Jesus chacãra dacajnaquéode aja chugúperone nanique:
Yingo Jesute acajnaquéode aja yoque to gajnerĩ uje Jesus chi qué dési jnumi nanique enga chacate darasade. Chacãra dacajnaquéode aja chugúperone. Jecute Jesus chojninga: “Chugúperone que chutãre to, mu Dupade u uje chisi ome ore posode ome ore. Cajicho to chugúperone,” chojninga, “que chutãre mu jé tagu dabosode. Angureni u Dupade, uraque dapesungṍri.”
Jesus chacãra dacajnaquéode aja pojnánguenie nanique:
Chacãrapo dacajnaquéode aja cucha pojnánguenie rĩ ga chojningame dacadigode, darasade ore: “Cajicho to cucha pojnánguenie. Que origuidéraque cuse mu Dupade pésu ore ga ueradei ore. Ore iguidedie gajnui u ore úringai uerate.”
Jesus chacãra dacajnaquéode aja udore gu ujetiga ca yoco yocáyugu yoque to:
Jecute Jesus chojninga: “Ingo uaque jetiga ca oyo uacáyugu uaque ujetiga ca yoquibotique cuse gajnerĩ, jeoga ca yoquiguidérigui cuse.”
Jesute acajnaquéode quigode u uje chi Dupade chóji gaté ome yoque jeta cháta cuchade aja yoque. Jecute yanguretágo Dupade.
Chi Dupade chojninga: “Beyoi yiroquéode bajaque.” Dupade iroquéode que etócho gotique ujetiga yicoi ga yiquíjnongosi gánic. Dupade ojningane u ujeta yicoi pate omone to. Pate omone u ujetiga yiyágo yoquisijnaringuéone ga yicoi Jesute, Dupade ore acajnaquéode.
Chi yocajneque Jesute ojningane udore cucha gajnerĩ. Jesute ojningane cucha u uje chi ca yimóngopo chaguhérique, ãréraque ome yoque gajnerĩ. Jecute Jesute chingo yoque unojo aja yoque jeta yanguretágo Jesute ga yiyágo cucha gajnaréngone, pisijnaringuéone, poriquéode, jé aja cucha gajnaréngone jnese, uje Dupade chetaque, ga yicoi pate arégode to iji gajnerĩ.
Jecute Jesute chingo yoque iji unojo dacajnaquéode. Chãcara dacajnaquéode aja cucha pojnánguenie gu uje chi ca jmanéraque cuse ga que charigueta damánique, que chiro daguidé ueradérac. Enga jé adi u ome chugúperenie uje que jmanéraque cus enga que toc utacaringome mu jé chise dabosode. Chamáñaje ore ipesungóri u Dupade uje Dupade u uje chisíome ore posode ome ore. Jecute chacãra dacajnaquéode aja cuchade unojo.
Yoquipesungóri Dupade guerãte yoquijmainie ome yoque, yoquetotiguei ore:
Ojningai u uyoque ujetiga ca yoco yocáyugu ome cuchade unojo. Uje yoquijmainie cuse enga uyoque urásu ujetiga yipéco yoque enga yisago yoquejórigo ome yoquipotigátigo cucha. Jé uacamóño to uje chugúperenie que jmanéraque cuse. Jé uacamóño uje cucha pojnánguenie que jmanéraque cuse mu e ueradei ore. Chamáñaje Dupade u ore ipesungóri. Ore jmainie u Dupade, enga Dupade ipesute ore ueratigade. Dupade chosóre yoque to ga cho dajnúji yoque uje pésu ayoréode uyoque iji taningai nanique. (Mateo 6:31-33)
Ecarai – Tobité, Bolivia – 1960
Marina churúsãre Ecarai acajnaquéode udojo nanique
