Ecarai uruode u udojo:
Dupade Uruode iji darujna aone u udojo uje noñome iji yocari nanique, ga yajnerangome ga yingongome ñane iji Dupade Uruode batigade. Mu ujetiga icoi Dupade Uruode mu qué yimóngo iji gaté bajaque jeta yicatecãcoi Dupade jeta Dupade chátaja yoque, ga chudute yoquicatecãraitigade jetiga ca cucha gajnarétique déji yoc. Jeta cucha gajnarétique déji ga ango Dupade, enga chimesẽre yocatígo ga chĩro. Amóñoji gaté ga yingo yogaja Dupade.
Ecarai e catecã́ri Dupade:
Yoque Dupade Dios, yicatecã́ri ua gajnerĩ uje yacaranguipis ome ua, mu que yimo yocurasade jeta ore chingongara raja ua. Jeta ore chingo yogaja ua to iji dejai, mu gusu ua uje baraja cuchade. Átaja yoque gajnerĩ jeta yirajágo baruode quitígo gajnerĩ. Yirajágo ua uje bẽrate cucha omone ome banguresórone. Jé basa ga bapuse erámi taja ome guéode, sequeré adode, yoque Dupade.
Mu yicatecã́ri ua gajnerĩ jeta átapísaja banguresórone gajnerĩ iji ne baruode batigai uje bayé su, aníri Jesute, bayé chimate dasagode cucha nanique iji udé deréjnai ga chedu degu piyaridíji nanique ome yoque, Dupade. Jecute yatecãcoi ua to gajnerĩ jeta átabája baruode aja yoque to gajnerĩ jeta yedúgo iji deréjnai. Mu, yoque Dupade, yirajágo uje cucha pisagode sué yoquibáyode rĩ. Ga yicoi yoquisagode cucha mu jetiga amesẽre yocatígo ga yicoi yoquisatígo maringa, ca cuchárique chosi ti iji yoc, yoque Dupade. Yicatecã́ri ua ome banguresórone ore iji ne Tobité jeta apésu ore enga ore quérã. Ore chajnerame yoquininaquei iji ua to, yoque Dupade.
Jé u yocurasade misionérone rĩ jetiga átaja ore gajnerĩ jnenga ore chajnerame yoquirajatigai ga yirajágo baruode gaté iji ore pijnatígo, yoque Dupade. Yirajágo uje ore chiraja baruode, mu que ore chiraja yocurúrique mu gusu ua uje baraja cuchade jnese, yoque Dupade.
Yicatecã́ri ua ome yocurása di ejode, Rósadé, Soríané ore. Udojo u uje ore changureta ua. Yiraja uje yiquérango iji guidai to mu baruode batigai tu jeta yocuñeque jno maringa, jetiga ca gosi cha baruode iji erámi. Adi u Rósadé ore jeta ore chajnerame baruode iji yocacajnaquéode iji dajesúrigo erámio.
Dupade, yicatecã́ri ua ome cuchade jnese ome bajnacari Jesute i, amẽ.
Ecarai acajnaquéode u udojo: (Juan 16:22)
Jesute acajnaquéode u yajirigode ome yoque iji San Juan urusarane uje Jesus qué déji jnumi nanique ga chatata dayé adode. Chatata dasagode ome danguresórone uje qué déji jnumi. Chatata anírone cojñone ijmongaquéode ome. Jesute, chamáñaje ujopierãque, mu chudute pijmongaquéode unojo to. Jecute chojningame dacajnaquéode udojo ome danguresórone. Chojninga: “Yi jnenga, yijiapo ome gaté jne rĩ, enga páyuguhebátiga jne ome uaque. Jé basa ga pininaqué yicoringai tome uaque,” Jesus chojningame danguresórone uje déji jnumi nanique.
Mu anguresórone que ore chiraja. Jesus jorane que ore chiraja uruode quigode go. Ga chi ore cho dabuja ome ñane. Jesus acadigode ore chojninga: “¿Chimo jóroque daruode quitique? Uje chi aníri, chi pininaquei jne mu pujnusiétiga rĩ.” Ga que ore chiraja Jesus acajnaquéode quitique.
Mu chi Jesuse chudute. Chi chiraja ore áyipiedie quigode uje chi chise ore áyipiedie ajéode. Chi chojninga: “Que arajáyo yacajnaquéode quitique go. Jecute uacapotáyo jeta angoño ñane yacajnaquéode,” Jesute chojningame dacadigode.
Ga u iji de deréjnai tudé ujetiga ca yirajágo yocacajnaquérigo jeta ca gosi chiraja yocacajnaquéode quigode, ga Jesus chacãra cuchade aja dacajnaquéode. (San Juan 16:17)
Mu Jesus chojninga, aníri, uje cho dacajnaquéode quique ome dacadigode ore: “Uacamóño uje,” chojninga iji dacajnaquéode, “A chequéraque atique tagúji gajnerĩ enga chiraja urõsoringuéone, mu ica base ga a urõsoringuéone ucode a chicadígui, a chicai dajesúrique,” Jesus chojninga.
Chojninga: “Adi jec u, chi cojñone ore chujé yu jne, enga erámi unirisórone uje que ore changureta yu enga a ore irasique re jne uje ore chimate yu aja jnumi. Jé basa ga yanguresórone chi ore jnusi jórongui yu, chi ore cho jóroque dáyugu re mu quigade chi ore chimopo yu dirome rĩ. Chi yiquecapo dirome rĩ,” chi Jesus chojningame dacajnaquéode uje chi cho quique.
Pininaquei jogadi tu jne jeta Jesus di ga jno danguresórone údi:
Enga Jesus diringai chi adi jec u jne. Jesus toi nanique uje cojñone chujé ga cojñone ore irasique re uje que jé ore chimopo Jesúterique to gotique rĩ. Mu anguresórone ga que jé ore chimopo Jesus úringai ayoré ga ore jnusi. Ore jnusi. Jé ore cho dáyugu re, ga ore po ejode. Que yimo jeta Jesus anguretasórone u jnese. Mu chi chequé gotórigui ore poji Jesus ejode.
Ga adi jec u, chi Jesus di jne enga pujnusiétiga. Mu pininaquei tome yocuñane. Adi tu uje ayoréode, yocuñane a jnome Jesus quigade to jne. Ga ore irasique rágaja Jesus aníri, idai yui. Enga udore ore uje que ore changureta Jesus, ore iguiosode a ore jnome Jesus idaidaté yui to jne. Ore jnusi jórogui daguiosode. Ore jnusi jórogui anírone, dajade, jeoga ore daja ore ga ore neroi. Ga Jesus diringai gajnui jec u dáringai casicaite ayoré chuque uje ore chujé iji jnumi nanique ga erámi unirisórone ore irasique re nanique uje ore chimánaja jnumi. Jé basa Jesus chimate danguresórone ore aja úringarique ijõre jne, enga u uje ore jnome gaté ga a ore iguiosode jnusi jórogui ore.
Que toc jeta Jesus jé chijna ore to uje que déji darujna aone to jeta chojninga: “Chi Jesus chejna yogaja dabai iji yoquidánique.” Que déji go.
Mu déji jetiga ayorérigo iji ore idánique chejna raja Dupade Uruode, Dupade úringárique pangurete ga ore u uje ore chejna raja Dupade idai úringárique piquique.
Jesus jno dacajnaquéode údi ome ore uje cho ore quique:
Ga Jesus acajnaquéode u unojo ome anírone danguresórone uje cho ore quique. Chojninga: “Que arajáyo yacajnaquéode unojo mu a jé diga arajayo jne.” Mu jec ũré enga chise diri uje ore chiraja, ga ore chejna guesi enga ore chojninga: “Jesus á, que qué yirajágopo bacajnaquéode gotique rĩ.”
Enga chojninga uje chejna dacajnaquéode udojo guesi uje cojñone chi ore chujé dirome ga: “A ajnuso jóroque yu dirome. Que toc jeta que amóñopo yu gotique rĩ,” mu chojninga, “A uacamóño yu jne,” chojninga.
Jesus uruode tocade nanique ome úringai chuque:
Mu jé ũré Jesus, uje chi cojñone chujé ga ore chijóchame, ga que ore chimopo gotique rĩ. Mu chi Jesus ecapo rĩ enga e chiquetapo raja dacadigode uñane rĩ iji guiguíjna ajénique udojo uñeque. Ga jogadi tu uje ore irasigapo re rĩ.
Ga Jesus acajnaquéode u udojo ome yoque uje que uyoque gotique, Jesus chi acadigode u nanique, mu jé udojo qui uté Dupade Uruode jeta yingongo ñane. Jesus chiqueta raja origuíjna ajei uñai te ga, ore irasigápo re rĩ uje ore chimo Jesus. Ore chingo ñane, ore chingo Dupade anguresórone uje Dupade ujnacari casica e dépoi ore ujade rĩ. Que yimo jeta guedosírigo a gare, uje déji ore gari uje chi Jesus ecapo nanique rĩ. Ise ga ca potigayaquérique dépoi rĩ ome anírone jnani bajade, Jesus anguresórone. Que yiraja jetiga 40 dirode uje chi Jesus déji ore gari, dacadi casodica ore gari, iji ore iguíjnane, ore aquiningane ga chi chiqueta raja ore.
Jesus chiqueta raja danguresore jnani gárode udore uje e ecapo rĩ:
Iji taningai Jesus ga chi ca ore chiraja go. Taningapísi u uje chi Jesus chiqueta raja jnanione ore uje qué ore catecãri ñane ome Jesus ga chi ore chojninga: “¿Jesus ucacasica ya? ¿Chamo jóroque gotique uje ore chujé ica? Ipesute uyoque ica múñi.”
Mu Jesus chi e chiqueta raja ore ga chi chojninga, “Jé uacojñane ¿gotígo a?” chi chojninga Jesus.
Mu ore chojninga: “A jé ca adute to uje ore chujé yoqueduguéjna case Jesus, ga que jé imóngopo go, ga a ca yimóngopo to jne rĩ.”
Ga Jesus chojninga: “¡Yiraja! Jé go uje a ore angurete gotique diríca mu ome dejnaréngone, mu jé ore chujé.” Chi Jesus uruode a udojo mu que ore chiraja Jesuse go uje catecã́ri ore.
Que Dupade jno orúdi to uje que ore i déji darujna aone go: (Apocalipsis 21:27)
Yoque gosi uje a yipótago yicoi Dupade Uruode ga yangácoi Dupade Uruode ga yirajágo quigode. Mu que yanguretágo Dupade Abi ga que toc jeta yirajágo jeta yijínango Dupade aja gaté. Que yirajágo yocúringárique Dupade aníri, jeoga yoquiquitique jeta Dupade di jne enga jno yocúdi, ga que yirajágo.
Yojningame: “Dupade á, yijo aja baruode. Yangári baruode ga yiraja quigode uje chi arĩapo rĩ. Yirate baradedie to ga yiraja baradedie uje yijñecacója. Yiji baruode ga yirãrája gai ga yiraja.” Ga a gosi chojninga jne: “Mu que yiraja gotique uje que bo yúdi to,” a gosi chojningaras ome Dupade.
Mu a Jesuse, Dupade, chajnai ga chojninga, “Mu bei que déji darujna aone to go. Que yiji orúdi to uje que ore i déji darujna aone go. Yiraja uje ore ijója yuruode ga ore tangári. Ore chirate yiradedie ga ore chiraja quigode. Ore chiraja uje ore catecã́ri yu, mu que ore changureta yu. Que yurúsãre ore i iji gaté ga que yiji ore údi gotique,” chojninga. (Efesios 2:8 aja 9)
Ecarai – Tobité, Bolivia – 1970
Marina de Morarie churúsãre Ecarai acajnaquéode udojo
