Dupade urásapísi doi jnumi jeta cháta raja Jesus anguretasórone: (Juan 14:16)
Dupade chojninga: “Yujnacarabi Jesuse di iji yu, mu a yirógape yurasade uñéngaja ore jne,” chojninga, uje chamáñaje chijnóra yoque gu.
Uje uacamóño uje Jesuse chi jnome erámi nanique uje jnoji jnumi nanique, ga jnome gatajnoquei ga chacája guei abujadie. Ga gusu yóguiji jnumi. Que qué Dupade uñeque dépoji yocajei.
Mu Jesuse chojningame danguresórone: “A yiji to jne. Yicai yiapade to jne. Mu que yipota jeta disijate uaque iji yiquigade. Enga a yiroque yurasade uñéngaja jnumi jne. Yapade irótique enga jeta u Docosõrasṍri. (Docosõrasṍri tu uje cojñone ore chojningame Consolador. Jé basa ayoréode yocuruode qui tu uje ayoréode chojningame posõrasṍri.)
Ga chojninga: “Yirógaja jnumi jne,” chojninga. “Enga a jecucha chaji uacari jne, dirode, dejade ore,” chojninga.
Dupade charase jnani bajade ore, mu chosõre yoque ga chiroque dajnacari Jesuse aja jnumi te rĩ. Mu ujnacari Jesuse jnome gatajnoquei nanique ga jé chirogapója yoque darasade uñai taja jnumi te rĩ. Enga i tu Posõrasṍri. Enga uacarajáyo uje unojo Dupade osõraquéode unojo ocoi ome yoque. Yojnicopo aja uté Dupade Ujopié Espiritu Santo rĩ enga yocosõrasṍri jé u uté iji dejade, dirode ore jnese. Ga chátaja yoque uje yoco yocáyugu ome cuchade, enga chisome dajopié ome yoque to jeta etoque yoc.
Ecarai chacãra dacajnaquéode aja gosi úringárique cucherãi:
Ayorérique, chequéraque ¿déji jeta ca chosóre datique? Uje chamáñaje ape gu, ujnacare gu. Uaque gosi changureta Jesuse, mu gosi ujetiga cha Dupade úringárique pangurete, mu que toc jeta uaque gosi úringárique cucherãi íjnonguiji Dupade. Úringai ayoré panguresṍri ome Dupade a qué déji. Jé uacamóño uje a ayorérique déji siñec, uaque gosi a ujnacanique a déji tóniñeque, mu uaque gosi úringai cucherãi que íjnoque iji gotique. Chamáñaje jé ape gu.
Ga adi jec u uaque gosi. A gosi cha Dupade mu uaque gosi úringai panguretasṍri que jnoji Dupade gai gotique iji Dupade idai. A yicai tõniñeque. A yajnico yoque nanique mu yocúringai, yocúringa casicai cucherác que jnoji yu gotique. Chamáñaje ore ujnacare yu gu. Jé ore ape yu.
Jé basája ga a yabi David a jnosi. Chicási tõniñeque enga toi, enga chicai punire quedéjnai. Uje yijócãre uje angoroneparigape. Mu que ayorérique déji siñeque ujeta chojninga: “Bape garãte u que, que etógapo ome ua gotique rĩ. Cucherãi unejángome ua.”
Enga jé adi u uje a yicai tõniñeque ome Dupade, mu Dupade ujnacare yu, ga que úringai cuchẽrac íjnonguiji yu gotique. Que Dupade cha yu gotique. Que cha timíninga yu aja quedéjnane. Mu uyu u uje yicai quedéjnane ome Dupade.
Enga unojo u uje uacarajáyo uje que toc jetiga ayorérique írique, anguretaretigai, íjnonguiji Dupade go. Dupade ijnoraquei que íjnoguiji ua go uje chijnóra ua. Jé basája David diosi ga yiraja yujnacarape ga, ujetiga jnacarape ga, que yirajápo gotique rĩ. Mu yiguiosode, yujo cucherane u uje ore chiraja. Enga que toc ujetiga íjnoque úringai cucherãc. Enga adi jec u ome Dupade.
Que toc jeta Dupade cha danguretasórone uyoque:
Dupade que toc jeta cha yoc. A yiya Dupade iroquéode. Que bangureta Dupade mu que cha ua to go. A aya Dupade adode gajnerĩ enga banguíra pajegátigai taja Dupade Ujopié tiji bajei. Yirajágo uje ayorérique a pojna daguiotique, daguiotóraque. A cho dáyugu re ga ajéngome daguiotodie jeta tibágapoi jeta taquirapoi ore to rĩ. Ga adi jec u uje baya Dupade adode, ga Dupade Ujopie chajo raja anire, pajei ajidé ga cho dáyugu re. Tajíja re. (Hunch shoulders from sadness).
“Mu gotique uje cha yu,” chojninga. Tajíja re iji bajei ajidé uje chajéngome ua, bapesudode cucha gajnarécho. Mu adi jec u. Que Dupade Ujopie íjnonguiji bajei gotique uje chamáñaje Dupade ujnacare ua gu. Tajíja re iji bajei ajidé enga cho dáyugu re, mu que íjnonguiji ajei gotique Dupade Ujopie uje ore chojningame Espíritu Santo. Que íjnoque iji bajei gotique. Jé cháji bajei ajidé. Cho dáyugu re iji. Baya Dupade. Babei erámi jogonórone cucha. Mu Dupade Ujopié que íjnonguiji bajei gotique. Chamáñaje Dupade ujnacare ua gu. Que toc jeta qué anoningase Dupade Ujopié iji bajei. Mu cho dáyugu re ga tajíja usodi bajei ajidéraque.
Yoquipotigué ayoréode, Dupade Ujopié Espíritu Sánto, chetaque ñane iji yocajéode: (Gálatas 5:13,16,17)
Uacarajáyo uje Dupade chijnóra yoque, ga ojningai tuné déji yocari iji de jnumi tuné. Uacarajáyo to uje Dupade chijnóra danguresórone enga ajéode u ujeta yiquérango iji adode enga yicoi iroquéode. Mu uacarajáyo uje ayoré yoc ga yicoi yocúringai ayoré aoi te ga erámi aoi te ga, pipotiguéode isai te ga, erámi jogonórone isatodie enga yoquedodie u uje chimo erámi. Yocaoi tu uje pota erámi. Chamáña gu uje ugúcoi erámi jogonóri pao gu.
Jé basája ga Dupade chi di jne enga na yógaja yocao ichai uje que tãratápo gotique rĩ. Enga unojo u uje que qué pipotiguérique, puru patáringa chisapo yóguiji ne jnumi rĩ.
Enga ajnusináño uje bangureta Dupade enga ajnusina uje que qué bájningarãpója ore gotique rĩ.
Jesute, Dupade, Espiritu Santo ore iguíjnai tu ua enga jé ca bepo báyipie jeta ojninga: “Yi jne enga yójiape yijódi to jne. Yi jne enga aníre, yo yurupatáringa jne. Yi jne enga yipojna yujórique ayoré.”
Mu baoi jnuteminóri ipotiguéode u unojo uje pota erámi jogonórone cucha. Mu yacaranguipis ome Dupade uje Dupade chijnóra yoque, ga chiroque dajnacari Jesuse aja jnumi. Mu ujnacari Jesuse jnome gatajnoquei ga chirogape uñai aja jnumi te rĩ, enga unojo u uje qué déji yocari iji deréjnane unojo jnese.
Jesus chi di jne enga jno yocúdi aja gaté:
Mu a chimo yoque enga jeta ugúcoi erámi jnese enga Dupade anguretasórone uyoque u uje jno yocúdi. Gosi ujetiga pota nóna yoque to jnenga, gosi changuretape Jesuse. Jesuse qué chijna yibijnani uje qué ugúcoji jnumi. Uje Jesuse chi di jne enga gajnui tu jeta goto edo simata ga edabi sudé déji dajogadi te rĩ.
Ga gosi a ca chojninga jne: “¡Ácayope ga yijína uaque to ée! ¡Ité áa! ¡Ácarape, yijína uaque to ée! ¡Yapáa! ¡Ácarape ga yijína uaque to ée!”
Mu Jesuse que uruode u gotique. Chojninga: “Piotiguéode qué u uje yiroque yirógode ore aja erámi,” chojninga. “Ujetiga ore chingo ore jne uje a yo yujuñame erámi te jne,” chojninga.
Jé uacamóño uje jnani bajade, Jesuse chiroque ore uje ore chojningame proféta. Proféta udore u uje ore chatata Dupade Uruode bajaque aja ore iquéode. Chirógaja ore nanique, mu que ore tangári anírone gotique, ore acajnaquéode. Ga uyoque yocajnúone jé u profétade ore uje yingongo Dupade Uruode aja ore, yocujode ayoréo iji ne jnumi. Enga ujetiga apota ajína yoque to jnenga, ango Dupade ujeta chĩro basijnaringuéone to. Enga na dajóningai taja ua to. Na pajei sereringai taja ua to. Na pijnoraquei taja ua to ujetiga apota ajína yoque to aja gatajnoquei.
Ayorérique toi ga pujnusiétigadaté jogadi tu ome daguiosode:
Yiraja uje ayorérique gotique a toi enga pujnusiétigadaté. Chamáñaje ore iguiosi cho jmíti-jmíti ome ore gu. Ga adi jé u uje Dupade a di jne enga piguiosode uñéngo ujetiga ca ore changureta to Dupade enga, a pujnusiétigai jogadi tu jne. Pujnusiétigai jogadi mu que toc ujeta qué pimongapo yocúringárique yoquiguiotique jne rĩ. Uacamóño ujeta gosode toi enga que yimóngopo ore gotique rĩ.
Jesus a chiringare yocai casodicai ore enga a chucué ore íode iji degode darujna ao:
Mu uje chi Jesuse di iji jnumi tudé enga qué chiringare yocai casodicai jnani bajade ore. Gaidi tu ujetiga qué chinóninga ore íringo. Jetiga ore uñéngo íringo déji daruja aode, pucuecaringuei gajnesórone to. Mu que ore déji ga pujnusiétigai jogadi e u ome yoc.
Jecute Jesuse chojningame darógode ore: “Acayoi erámi jnese,” chojninga. “Mu jé ca ajnócho uacaguidéraque gotique,” chojninga, “cachi uacarídade,” chojninga. “Jé ca ajnáño uacaplátaraque aja erámi gotique jeta boyo Dupade uruode údi,” chojninga. “Chamáñaje uacangureni tu yu,” chojninga. (Mateo 28:18-20)
Enga unojo u uje yirajágo ujetiga apótayo ajína yoque to jnenga, ango yocai Dupade to. Ga Dupade chĩrope basijnaringuéone. Enga anguretape Dupade uje qué ingome ua aja uje qué eca ua. Jé basa ga a yitoi jne enga ore déji, Dupade anguresórone, mu ore uruode qué u. Jé socaseti a toji gosi acajnaquérigo yui.
Mu yiraja uje ayoréode yocajneque pitoringai enga que yocuñeque déji siñeque jeta ca toi to jne. Gosi a chise deruei te jne, mu eruei tupúsu, ga eruei tupúsu uje que chimopo pucuecaringuérique uñeque rĩ.
Jecute Dupade uruode chojninga, uje Jesuse chojninga: “Gosi uje changureta yu ga,” chojninga, “yisíome pucuecaringuei ome. Pucuecaringueque ichai uje eyúgojma. Enga que eruénique cusapo gotique rĩ,” chojninga.
Yiraja uje jnacare ua enga barasique ua, ga chi unere anírone jeta basõre ome dosapéode, unere ujeta baque, ujeta anganare gapudie, unere ujetiga ajo bejnai. Enga bajos eti ca beruénique cus. Mu que yimóngo Dupade diringai.
Yiraja uje gapu ua ga barasé ua. Bangana erámone enga bajos eti jé bate jne, mu jé bate ujetiga apota Dupade. Ujetiga apota Dupade úringárique pangurete ga badi a jé u iji deréjnane gatuaque ujetiga angureta Dupade.
Jé basa ga jé a ijõre ua, mu a Dupade di jnenga cho dajuñame ua uje jé bajõrai tu Satanase. Bagaidi tu Satanase áyipiedie jnenga, báringai ayoré jnusiétaque jogadi tu iji Dupade guetei punire. Jecute yingome ua. Ujéta cáma angureta Dupade to enga anguretape uje qué piotiguei déji.
Jé uacadúcho to uje a Jesute diapo jne rĩ enga que qué piotiguéode déji to iji siñeque rĩ. Adi jé u ujetiga ayorérique chingo dojñaringo aja dojórique ayoré ga bangári. Chamáñaje piotiguei u gu uje bamo ojñasṍri. Unojo Dupade uruode ujetiga apota ga angureta Dupade enga anguretape. Jeoga iji dejai, jeoga iji dirome jne. Uje cáma yico. ¡Jeta yojningai u yu gotique jeta cáma yi! mu yojningai tu Dupade diringai uje Dupade di jnenga. Ujeta cáma di dirome enga cáma yico gotique, mu jé upo yu to rĩ uje cáma yi go. A yico to dirome iji domíngo jeoga iji miércoles. A uacarajáyo miércoles. Mu cáma yico to. Que yimo jeta cáma yico ome Dupade idai. Gusu yacajnaquéode ome yoque. Ga yicatecã́ri Dupade ome yoque.
Ecarai catecã́ri Dupade:
Yoque Dupade, yicatecã́ri ua iji gajnerĩ iji dejai udé uje yacaranguipis ome ua uje badute yoquicatecãraitigade, yoque Dupade. Uje yicatecãcoi ua diríca ujetiga ójnepe guéode yoquibai diríca, yoque Dupade, jecute yacãre babai gajnerĩ ome baramurajane guéo. Ujetiga jnanione ore irasique dacade cucha gajnerĩ. Ujetiga ijóño yoque, yoque Dupade, enga ore catecã́ri ua gajnerĩ, enga ore chacãre babai to gajnerĩ uje bajnóra yoque gu. Uje bamate guéode yoquibai, yoque Dupade. Ga ore irasique dacade gajnerĩ enga ore tagu áriguiji gajnerĩ.
Enga jé adi tu gajnerĩ ujetiga ore irasique baruode ujetiga ore tagu. Jecute yicatecã́ri ua gajnerĩ ujetiga arodipise yoque gajnerĩ iji ne, Rincóngosode uyoque. Ujetiga átaja yoque gajnerĩ enga asíome yoque pijoningai tome yoque gajnerĩ, yoque Dupade. Asíome petotiguei tome yoque, gajnerĩ, yoque Dupade. Asíome pijnoraquei tome yoque. Uje yicatecã́ri ua ome Jesus i. Amẽ.
Ecarai – Rincón de Tigre, Bolivia – 1960
Marina de Morarie churúsãre Ecarai acajnaquéode
