. “Uje chingo yoc ujetiga ojningane cucha tocade,” chojninga.
Jé arajáyo to aníri, Jesus ojningai uje chi Satanás jno údi ga chisi ome pitoringane ome. Tṍra raja jnumi iji cucarani ójo ga dusi ome uchade ga dusíome uchadipísabia iji ajei. (Hechos 1:18)
Que quigode u go jeta Dupade chetaque danguresõre uñeque ujetiga uté gosi cṍra. Úngare que chetaque go, mu jé socaseti chetingare gosi ome anguretaretigai. (Hebreos 12:11)
Júdas isocade cãra rome yoquisocade uje yicṍrango. Cho jetiga chijnórapíse Jesuse to nanique enga nóna Jesus aja quedéjnane. Doi iroquéode. Chimo iji posode gáyode. Mu doi oré tome uraque dacadisṍre uté ga jec u uje cho dajuñame re. Ga basíji cucarani ójo ga uchade dusi ome.
Mu Jesute que uruode u gotique jeta chojninga, ‘Yapade, yiji ome ore yocurasade iji jnumi, mu yiyaque ore jnese,’ que chojninga go. Jesus uruode u ga chojningame udore: “Yapade, yiji to ome ore uje yejna baroquéode guesi, mu arodipise ore jne iji jnumi.”
Mu jé ũré Jesus uje Dupade uruode qui tu ujetiga yejnángo yógaja Dupade Uruode enga ca yimóngo pujnusiétigárique ujetiga diga Dupade di. Enga adi jec u Jesus uje chojninga: “Cáma yijnájoi yocuñeque, berani casodica ore iji jnumi mu gusu uté baruode ojninga casicaite uje chi aníri nanique, chi yijnájoi nanique. Chi gusu uno,” chojninga.
Jesus chingome dayé Dupade uje a noñome Uruode iji darógode gari jne:
Ga jec ũrépise Dupade uruode uje déji ne uje chingo yoc, chojninga: “Bẽrate ore ome yu, yiji ome ore to ga yijíñome yocacajnaquéode barúo iji ore gari. Yijíñome baruode iji ore gari,” chojninga.
Enga irajágo to uje Jesus acajnaquéode unojo u uje chacája ore gari, udore ore uje ore jno Dupade Uruode údi.
Dupade tibidi erámi unirisórone uyoque jnese. (Mateo 22:14)
Enga gajnui jec u uje tibidi yoque jnese. Chapuse yógaja iji ne guidai uje chiroque yógaja guidai. Mu ayorérique que tangári Dupade Uruode, que tangári Dupade pijnane ga a chisírási diri te ga uje chojninga: “Dupade, ¿gotique que erã́tique chosõre yu ga tibidi yu to?”
Mu Dupade Uruode qui u uje chojninga: “Yibidi tu uaque jnese. Yipota jeta yijna ua aja yidai to, mu uaque u uje uaquetácho yu. Que eso yunératique to,” chojninga.
Ga adi jec u Jesus icatecãraitigade ome dayé Dupade, uje chojninga: “Chamáñaje ingo baruode aja ore, ga ore susipise guio to iji jnumi,” chojninga. “Que yijñángopo yoquiró casodica uñeque to rĩ,” chojninga. “Gusu uté, baruode ojninga casicaite, uje bijna. Chamáñaje baruode que toc jeta que aníri, que doi ga que tocade,” chojninga.
Jecute Dupade Uruode chingo yoc iji aníri, San Juan 17, uje chi qué catecã́ri dayé; u Jesus. Chi chojninga: “Yapá, yiji ome berane casodica ore iji jnumi, yiji ome ore iji jnumi, mu que yiji ome ore gotique,” chojninga. “Yijíñome baruode iji ore gari,” chojninga.
Jesus chijócha Dupade ajei údi ome danguresṍre disi ejode ore uyoque to nanique rĩ:
Ga adi jé u yocurása casodicaite misionéro uje ore íjnongaja doi. Ore noñome Dupade Uruode iji yocari ujetiga yingongo Dupade Uruode aja ñane. Enga gajnui jec u Jesuse uje chojninga: “Yijíñome baruode iji ore gari, yocacajnaquéode. Enga yoquimeserãsórone ore déji jetiga ore chingo yocacajnaquéode aja ñane jne,” chojninga. (Juan 17:20,21)
Ecarai cho quique uje misionérone ore noñome Dupade Uruode iji ore gari:Jesute chojninga: “Que yi ome ore bisideque.” Enga adi jec u uje misionérone ore jnoji ne yoquidai, mu que ore noñome yoque bisidec. Ore noñome Dupade Uruode iji yocari, enga qué ore catecã́ri Dupade ome yoc ujetiga Dupade chirote yóguiji yoquidai. Enga Jesus uruode jé quigode upo rĩ uje chojninga: “Orocoi ore uje jecucha ibidi ore, ga jecucha icatecã́ri ome ore, ga ingo ore ome ua ujetiga ore nóna yu aja gatajnoquei to,” chojninga.
Ecarai chacãra dacajnaquéode aja chequéraque uje chiro dachadie: Ga gajnui jec u unojo uje jé basa chequéraque chiro dacháraque ga chiro dachadie ga ueradei jnese. Enga jec u ujetiga chacája ga uñaraque dusi ga ore cho uñane jnese. Mu ore chibórome. Chibórome uñanie ga dajuque gu gajnarengué te ga que cuchárique tṍraji.
Enga gajnui jec u uje yocajneque Dupade Uruode jnese, mu yocuñane chetaque Dupade Uruode enga gajnui tu co dusi uje anire gajnarengué ujetiga yójigo yodi aja. Ga adi jec u uje gosi a pota enga gajnui tu co etocoroi uje etogué enga ueradé tu uaté. Co etocoroidie ome yodi. Ga gajnui jec u ayoré uje misionéro uje doi Dupade Uruode enga uté u uje jno Dupade Uruode údi ga chingo Jesus acajnaquéode aja yocujode ayoré, enga anire chojninga: “Jesuse chingo dedai taja yoque jnese jeta yijínango aja,” chojninga.
Mu ayoré uté chojninga: “Iyiraja yui ome Jesus idai to.” Ga unojo gajnui tu co dusape uje a chiraja uta. A ayoré co ga chojninga: “Yejna udui taja jnumi uje yetaque yodi yúi jeta areredaté yúdode ome,” chojninga. Ga ore udui u cucha aja dajesui ga Dupade Uruode a adi jec u uje Dupade Uruode chacája ayoré te mu, que chiraja dayaritíguiji uje chetaque Dupade Uruode ga a chicai dajesúrigo.
Jesus chi jno jne mu chi Dai uru casodica qué déji ore jeta pacadique ore ome:
Jecute Jesus uruode qui u uje chojningame anire, dayé: “E yiji ome to yocujórigo ayoré ore mu baru casodica qué déji ore ga orocoi ore uje ore changureta yógome yacajnaquéode,” chojninga. “Orocoi ore uje yiqueta ore,” chojninga. “Enga ijnime orejnaréngone,” chojninga. “Jecute ore changureta ua uje chi yijnime ore ejnarétigo.”
Ga Jesus uruode u unojo ome Dayé: “Yapái, icatecã́ri ua gu ujetiga jé ca bo uñeque údi iji ne jnumi,” chi chojninga. “Jé arodipise ore ome Satanas to iji jnumi ome bajopié ga yijínango ñane aja bedai jeta bo yocúdi,” chi chojninga. (Juan 17:15) E gusu.
Ecarai – Tobité , Bolivia – 1960
Marina de Morarie churúsãre Ecarai acajnaquéode unojo
