Jnani bajai eduguéjna cuchábi David isijnaringuéone:
Eduguéjna cuchábode ore isoca nanique iji esoi eruei ga ore doi pocaningane iji uté. Mu iji esoi eruei uñai ga David que nóna dasoldádode to, ga chiroque dasoldádode ore eduguéjnarique Joáb aja pocaninga yui iji dajogadi. Mú David chácare iji Jerusalen.
Dejaque uñai ga David que mo to iji dejai ga doi jnumi iji damochápi gai ga chisõre iji daguíjna cuchábi ójo. Mu uje David chajire erámi iji daguíjnai ójo mu chimo chequé. Chiroque daroi taja uaté yui jeta catecã́ri uaté ome amanique írique.
Iroi diapo rĩ ga chojninga: “Chequé uaté chi i tu Betsabé, ga uaté abai i tu Urías.”
Ga David chiraja uje Urías e jnome pocaningane. Jecute David chojningame daroi: “Be ga abágui chequé uaté ga ajínaño aja de.” Uje ore di uaté údi ga David moji gari enga jé u uje uaté chajniapo aja daguíjnai te rĩ.
Mu chequé uaté e abi déji ajei enga chiroque daroi aja David yui jeta chingo David uje David ica uaté ica. David churúsãre darusarane ome dasoldádode eduguéjnai Joáb enga urusarane chósi te: “Joáb, acha Urías uté aja uaquesórone ore yúpisi to, ga gusu uté iji dayaritique jne ga a ore chujé uté iji dajocaningai uté to jne.”
Uje chudute uje chuque Urías, enga jé u uje chijnapo acoté aja daguíjnai rĩ, enga cho dacotépisiji uaté. Pogu dasijnaringuéone, mu Dupade chiraja.
Dupade chutṍri profétarique aja David uje uté i tu Natan:
Ga Dupade chiroque daruode júsõri Natan aja David jeta chajmita. Uje Natan chise ga catecã́ri enga chojningame: ‘Angarami yuru quigode udojo, David á, uje a qué yatata jnani gáningo ore ome ua jne uje ore idai jé chojmára. Ga ugucharãque uñai, jé jmátaque uñai. Ugucharãi gachidedie jiei ayasai jiei. Mu uté pota jnani jmatai gachidábi enga chijna iji gari. Que gusu uté mu, doi ga chujési enga tagu to.
Uje eduguéjna cuchábi David chudute Natán ojñane enga ajningaranguipise. Enga chojninga, ‘¿Írique ugucharãi uté?
Natan chajnai deduguéjnai uruode enga chojninga: “Ua u ugucharãi uté.”
Uje chudute Dupade Uruode júsõri uruode enga jé u uje chiraja uje Dupade chiraja uje chijna Urías acoté iji gare. Enga jogadi tu uje chatata date gajnaréngone quigode ome Dupade. (2 Samuel 12:1 aja 13 ore)
Natan chuchẽre David isijnaringuéone aja guesode:
Natan tibágui David nanique enga cho dojñame udojo nanique ome ayasabia, uje chi ugucharái ore chujé jmatátique gachidabia ujetiga ore tagu, mu chatata cuchade udore gu ujetiga chuchẽre David isijnaringuéone aja guesode, uru pataringane ore. Ga David, jnani bajai, aníri uruode u unojo uje chajniapo Dupade gai te rĩ. (Salmo 51)
Ecarai cho quique jeta gosi chudute Dupade Uruode enga doi ga tangári to:
Yajirigode ome uaque urásu unojo Dupade Uruode uje chojninga: “Ujetiga adute Dupade Uruode enga be ga angári,” chojninga. Que yirajágo ujetiga yudúco Dupade Uruode mu obiréjna uje udúco Dupade Uruode uje Dupade Uruode chise yocajei. Enga yujnusínango Dupade úringai aníri piquetangore. Yoquiquetangóri chojninga: “Jé ca ajuru bangoninguinone gáyode,” chojninga, “mu be yuruode, ga angári.”
“Que uruode gotique, pijnáringo,” chojninga, “jé ca ajuru bangoninguinone gáyode,” chojninga. “Be Dupade Uruode, ga angári,” chojninga.
Yiraja uje udúco Dupade Uruode iji deréjnane jnese iji yoquidai uje icoi Dupade Uruode, mu a ca yudúco go. Jecute a pisijnaringuéone chise yoque, uje a Satanase chetingare yoc eti a qué yuducópo Dupade Uruode rĩ. Mu Dupade Uruode chingo yoque unojo uje jnani bajai uje chingo raja uje chujé gapua abai, enga jé uacamóño uje chi chujé gapua abai. Ga pógu jóronga dasijnaringuéone. Pógu jóronga dapesudode cucha gajnarécho, mu Dupade chingo uje ujo ayoré chuchẽre ipesudode cucha gajnarécho aja guesi, ga quene cho dáyugu re. Mu chajniapo Dupade gai rĩ iji deréjnai uté ga uruode u udojo uje chojninga: “Osõre yu, Dupade á, uje a jé yi anírone. A jé yi bosõraquei quigode,” chojninga.
Yirajágo uje ayoré a chosõre dojórique ayoré, mu gusu uje chosõre ome posode. Mu Dupade u uje que gusu gotique uje chosõre ayoréode yogome yoquibosode. Que gusu ga chosõre yogome yoquetotiguei. Jecute jnani bajai David chojninga: “Dupade á, jé be bosõraquei isocade ome yu. Bosõre ayoréode uyóguiji erámi,” chojninga, “Enga ãrope yisijnaringuéone gajne rĩ,” chojninga.
Isijnaringuéone unojo, jé basa aníri, ajei noñaringuéone u unojo to. Jé basa ga ipesudode cucha gajnarécho unojo ga gadioque, jnani bajai David ipesudode cucha gajnarécho. Chiraja Dupade Uruode, mu que tangári; moji gapua gari uje abai cuse; mu uje chiraja uje jeque uaté enga chiroque abai aja pocaningai jeta chuque ome orumajosórone. Mu David chijócha Dupade ajei údi enga chojninga: “Dupade á, ajnusina uje posõraquéode garani tu ua,” chojninga, “Enga ãro yisijnaringuéone gajnerĩ,” chojninga.
Dupade Uruode qui tu ujetiga yicoi enga yujuco yocangoninguinone gáyode ome Satanas uruode:
Umare unojo David uruode uje chingo raja uje pésu cucha gajnaréngone ome Dupade nanique, mu yajirigode u unojo uje Dupade chingo daruode. Chingo yocai jnani bajai, ga chojninga: “Adute Dupade Uruode ga,” chojninga, “jé ca ajuru bangoniguinone gáyode,” chojninga.
Yiraja uje yudúco Dupade Uruode iji dirode jnese, iji dejade rĩ. Mu yoque gosi que chudute Dupade Uruode, ga a Satanas chetingare gosi. E doi ga, chojninga, Dupade Uruode que qui u gotique. Mu Dupade Uruode qui u uje chojninga: “Ajuru bangoniguinone gáyode ome Satanase aníri uruode jetiga catecã́ri ua.”
Dupade chiraja iji yocajei ujetiga jec ũré yanguretágo Dupade enga chacacãre danguresõre ũréone:
Yirajágo uje Dupade cho yoquiquique iji anírone unojo daruode. Chojninga: “Ujetiga bayé Dupade,” chojninga, “catecã́ri ua, jé ca etaque,” chojninga. “Ujetiga bojórique ayoré changureta ua ome cucha urõsode, ga ca etaque ua ome anguretaretigade,” chojninga. Enga jé ũrépise uje a amate ua iji uéchai enga jetiga bojo ayorérique changureta ua ome cucha daté enga báringai picotaque jogadi tu. Enga adi jec u ome Dupade Uruode uje Dupade Uruode chojninga: Dupade chosi yóguiji gaté. Jeta Dupade changureta ua ome dadode jetiga etoque ua iji uruode, ga Dupade chosi ua aja gaté. Jé basa banguretaretigai tṍraji uruode. (Romanos 10:17)
Ujetiga angári Dupade Uruode ga, a Dupade doi baníri tenga pésu uaque enga que qué uacamóño cucha gajnarétiguiji. Que amóño sequeré noñángueraque gotique. Que yiraja Dupade Uruode ojningai te iji antiguo testimento mu a Deuteronomio u uje Moises chojninga: “A pacacãringa babai jeta ca pijógome ua jne.’ Enga Dupade Uruode qui u uje chojninga: “A pacacãre uaque enga iji uacaniri enga que amóño sequeré noñágueraque gotóraque. Chacacãre bádode iji bajei te ga ca amósi disi gajnarétique iji bajogatique,” chojninga. “Chacacãre gachidode aquirájnarique. Bachidérigui a querénga doi ga ca atique gajnareque gotique,” chojninga. “Mu u ujetiga angári Dupade Uruode,” chojninga.
Mu quigade ga chingo Dupade guetétigade ome ore uje chojninga: “Mu a Dupade aníri chetaque badode enga que amo sequeré omé ome ua gotique,” chojninga. “Que amo disi oníngo ome ua,” chojninga, “Que amo aquirájna ueradéjna ome ua gotique. Que bachitique cus jeta chijna gotique,” chojninga.
Ga ojningane jé u yoque to. A yipéco cucha gajnaréngone uje udúco Dupade Uruode enga ipéco cucha gajnaréngone, ga Dupade que chise yocunétique ga que chisi ome sequeré omé ome yoque go. Jé uacamóño uje ise ga Dupade chudute yocuruode iji Tobité rase nanique. Que imóngorase sequeré gajnaréngome yoque to, sequeré gajnaréngami iji yoquejode. Mu Dupade jé cháta raja yóguiji Tobité nanique ujetiga ca imóngo sequeré noñángueraque. Chamáñaje udúco uruode. A ca yirajágo yocúringai ayoré Dupade anguresóño mu Dupade chiraja iji yocajei ujetiga jec ũré yanguretágo Dupade. Enga ojningai tu uje a chacacãre uaque enga que amóño sequeré noñángueraque, que amóño disi noñátique ome uac. Que amóño cochagájna ape noñangue ome uaque, chojninga.
Jéta yetájo yocadode aja Dupade enga yoquisocai tu yocai jnani bajai David:
Jé uacamóño uje jnani bajai David chingo raja Dupade uje chojninga: “Dupade é, osõre yu ga osõre yu ome bate goningane enga a yiji badode,” chojninga. “Ãro yisijnaringuéone. Ãro yate noñáringuéone,” chojninga. “Ãro yáyipie aja jnumi enga ichapise yáyipie,” chojninga. “Ãro yisijnaringuéone aja jnumi ga yujnaringone jé ca ore chiquetápo aja yu to,” chojninga.
Enga jec ũré ujetiga yudúco Dupade Uruode ga jeta yetájo yocadode aja Dupade enga yoquisocai tu yocai jnani bajai David, eduguéjna, uruode uje chojninga: “Ajocase yisijnaringuéone edodie iji yiquéode,” chojninga, “Enga a ca yimopo pisijnaringuéone ome yu rĩ. A ca yimo betétigai iji jnumi,” chojninga.
Enga ojningane u ucode ujetiga yudúco Dupade Uruode enga a ca yicoi ga yetájo. Mu a yetájo Dupade Uruode jne enga ujetiga yajógo yógaja yoquisijnaringuéone, jeta qué yicoi jnani bajade uruode, ore acajnaquéode ome yoque ga, jec u uje Dupade chisi ome sequeré noñánguenie ome yoc. Chisi ome chaguhéode ome yoque. Chisi ome dequejnaréngone ome yoque.
Mu jnani bajai David chojningame Dupade: “Dupade, posõraquéode garani tu ua,” chojninga. “Osõrape yu,” chojninga. “Ãro yisijnaringuéone ga be pamatadéraque ga anguíra yisijnaringuéone ga a ichapise yu, yajei ore tome yurádie, pamatadédie ore,” chojninga. “Anguira barádie aja yisijnaringuéone iji yajei te ga ãropisi ga que yimopo pisijnaringuéone iji yajei rĩ,” chojninga. “Ãro ga anguira yurádie, barádie, ga yisijnaringuéode jogadode sué ébedíe gáyode ome úringai póroropise,” chojninga. “Baradie ujetiga churu yu iji,” chojningapo rĩ, “Apésu yu ga amare pininaquei taja yajei,” chojninga. “Apésu yajnoquéode aja quigode enga etógapó yu rĩ.”
Guillero Gill o quigode ome Ecarai, ore nanique:
Yacajnaquéode unojo gajnesṍrone jé u uaque, mu jé yajnécho to. Uje yipésu yisijnaringuéone to diríca.
Jecute yingome yoc uje eduguéjnane iji erámi iji dirode gajnerĩ uje ore chingo yu ujetiga yajire David, jnani bajai urusarane iji Salmos 51. Uje pioi poti Guillermo chingo yu ga chojninga: “Davidé á, ayoré quedéjnane ore doi dasijnaringuéone. Que ore chiraja gotique gu uje aníri Dupade chetaque pisijnaringuéone,” chojninga. “Uñáraque ga chingo yoc uje chiese yicoi Dupade Uruode iji yocajei, jé basa yocaoi u uje yipéco cucha omone ome,” chojninga. “Mu a cachi uaté ca chiraja Dupade Uruode quigode gu uje yocaoi u uje jecucha pota pésu cucha gajnaréngone.
Mu pioi potábi Guillermo chojningame unojo quigode gotique: “Ujétiga apésu cucha gajnarétigo ga be aníri jnani bajai David uruode uje chojninga, “Dupade á, posõraquéode gajnengóri tu ua,” chojninga, “ãro yate gajnaréngone,” chojninga, “enga anguíra barádie aja yisijnaringuéone jogadode enga pórorapó yu rĩ,” chojninga.
Que yimo ujetiga Dupade urátique cuse, jeoga pamatadé gajnúraque déji, mu chingo yoc uje churu yóguiji yoquisijnaringuéone jnese. Eduguéjnai David chiraja uje sacerdóteode ore hisópo cuse nanique. Enga ore chaca hisópo iji cuchisode iyojna enga ore chuta cuchade ujetiga chinoningase ore úringane noñácho enga imoi tu uje e ujñapetei. Eduguéjnai David pota dáringai ujñapetaque to, jecute chĩ́care hisopo iji Salmo 51 nanique. Mu Crísto tẽra re enga uté iyoi e u uje chĩro yoquisijnaringuéone.
Ga Dupade chĩro David, jnani bajai, isijnaringuéode. Guillermo chojningame yu: “Acacho uágaja David, jnani bajai, uje Dupade chinguíra urádie, hisópo, aja isijnaringuéone jogadode enga pesapo ga sue anírone gai rĩ, ébedíe gai. Ébedíe jé póroro erámi tome, enga uje Dupade chĩro pisijnaringuéone iji gosi enga chimate jogadode,” chojninga, “enga pórorapó rĩ.”
Jecute, yocujode Dupade anguresṍrone uaque, Guillermo chojningame yu: “Yiraja uje ayoréode uyóguiji jnumi ga yucuegode u cucha gajnarécho. Satanas chingo raja aníri ujetiga chetingare gotíguiji yoc,” chojninga. “Gaidi u gu ujetiga jé ca yidójningacópo Dupade Uruode rĩ,” chi chojninga. “Be ga aya cucha gajnaréngone enga acai tonuñeque ome,” chojninga Guillermo ome yu. “Dupade anguresórone yocajné tu ujetiga jec ũré enga ipótago Dupade Uruode enga yajico David, jnani bajai, urusarane ome yoc uje chojninga: “Dupade á, ãro yisijnaringuéone. Aru gajnerĩ ome baradie, ba-hisópo, yisijnaringuéone,” chojninga, “enga íjnoque jogadode,” chojninga.
Enga unojo chingo yu, don Guillermo, uje chojninga: “Adójninga uje Dupade pota jeta chijna ua aja daroquéode nanique. Mu be ujetiga apota Dupade Uruode úringai patataque enga aya basagode iji erámi tudé. Adi u jnani bajade uje jnani bajade ore chicai tonuñeque nanique ga gusu iji erámone,” chojninga. “Enga yoquetesṍri, yocumajosṍri doi jnani bajade ore to enga chetingare ore,” chojninga.
Jecute yingome uaque don Guillermo ojningane, acajnaquéode ome yoc ujetiga yidójningáco uje que yocajnécho jnese, mu yajnécho, ga jé ingome yoc. Uje David, jnani bajai, chi charatáyime anire gapua iji uté uje i tu Betsabé. Que gusu uté mu chujé uaté abai to jeta pógu dasijnaringuéone uje moji uaté gari bisideque enga ica déji ajei. Mu Dupade chiroque daroi Natán aja enga Natán chingome isijnaringuéone ome. Uje chingome enga David cho dáyugu re. Enga chajniapo Dupade gai te rĩ.
Enga don Guillermo acajnaquéode u ome yu uje chojninga: “Uacojode ayoré uje acatecãchoi Dupade ome ore ga osṍcho ore, enga ca ajéngome Dupade anguresore ijóño jnenga. Dupade a chinguira daradie , da-hisópo aja uacasijnaringuéone jogadode,” chojninga, “Enga chiquetapo uaque jne rĩ,” chojninga.
Ecarai – Tobité, Bolivia. – 1970
Marina de Morarie churúsãre Ecarai uruode udojo
