Ujetiga panguretigai ca nóna dajirigode enga cucha bisidécho Dupade Uruode ome uté gosi:
Enga ingome yoque to, ujetiga inoningáco, uje jé ũré Dupade ome daruode. Mu yoque gosi ujetiga ca chibéro iji dangoneparitigade ome Dupade Uruode, enga jé u uje cho cucha bisidécho iji, ga que cuchárique tṍraji gotique ujetiga chajire jeoga chudute, ome yajéode.
Ujeta ca gosi changureta Dupade ome re, mu doi Dupade Uruode, mu que chajire yúrique go, enga obiréjna uje cucha bisidécho ome.
Ga chise gójni diri ujetiga Dupade di ga gosi jnusietigade jogadi tu, goto jnusiétigade jogadi tu uje ore chise Dupade Uruode bisideque nanique, enga que panguretigai nóna dajirigode Dupade urúo.
Jnacare ugucharãi quene áyipie déji Dupade Uruode úringai ũré uje chingo raja gajño pioi.
Jé uacadúcho, uje jecucha yingome uaque gu, uje chi jnacare ugucharãi chingo raja jnaropié te ga, jé jno ga chojningame yocai jnani bajai Abraham: “Ango yesade ore jeta ca ore chicai gajño pioi to,” chojninga.
Chingo raja Abraham gu, jeta yoque gosi a adi tu ujetiga chijnóra darásarigo, ga chetaque jóroque desade ome gajño pioi yui.
Chojningame Abraham: “Que yisapo yicaniratiguei gotique iji. Arenie yuque yu iji,” chojninga. “Achopise jnupuchade garapídode iji yu,” chojninga. “Achopise pioi ocaráidie iji,” chojninga.
Mu yocayode jnani bajade uñai chojninga: “Mu Dupade Uruode déji jnumi,” chojninga, “ujetiga besade ore chudute ga ore changureta Dupade.”
Mu quigade ga uté chojninga: “Jé go ca aroque togode uñai, Dupade anguresórone uñeque, a chingo yesade ore iji jnumi enga ca ore chicai jnaropié to,” chojninga.
Mu Abraham chojninga: “A yiroque togode uñéngaja enga gosi di bojningane údi ome ore, mu dicoré,” chojninga. “Taque-taque uje dicoré. Dicoré que chiraja cuchade. Ca besade ore changureta Dupade ome ore ojñáringo,” chojninga.
Ga yoque gosi ta adi tu jetiga gosi chingo raja aníri, gajño pioi.
Jé ũré Dupade ome ojningane uje chi idógosi uté uje e iroco yúode.
Mu jé uacamóño uje chi Dupade Uruode chojninga: “A yiríringárique yúode ga pocaningane, unojo basája uñane quigade. A yiríringárique yúode jne enga chaguhéode déji erámi.”
Mu cáma yico chaguhéode gotique, Dupade ojningai. Mu jé déji punire quedéjnane.
Jé cachi uñéngo ore tagu dabosode iji udore uje chaguhéode chejna ore. Jé basa ga pocaningane ga ugúcoji jnese iji dirode jnese.
Jé basa ga guédodie ga guédodie jecucha basíji gatajnoquei, mu cama basipise go.
Ga Jesus chojninga: “Yãrapiedie unojo yui cáma yĩri gotique. Yãrapiedie a cuse jne uje yiríringai idógosi gu. Guedé chécãre dáringai guedé te ga, que qué guedé chisapo dáringai guedé gotique jne rĩ,” chojninga.
“Guedé ta toi, ga topié erámi. Jé basa ga guedoside ojodie que chuságapo jnumi gotique jne rĩ,” chojninga. “Ga unojo u uje yiríringai idógosi,” chojninga Jesus. “Jeta yĩri iji jnumi ome yanguresórone ga yiji ore údi.”
Ga unojo u jetiga anóningacho uje chi Dupade Ujnacari diapo jne rĩ. Enga que ajéninga daruode, Dupade. Mu que di gu uje qué chirote ayoréode uyoque uñéngo jetiga yanguretágo. (2 Pedro 3:7-10)
Jesus diringai a gajnui u yote quedéjna cuchábi uje israelgosode ore chaquesu nanique.
Uje israel gosode ore déji yote quedéjnai uéchai uñai nanique enga Dupade chojningame ore: “Cá boyo ji te á. Yaro yotequedejnai uje ajedaté mu yaróji,” chojninga. Dupade charo yotequedéjnai ga yotequedéjnai chetingare re, chetingare re iji unojo uéchade. (Exodo 14:21 aja 22)
Ga yote quedéjnai chetingare re, chetingare re iji unojo uéchade. Mu uje Faraón, soldádode ore chise yote quedéjnai uté mu ore chajuque yote quedéjnai uté cajnóningai to, mu ore chuningame eti yodi chaco ore gáyode. Uje yodi chetingare re, chetingare re, mu e Dupade juega doi ome enga jnopója dajogadi casé rĩ. (Exodo 14:26 aja 28)
Ore uñane iji dirode udojo gajnerĩ ore chotigase Jesus diringai, enga jé adi u ome Faraón ore. Ore jos eti ca yotequedéjnai dopóji dajogadi, mu ore chuningame eti, yore ore gai enga chujé ore. Enga jé cho jetiga Jesus di. Cho jetiga ca di jne, cho jetiga Dupade Uruode ca tocade jne ome dajnacari diringai, cho jetiga ca ũré Dupade ome ojningane cucha. Mu qué chirote jeta ayorérigo uñéngo changureta. Mu a chise diri jne ujetiga Jesus di jne. Enga otigayasórone a ore bijna, jé basa cho jetiga anguresórone ore chise tié uechai uñai uje ore angureni Jesus jno ore údi.
Unojo u uje Dupade que ajéninga darúrique.
Israélgosode ore jos eti ore jnoji Egípto enga jĩraque ore chise ore uniri ichárique jne.
Mu chaguhéode chejna ore iji dajei. Jecute ore chojninga: “Boyo, yicoi, yajnésacoja Egípto uje yajo yoquibotígo iji ta gu. Mu Moises qué jno ore údi aja punire ichárique, mu que ore chíse míraque. Jé basa ore chise erãpetaréode ga íjnoque cucha pibotique iji uté. Ga ore tagu arurégode, gatajnoquei jogonórone. Ore chipese cuchade uje tṍraja gatajnoquei. Enga que yotique unératique cuse ome ore.”
Ore chojningame Moises: “E yicajnócoji. ¿Ga jé yójigo pírique jne a?”
Ga jé u uje Moises chutṍri Dupade jeta chátaja ore. Enga Dupade chingo pite quedéjnai aja Moises ga Moises chisa ga tṍraja yote pepui uté ajei ga jé u uje nóña ga yote unere. (Exodo 15:22 aja 25 ore)
Iji taningai nanique uje Dupade chiroque Moises ujetiga chijnime israélgosode iji Faraón jmainie enga Moises todo. Mu Dupade nona aja quedéjnane. (Exodo 3:11 aja 12)
Enga unojo u uje yirajágo uje chi ca Dupade cho darupatáringa ome uñeque. Uje chojningame Moises nanique uje chátaja ore jne, enga do gojni enga chátaja Moises urasade ore ome cucha pibosode jeta ore tagu, jé aja yodi jeta ore chóji.
Jé cho uje Dupade chingome yoque to uje a ujnacari di ome danguresórone uyoque jne. Enga Dupade que cho darupatáringa ome yoque. Jecute Dupade ujnacari a di jne ujetiga tiémpo u ome dayé.
Uje Dupade que ajéninga darúrique gu.
Abraham catecã́ri Dupade ome daguiosode uje ore déji guidaidatei uje chi Dupade chejna jne.
Abraham catecã́ri Dupade enga chojninga: “¿Jeta jnani parágode déji ore idáyode udore enga jé ejnárase jne a? Ujetiga 50 u enga be ga amesẽre ore jne enga ca ejna ore idánique.” Enga Abraham chigotapísaja daruode ome Dupade ga chojninga: “Ujetiga 40 u, jeoga 30 u ore, jeoga 20 u, jeoga 10 u, mu ca ejna ore idáyode.”
Chi Dupade chojningame jnani bajai Abraham nanique uje a jé uacadúcho aníri, to: “A yise parágode uje chejna yijmanane ore, enga a ca yejna ore idáyode jne.” Mu Dupade que chise uje 10 u parágode iji guidaidatéode udore jnese. Mu Dupade chejnárase ore jnese iji ore idáyode ujetiga jé ca Abraham catecã́ri ome ore. Dupade que chise parágode uje udore chejna yijmanane, mu chise gagájni enga chiqueta gagájnione ore uje chejna guidáyode udore.
Gusu Abraham iguiose gagájnione nanique uje paraque ore gu. A paraque ore gu uje udore ore dai uñai Abraham cho ore quique ome Dupade adode. Mu uje ore déji idaidatei guesi enga Dupade chiroque pioi aja jnumi enga chejnápise guidai gárode udore enga udore jogosórone toi jnese.
Ga unojo u uje Dupade que ajéninga darúrique go.
Yocangarádejnai Dupade chojningame re: “A yingórasa Abraham yipesutique cucha ome uje a yipésu iji ore idaidatéode udore jne. Uje que cucha bisideque Abraham uté gu,” chojninga, “jecute a yingo yáyipiedie aja jne uje gajneque yuruode gu.”
Adi jé u ome yoque to, uje Dupade que cho cucha bisideque iji danguresórone uyoque, uje yocajneque uruode to gu, enga yijnórango Dupade Uruode, enga que yoco cucha bisidéguiji.
Ga unojo u uje Dupade que ajéninga darúrique go.
Dupade chingome yoque uje a tṍra Satanas, urasade ore aja gajño pioi jne.
Chi Dupade ujnacari diapo jne rĩ iji jnumi uné, enga jé u jne ujetiga Dupade tṍra Satanase, urasade ore aja gajño pioi, ga que ore chimopo pijoningai ome re rĩ. Ga jé unojo u uje Dupade chingome yoc ga ingongo ome yoque to. Ingongome purasade ore. Jé basa yingongo ore jne, enga chajuque gosi agutéraque ujeta qué chudute udore jeta ca changureta Dupade to. Que yanguretágo Dupade, mu uduco unojo ga yoque gosi chajéngome Dupade.
Uje a gosi chojninga: “¿Gotique a yipesutigo uje chi paranája yu aja gajño pioi jne?”
Mu uje que ipéco Dupade Uruode, Dupade ojningane atatagode, enga u uje Satanase urása yoc enga uté qui jé u yoqui to.
“Gusu Dupade Uruode ome yoc uje chingo yoquipesutígo ome yoc,” ore chojninga. “Jeta chingome yu ga a yipésu to uje que yipota Dupade ujuyaquei.”
Mu que gusu go ujetiga gosi pota ga chojninga, “Que yipota Dupade ujuyaquei, ga a yangureta to.” Amiri u ujetiga changureta Dupade ujnacari enga cho daquetangóri iji uté.
Jé basa ga gosi pota jeta chiraja datígo ome Dupade Uruode, ga a gosi chimesẽre datígo ome Dupade adode ga gosi chingome yu iji deréjnai udé enga a yo uté gosi quique jne.
Gusu yacajnaquéode ome yoc.
Mu yicatecã́ri Dupade jne:
“Yoque Dupade Dios, icatecã́ri ua iji deréjnai udé uje yacaranguipis ome ua, Dupade, uje jec ũrepise baruode. Jec ũrepise ua ome bojningane cucha. Icatecã́ri ua iji gajnerĩ uje yacaranguipis ome ua uje banguresórone que ore chacho ujetiga ore tangári baruode, yoque Dupade.
Yoque Dupade, apésu yoque gajnerĩ ga yoco jnani bajai David te ga, jetiga ãro yoquisijnaringuéone. Ãro betétigade iji yocuruode. Ãro Satanase píode iji yocuruode enga ichapise yoque gajnerĩ, yoque Dupade. Jeta barasique yoque aja yocajesúode erámio gajnerĩ, yoque Dupade.
Dupade, átaja yóguiji yoquidai gajnerĩ, enga yijmacopise baruode aja yocáyipiedie enga yirajágo udore quigode.
Yoque Dupade, icatecã́ri ua ujetiga jec ũré ga yanguretágo ua ga ãro yoquisijnaringuéone uje yotigáco baruode, yoque Dupade.
Icatecã́ri ua ujeta asíome yoque bosõraquei tome yoque, ga osóre yóguiji jnumi.
Yosõco uñane iji jnumi, yoque Dupade, ome baruode.
Yicatecã́ri ua ome cuchade jnese gajnerĩ uje yirajágo uje bajnacari tu uje tẽra re ome dayoi iji jnumi nanique ome yoc ujetiga churu yoquisijnaringuéone. Churu yocuru patáringane iji yocajéode.
Dupade icatecã́ri ua ujetiga átaja yoque gajnerĩ. A ayoréode uyóguiji erámi jnese ga yocuñéngo chejna raja baruode, yoque Dupade. Átaja banguresórone ore iji ne, ga yejnángo yóguiji baruode to, yoque Dupade. Icatecã́ri ua ome cuchade jnese ujetiga átaja yóguiji erámi jnese gajnerĩ ome baruode batigade.
Átaja yu gajnerĩ. Ejnaretaque yu enga ãro yoquejnaréngone iji yocúdode, yoque Dupade, ga asi ome pijóningai tome yoque, asíome betotiguei tome yoc, yoque Dupade. Asíome pijoningai ome yocurasade, yoque Dupade, enga ijõre yoque ujetiga bajéo.
Átaja yoque jnese gajnerĩ ome baruode ga yoquirasique yoque gajnerĩ ujetiga yicoi guesi enga yocáyipiedie déji baruode gajnerĩ uje jé udúco. Yicatecã́ri ua ome Jesucrísto i, Amẽ.
Ecarai – Tobité, Bolivia – 1960
Marina de Morarie churúsãre Ecarai atatagode udojo nanique
