Yacate uágome San Juan urusãrane gajneri, uje Jesus acadigode uñai u uté nanique:
San Juan ojñane u uje chingo yoque uje Dupade Uruode pésu re nanique ga jnani, enga cho yoque. (Juan 1:14)
Dupade Uruode déji nanique iji erámi taningai enga u uje pésu cuchade:
Enga Dupade Uruode uté u Jesute uje pésu cuchade jnese iji taningai; ga Dupade Uruode jé jogate erámi bajac. Ga Dupade Uruode jé u Dupade to. Erámi taningane u unojo uje Dupade pésu erámi, enga San Juan chingo yoque, chi: “Cuchade uje déji erámi jnese que ipesute re go. Dupade Uruode ipesute cuchade jnese iji erámi. Jecute yingongo uac uje Dupade Uruode ipesute erámi jogonórone cucha. Que cuchárique cuse ujetiga ca ipesute. Dupade Uruode ipesute cuchade jnese.”
Dupade chi utocaidi u Daruode (uje Jesute u) uje pésu cuchade. Enga Dupade chimate cuchade gu datocaidi iji erámi. Utocaidi u Jesute, dajnacari. Dupade chi pésu cuchade enga utocaidi u uje chimate cuchade. Ore chingo yoc uje pucuecaringuei garani tu uté to. Mu ijnangununie, pisijnaringuei pota sué gai mu que toc ujetiga sué Dupade Utocaidi gai uje que sué Dupade gai gu. Que cucha uñeque sué Dupade gai uje Dupade ipesute cuchade jnese enga que cuchárique sué gai.
Dupade iroque Juan uñai jeta ore changureta direcaringuepísi ome uté ojñane:
Chi Dupade iroque bajai u Juan uñai nanique aja erámi ujetiga chatata direcaringuei ujnomei ome erámi unirisórone ore. Que direcaringuepísi u Juan uñai uté nanique, mu di gu jeta chingome direcaringuei gosi aja erámi unirisórone. Dupade iroque Juan uñai uté ujetiga erámi uirisórone ore changureta direcaringuei Jesute ome uté ojñane enga piquetaque ore.
Mu Jesuse urasade chetaque nanique mu que u ore jnese go:
Mu uje Jesute e di enga chingo raja darasade ore enga Jesute urásarigo chi ore chetaque nanique. Mu uñéngo chi jé changureta enga udore ore u uje Dupade cho dabi iji ore. Enga jé u ore ojningane uyoque to uje yanguretágo iji diríe udé. Dupade cho dabi iji yoque to iji diríe uné gajnerĩ uje yanguretágo Jesute. Ujetiga uaque gosi changureta Jesute ga Dupade cho dabi iji uaque gosi to uje changureta Ujnacari. Jé urúo nanique. Dupade chojninga: “Ujetiga gosi changureta Yujnacari enga yo yujnacari iji gosi to.”
Dupade cho dabode iji Jesus anguresórone:
Yacaranguipísome Dupade uje yocuñane changureta Dupade ga Dupade cho dabode iji yoque to. Ujetiga Jesute ore diapo jne rĩ ga yijínango ore aja oridaidaté gateminóri to. Jesute chi qué pésu yoquidáningo iji gaté jecute cáma diji yoc. Chi yijínango Jesus aja gaté gajnerĩ ujetiga di, udore ore uje ore changureta Jesute. (Hebreos 11:2,3,6)
Ecarai – Tobité, Bolivia – 1960
Marina de Morarie churúsare Ecarai acajnaquéode udojo nanique
