Ecarai acajnaquéode:
Yingome uaque gajnerĩ ujetiga ca yetájo Dupade uruode atatasórone. Ujetiga ca yetájo Dupade ujnomei jnungórone ore. Enga jé ca yoco jnani bajade ore uje chi ore chetaque Dupade anguresórone iji uraque dajade nanique.
Dupade uruode atatasṍri Jeremías adode: (Jeremías 20:1,2)
Enga yimóngo iji uné darujna aone uje e ore jno Jeremías údi uje ore chigaru jmanecade. Ore chetaque Dupade uruode iji Jeremías pijnani uje chĩ́care ore ome Dupade uruode.
Mu jé ca yoco jnani bajade udore ore gajnerĩ enga jé ca yicoi ore isocade to gajnerĩ. Enga ca yetájo Dupade anguresórone iji yocujade to gajnerĩ.
Yirajágo uje qué ore pésu cucha gajnarétique iji Dupade irajasórone uje ore gaidode u Dupade uruode quigode. Enga jé ca yoco unojo gajnerĩ, Jeremías igarisórone ore, jeta ca yetájo Dupade anguresórone, Dupade uruode atatasórone, Dupade ujnomei jnungórone ore.
Dupade uruode chojninga: “Ujétiga gosi cho darúja yanguresóri ome daru gajnaréngone, ga a yo yurúja gosi to jne.” Jecute ingome yoque gajnerĩ ujetiga ca yoco yocurúja Dupade anguresórone, Dupade ujnomei jnungórone ore.
Ayoréode ore chiraja nanique uje Dupade cuse:
Uacamóño uje jnani bajade ore, ore todo Dupade to nanique uje qué ugúcoi erámi casodicaite, menenéngone ore uyoque jnese. Irajágo uje Dupade cuse, mu que yirajágo uruode quigode gotique.
Mu disi ejode uyoque enga yirajágo Dupade uruode quigode iji darujna arone, uje darujna arone chingo yoque. Uje ore churúsãre Dupade uruode quigode iji, Dupade guetégode quigode iji unojo, darujna arone. Enga yirajágo uje cuchade ipesungóri tu Dupade gu Dupade uruode.
Jé ca yetájo Dupade anguresóningo ojñáringo:
Enga jé ca yocuñeque chetaque Dupade anguresónique ojñáringo gajnerĩ. Jé ca yocuñeque cho darúja anguresónique gajnerĩ. Dupade anguresónique gu.
Yirajágo uje pujopié, pijnoraquei ore garani tu Dupade, cucha omone garani u Dupade. Yirajágo unojo uje eduguéjnane, Dupade ujnomei jnungórone ore chingo yoque.
Gusu nanique uje yirajágo uje Dupade cuse, mu que yirajágo uruode quitique go. Gusu uje yirajágo cuchade udore gu Dupade uruode, enga disi ejode uyoc e yirajágo uje Dupade chi chetaque pisijnaringuéone. Chetaque pipojnaquéode. Chetaque pangoninguíte paritigáde. Mu Dupade potigádi u pate omone iji yoque, ujetiga yicoi yocate omone to, enga Dupade chimesẽ́re yoque to.
Jeremías cho daba datatagode Dupade urúo nanique:
Chi Dupade chojninga nanique ome Jeremías: “Bo ga acate Israél abode ore ome yimeserane cucha.” Mu uné jno, mu urasade chetaque acajnaquéode. Ore chigaru jmanecade ujetiga ore nája guiguíjnai enga ore suru gai. Ore chetaque Dupade gu, enga ore chetaque irógode ore acajnaquéode. Mu chi ca gusu Jeremías gotique, nanique, Dupade déji gari. Enga Dupade cho dajuñame udore, Israel abode ore, uje ore chetaque Dupade uruode enga que ore doi uraque dapesungóri ajegaidode cucha gotique gu.
E gusu yacajnaquéode udojo. (Jeremías 29:11, 12)
Ecarai – Tobité, Bolivia – 1960
Marina de Morarie churúsare Ecarai uruode udojo
