Ecarai chacate yogome erámi taningai:
Ga chi Dupade chajire dapesudi erãpe nanique ga ueradéjna. Adi jec u uaque gosi. A gosi
chirase dejnai ga chimate ga ueradéjna ome.
Mu Dupade chojninga: “Cáma yacatique cucha déji,” chojninga. Chaca cuchade. A chaca picadéode. Chaca esodie, chaca cucha pibosode iji erámi udé údode. Ga chajire dejnai, mu acade cucha a e sue enga adie cusapo rĩ. Mu chojninga: “Yimate yacade cucha adie mu cáma gunónique cucha sue to,” chojninga.
Bajaque cuchisode uje Dupade pésu:
Mu uacarajáyo uje Dupade pésu dejnai gu ayoréode uyoque, cojñone uyóguiji erámi. A chojninga: “A yipésu cuchisode.” Mu cuchisode unojo cuchisode ga que chiraja darárique. Que chiraja cuchárique.
Ejo ayoré gajnámi uje Dupade pésu nanique:
Mu Dupade chi pesapo dajéode rĩ. Chi chipocásu jnumi enga pésu ayoré gajnámi tiji uje a e uacadúcho jõ, a ore chingo uac, don Juan ore. Chi chimániráse ga chimanipise aja dadode ga chimate edodie jogadode, chimate angoniguinone jogadode, chimate jmainie jogadode rĩ. Ga chi chojninga: “Omi tu ujetiga uecaringuérique déji ajei.” Chi doi ga chubúchu pijnani. Ga e noña ga e ayoré. Mu uacarajáyo uje Dupade pésu ayoré tuné gu nanique ujetiga ayoré tuné doi uru quigode, jetiga tangári.
Gajnáreque ome Dupade uje gusu ayorérique enga doi ga pésu acoté ome:
Chi chimate. Ga chi chojninga: “Ga gajnáreque jne, uje gusu ayorérique jõ uje que chimo dagutiyamátique,” chojninga. Que chiraja jnani bajai acoté iji cuchisode. Mu chi diga Dupade chijna moi tome yocai, jnani bajai, Adã, ga chi mo ga moi chujé. Dupade chijnime orotabidi pei ga pésu ayoré tiji ga chequé. Ga chi chojningame yocai jnani bajai: “Imate bacoté.” Que chojningame gotique bacoté, mu chojninga, “Yimate bajõra, ujetiga nóna ua enga átayo cucha pisagode aja ñane,” chi chojninga. Jec ũré uje chequedíe déji gu ujetiga ore cháta cuchade aja damaníngo.
Pangoninguite paritigade chise erámi nanique:
Mu uacarajáyo to uje pangoninguite paritigade chise erámi, enga ore que ore tangári Dupade uruode dirome.
Chi chimate ore ga chojninga: “Yejnai tuné,” chojninga, “Yejnai tuné. Acho uacajegaitígo iji,” chojninga. “Yacadie esodie déji dé,” chojninga, “Yacadie ijnaque quedéjnanie adie,” chojninga, “Picadéode adie, acho,” chojninga. “Mu jé ca acho cucha a uña to,” chojninga, “uje yarángome uaque.”
Mu que yirajágo írique to mu a Dupade gãranenie u anírenie, cucha adie uje ayoréode yajo to nanique ujetiga ayorérique tagu ga toi. Chojninga: “Acho jne. Mu ca acho cucha a chojmara uje déji uté yejnai tudé gatócoro iji ta,” chojninga.
Dupade gãrengué chojmára nanique jeta ca ore tagu:
Mu uacamóño uje yocaté, chequé bajé tagu Dupade garengué a enga jec u uje pangoninguite paritigade e chacája yoc. Pitoringai e chacája yoc.
Jé uacadúcho don Carlos acajnaquéode to uje chojninga: “Pitoringai ipotinguerãque ga pota ayoréode uyoque ome daquigade.”
Chi ore tagu Dupade gueranenie cucha ai. Ore irasei. Ore irasique re. Mu chi Satanase chaca ugai ga a pésu re ga jnacare ueradéjnai. Uacamóño uje yingome uaque diríca. Enga gapúa tuaté que todo uje chamáñaje ayoré jnacare ueradéjna gu.
Satanase chetingãre Eba:
E chojninga: “Ebá, Dupade gueranenie déji bei ujetiga acho.”
Mu chojninga: “Dupade gãrengué chojmára ujeta ca yajo to. Dupade chãraque gu.”
Mu chojninga: “Ebá, ise ga tágape Dupade,” chojninga. “Jecute Dupade que pota ujetiga arajáyo cuchade jnese,” chojninga. “Dupade charángome uaque. Charatáyime uaque gu ujetiga arajayo to cuchade,” chojninga.
Enga chi chojningame yocaté, chequé bajé: “¿Jé go, que agu a?”
Mu chojninga: “Que yagu go. Dupade chãraque ga que yagu.”
Mu que jno unojo údi gotique. Obiréjna uje ipotingarãque uné enga jno cuchade údi.
Chi Satanas chingo: “¿Jé batodóningai udore iji deréjnai? ¿Jé unere ome re adie?” chojninga. “Jé uacamóño anírone cuchade adie sẽrerãja jnumone ga ipotinguerãcho.”
Chi adie idógosi jnumone (colgando para abajo) ga ipotinguerẽ ome uaté, yocaté Eba.
Chi chojninga: “Dé udire jõ. Enga jec yagu jã,” chojninga. Mu chi chojninga: “Mu chi yajo diríca, chi yitogoi dirome, Dupade chojninga.”
Satanase cho ãrapataquechoqui iji Dupade:
Mu Satanase chojninga: “Taque Dupade. Uacamóño uje charatáyime uaque gu ujetiga arajáyo cuchade to,” chojninga.
Mu jé ũrepise Dupade uje, jé ũrepise Satanas uje, a ca yajo cuchade adie unaji ga que yimóngo pajei gátigárique go. A jé yoquirasique ñane. Que pajei dotáningánique déji yoc. Que yajéngome yocúringárique choquíbi. Mu yajo unojo ga jé Satanas píode déji to ga jé u uje yirajágo cucha sijnángone.
Ga chi chojninga: “Qué yagábu gajnerí.” Chisa a. Chétingãre mu uneréjna. Mu chi chojningame dabai, yocai jnani bajai, “Boji ti. Agu to á,” chojninga, “Enga jec ũré uneréjna. A Dupade chãra yoque,” chojninga, “Uje chãraque diríca,” chojninga.
Uje ore tagu Dupade gãrengué a, enga quene ore chiraja uje choquíbi ore:
Ore tagu. Mu chi ore chojninga, “Jé go uje choquíbi yoc,” ore chojninga.
Mu abai chi chajire re to enga chojninga: “Jec ũré, choquíbi yoc,” chi ore chojninga.
Ore poté tudaque cucha a u uje ore chiraja uje choquíbi ore; ore chiraja pajegátigade.
Ga chi chojningame dacoté: “Yico a. Yipésabu yocoitígo.”
A ore pésu doidode udé ome cucha acarane, acarãque ejnúmeone udore. Ujnoro quedéjnanie uje uacamóño ujnoro quedéjnanie ojodie uje ejnúmecho. Ga ore chugája ñane enga ore pésu doidode iji.
Mu chi guedé jno enga ore chudute Dupade pijnane. Chi chojninga: “¡Adã́, qué yibágui uaque é!” chojninga.
Mu chojningame dacoté: “Boji ti. Yico. Dupade e di,” chojninga.
Chi ore doi poridie uéchade enga e ore chacose re. Enga chi a ore chojninga: “A ca Dupade chimo yoque gajnerĩ. Chamáñaje acoco yoque gu.”
Uacamóño uje a yacose yu una uéchai enga uaque gosi que chimo yu. Mu Dupade ¡cho jetiga ca chimo uaque go! Adi jé u uyoque uje a gosi pógu date gajnarétigo mu Dupade u uje chimo cuchade, cucha pipoguiédode.
Dupade chajna ore aja ore acoyapídi:
Chi jé ore chajo rája dacoyapídode enga, mu diga Dupade chajnapúsu ore aja.
Chi chojninga: “¿Dupade ta uque e?” chi chojninga. “Jé go uje a Dupade u que,” chojninga, “Jé go, jé Dupade a u,” chojninga.
“Yugúcoi ne,” chojninga, mu cachi ore urúo. Cachi ore urúo uje chi gaidi tu ujetiga ca Dupade chiraja ore anírone, ore ipesudode cucha gajnarécho. Ga chiese ore tṍra re ome Dupade.
Jecute ore chojninga: “Jé go, a Dupade u,” ore chojninga.
Chojninga, “Ugúcoi ne,” chojninga.
Enga yirajágo uje a bajéngome cuchade gu uje pisijnaringuei chisa ua enga e bajéngome cuchade.
Chi ore chojninga: “Ugúcoi ne,” chojninga. Chi chojninga: “Ugúcoi ne mu yacóco yoque que uje choquíbi yoque gu.”
Mu chojninga: “Ise ga e acho yarengué cucha a. Jecute uacapócho uaque,” chojninga.
Mu chojningame Dupade: “Dupade, e yagu. Berané chequé chisiome yu ga yagu to,” chojninga, “Uje chojninga, Adã, agu to.”
Mu jé ũrepise ujetiga bacoté ca changureta Dupade enga a jé ca áta ua aja ipesutígo cucha gajnarécho ujeta angureta Dupade. Bacoté ujetiga ca changureta Dupade enga jé ca arate uaté aja ipesutígo cucha gajnarécho.
Jecute uné jnani bajai uné a ca tangári dacoté uaté enga a ca Dupade chisírasome pitoringai tome to gotique.
Jé basa ga ujetiga bacoté changureta Dupade enga jé ca ajocase úringai Dupade irajato gai. Enga ujetiga Dupade anguretato ua, enga ca áta ua aja babai ipesudode cucha gajnarécho, angoninguite paritigade.
Jecute chi ore chojningame, unojo ore: “Yajo cucha adie, bãrangué. Jecute yipójo yógome ua,” ore chojninga.
Dupade chijócãre ore iji dajutícabia:
Mu chi chojninga: “Yiraja. Uacacho,” chojninga, “Boyo enga acayoi tõniñeque tiji yejnai. Ca acayopo aja ne jne rĩ,” chojninga.
Ore jno ga ore cho dáyugu rágaja dajesúode. Ore educacho aja dajesúode uje Dupade cha ore.
Mu Dupade que cha ore go, mu qué pesapo dajéode ome ore to jne enga qué chijnapo ore aja daniri rĩ. Chi chojninga: “Jé ca boyo jne maringa,” chojninga, “mu a ca achopo uacabotique bisideque jne rĩ,” chojninga.
Uacamóño uje Dupade chisi ome cucha adie ome ore ujetiga ore tagu ga cáma ore chisa dejórigo ujetiga ore cho paráguiji usodi ujetiga ore taque enga ore moi damochádode.
Dupade cho darúja ome ore enga chisi ome pitoringai ome ore, jé aja pisaque etógode ore:
Mu chi chojninga, cho darúja ome yocai jnani bajai. Jec u uje yitogoi ga e u Dupade uruode.
Chi chojninga: “A qué aque jne mu a ejna baguesi ome cucha pisagode bajaque,” chojninga.
Enga jec ũrepise Dupade uje ayoré casodicaite, que ore taque bisideque go. Ise ga uacuñeque chiraja to uje ayoré casodicaite uyoque que yajo bisideque go. Jé ũré yu uje que ayorérique déji siñeque ujetiga taque bisideque. Ayoré casodicaite ore taque jne mu qué ore báguiji erámi. Ga unojo u uje Dupade cho daru ome yoque. Que chisiapo ome yoque cucha pibosode rĩ jeta cucha pibosode diapo iji yocajei bisideque gotique rĩ.
Uje cucha pibosode u yocade ore. Yacorenie chiraja uje yujégo enga ore chayome yoque ga que ore diguiji yocajei go. Jé basa ga a que yipéco cucha gajnarétique tiji ome Dupade nanique, enga yacorenie, yocade diguiji yocajei enga yajo. Enga ayoré casodicaite gosi báguiji erámi. Que chimo cuténique míraque ga chaguhéode ujuya ga cho jõ. Cho caru ome erámi isagode.
Jé basa ga cojñone unojo u to. Cojñone, ayoréode que taque bisideque go. Ore chejna daguesi ome darosónique cojñoque iroquérigo, jneque tagu to mu (más tarde comerán).
Ga unojo u uje Dupade cho daru ome jnani bai ga uruode unojo uje chojninga: “A gajnetui yore babai,” chojninga, “quigade eti baque to,” chojninga.
Dupade cho daru aja chequé bajé Eva:
Enga cho daru aja anire, yocãrapié chequé bajé.
“Iraja,” chojninga, “uje báyipie, bajei gaidode a babai u,” chojninga, “Bapotiguéode gajnengóri tu babai,” chojningame. “Mu a uacatígo cuse jne,” chojninga.
E cho darú ome yocaté chequé bajé to. “A uacatique jne, mu qué baraja ũrosoringuéone,” chojninga, “Baraja ũrosoringuéone enga que toc ujeta batique tocádiji ua bisideque,” chojninga.
Ga unojo uje yirajágo uje Dupade guerãtique cucha gajnaréngone ome yocayode jnani bajade uje cho daru aja ore.
Dupade cho daru aja erámi:
Quigade ga cho daru aja erámi. Chojningame erámi: “A bojnatígo cuse jne,” chojninga. Dupade guejnai chi gusu anírone nanique, acade cucha, cucha a. Que cucha ojnatique déji to. Mu catáguedie déji ayoréode yoquejnane. Mu Dupade cho daru aja jnumi ga chojninga: “A bojnatígo cuse jne,” chojninga. “A ojnacúco,” chojninga.
Ga quigade uacamóño uje que ayorérique guejnatique déji siñeque jeta ca catágueraque déji. A ca déji siñeque jetiga ca ojnacúcoraque déji. Ojnacúcodie déji erámi jnese uje Dupade cho daru aja erámi.
Enga unojo u uje yirajágo uje yocayode jnani bajade ore angoninguite paritigade u uje Dupade chetaque yoque.
Dupade cho darúja ore, mu qué chijnóra ore:
Mu quigade unojo enga Dupade chi chucué dajéode iji gatajnoquei. Chojninga: “Yipesudi casodicaite uje yo yuru aja ore, yijnorapise ore ome yu,” chojninga. “Yijnorapise ore ome yiquigade ujetiga ore nóna yu,” chojninga.
Chojninga: “Yi jne enga, a yiroque yujnacari Jesute aja jnumi te jne enga chingo ore jne uje qué yijnorapise ore,” chojninga.
Enga jec ũré uje Jesute chi di iji jnumi nanique mu yoquisijnaringuéone chinguírapo iji jnumi te rĩ . Enga yoquisijnaringuéone u uje jnani bajade ore chajo aja curesei. Enga unojo u uje Dupade, yoquetetigade qué chajo raja ome Dupade. Enga yoquisijnaringuéone, disi ejode uyoque, jé aja Jesuse irabade ore, ore chajo aja curesei. Mu unojo quigade enga Jesus ecapo iji dáringai toque rĩ enga e uacarajáyo to uje que Dupade cha yoque gotique ome dajnoratiguei. (1 Pedro 3:18)
Ecarai – Rincón de Tigre, Bolivia – 1970
Marina de Morarie churúsãre Ecarai acajnaquéode nanique
