Ecarai catecã́ri Dupade:
Yacaranguipis ome ua iji de guedé jnoringai uje baruode chingo bameserane cucha aja yoc. Chingo betei cucha ome yoc, yoque Dupade. Jecute yocacaranguipis ome ua uje baruode déji yajei, enga bajopié quérã iji yajei, yoque Dupade. Ca yicatecãraitigade bijna iji yibijnanane ujetiga garani tu yajei ujetiga jec ũré yangureta ua. Ga be yicatecãraitigade ome ua gajnerĩ. Yicatecã́ri ua gajnerĩ ome jnanione ujetiga ca ore cho dáyugu re iji dasagode cucha. Dupade, yirajágo uje ayoré dacasute enga ore urasade ore tangã́ri. Jecute yicatecã́ri ua gajnerĩ ujetiga yurasade jos eti dacasuté yu, ore jos eti ore irósõri tu yu. Jecute apésu báyipiedie quitígome yu, yoque Dupade, gajnerĩ, jetiga yicáji ore. Be apésu yu ujetiga etoque yu aja dajéode ujetiga yibágui ore, yoque Dupade. Átaja yóguiji guidai jetiga ca yicadíjoi baruode, yoque Dupade. Ca yicadíjoi ome dãra ũréone jetiga yingongome nane iji guidai. Yicatecã́ri ua ome misionéronie ujetiga ore dopísi baruode enga yirãco ore aja ore atígo cucha, yoque Dupade. Jecute yicatecã́ri ua ome cuchade jnese ome bajnacari Jesus i. Amẽ.
Yátagója Dupade irógode uje ore isai u Dupade Uruode gu: (Galatas 6:6)
Yajirigode u San Pablo urusarane uje churúsãre ome ore idai uje i tu Galácia. Uje cojñoi déji uje a changureta Dupade. Mu que aníri gotique, chi ca u judío gotique. Mu doi judíode ore isocade ga sue judíode gáyode ome Dupade adode. Suepo udore gáyode rĩ uje Dupade anguretasórone u ore, enga Dupade gajnéone uje ore doi Dupade adode uje uté dopísi Dupade Uruode quigode gu. Enga yipésu yajéode ga yajire Galáciagosóde ore gajnéone San Pablo urusarane.
Yipésu yajéode ga ayorérique a déji yocujade jetiga yocuñeque sue eduguéjnane (misioneronie) gai. Jetiga gosi chisi ome re ome Dupade, ga gosi doi jne cojñoi tuné adode uje uté i tu Títo nanique. Mu ise ga jec ũré jeta ca déji jetiga ayorérique ca pota Dupade adode. Ayoréode ca pota Dupade Uruode jnese. Jecute Pablo chojningame ore: “Yimo ua uje que judío ua gotique mu bajnué yoquibai ome badode, uje badode u Dupade adode,” chojninga.
Ecarai changureta ayorérique yui jeta sué gai ome dacajnaquéode:
Ga yise ga ayorérique déji siñeque jeta sue misionérone ore gáyode, jé u ayoréode Dupade anguretasóño yoquibai jeta gosi chingo Dupade Uruode aja yoc. A déji ome yajéode, mu gosi que chingo raja erámi go. Jecute udé chojninga, uje jé ũrepise uje a ayoré maringa, chiraja Dupade adode. Chisi ome re ome Dupade adode, ga chimo dojórique ayoré, chimo dojórique darosónique jeoga darásarique misionéro ipesutique jeta cho parágome Dupade adode, ga jé basa ga cho quic.
Ga yuruode qui u uje ayoréode yocanguretaretigai, ore anguretigai ca chojmára. Jé chojmára. Udore misionéronie que ore cãra danguretique cucha uñai gotique. Ga gosi a changureta Dupade ga gosi anguretaretigai jé u misionéro ore anguretaretigai. Mu ore irajatigai sué yoquibai. Mu que ore ijnoraquei, Dupade ijnoraquei, que sue uaque gosi gai gotique. Unojo yuruode unojo u uje qué yingo Dupade uruode aja don Juan, don Juan casicaite. Don Juan casicaite chojninga: “Ayorérique a déji jetiga ayorérique sue yoquibai,” chojninga. “Que chiraja darujna aórique, mu anguretaretigai u uje Dupade chisi ome dajopié tome, ga sue yoquibai ome danguretaretigai,” chojninga.
Mu jé ũrepise uje Pablo churúsãre cuchade ome udore enga chojningame uné gosi, mu que yiraja írique. A i u Tito jõ. Chojninga: “Ũrepise ua ome baruode uje babepísi Jesute adode,” chojninga.
Que yiraja jeta Jesute adode mu evangélio, Jesute adode, ga jé u. Uje jnani bajade uñai, Jesute irógode uñai, chi tibágui Dupade anguretasórone. Mu que déji siñeque ujetiga ayorérique chuga erã́tique iji dejai tudé. Cojnotique, eduguéjnarique jeta chuga erámi ome Dupade Uruode. Que qué ayorérique, cojñotique déji siñeque ujetiga diguiji jnumone ga chaguhéode chejna erámone ujetiga doi Dupade Uruode. Que yica coyóngome chaguhéode. Que yica coyóngome ujeta yiquihíjnónguiji dajétique gu. Mu Dupade irogode bajade nanique ore chejnáreque re ome cucha ponáyone. (2 Corintios 11:23 aja 33)
Páblo uté chedu danguretigai ome Dupade nanique. Mu Dupade Uruode qui u ujeta jec ũré yanguretágo Dupade enga jé ca yicoi yocúringai ayoré adode. Jecucha yingome yoc uje yocúringai ayoré jnacare pota sue yoquibai ome Dupade adode. Mu yocáyipie tu ujetiga yisígome yógome Dupade, ga Dupade chijna yocaoi aja erámi. (Romanos 12:1)
Yujnusina aníri Pablo ojningai tu uje chojningame gosi: “Chimo jõroque gotique, que judío Tito, mu sué judíode ore ome danguretaretigai, darajatigade iji Dupade uruode,” chojninga.
Enga yuruode qui u to uje ayoréode, yoc uñeque a déji siñeque ujeta yujnuéngo eduguéjnane ore gánique ujeta ca gosi pésu cucha gajnarétique. Jeta gosi ca ajénique dotãre. Chi ca poriquérique déji gosi ajénique. Chi ca puru patáringánique déji gosi ayorérique yocuñeque ajénique. Enga gosi tu uje sue aníri gai, eduguéjnane. Dupade uruode jnungórone ore gai. Enga que Dupade chosõre mu gosi chisi ome re ome Dupade, ga Dupade anire iroque gosi aoi uyóguiji erámone jnese, ayoréode uyoque. A yicoi Dupade adode ga yujnuéngo eduguéjnane ore gai jetiga Dupade Uruode jnungórone, ga que ore chiraja dara quitíguiji yoque.
Dupade irógode ore angureni tu Dupade ome dacuecaringuéone:
Uje gosi angureni tu Dupade ome dacuecaringuei. Jé basa uñeque a doi Dupade Uruode ga, gosi changureta dajmainie ome datrabajádoringáne jeta chise dabosode. Jé basa ga gosi changureta dabijnani, danguretaretigai ome Dupade adode uje chingo Dupade Uruode aja yóguiji erámi. Enga uné gosi u uje sue yoquibai. Enga uné gosi tu uje sue dojode ayoréode, cojñoque yoquibai jnese iji erámi.
Uacamóño uje ayoréode uyoque gare pisagode. A uaque gosi doi Dupade Uruode ome ayoréode ga isai tu ome uje chojmára. Enga uaque gosi sue Dupade anguresõre bajade gai. Uaque gosi sué eduguéjnane, Dupade Uruode jnungórone gai. Chise diri te ga a uaque gosi pésu dejnai. Enga e gare gosi isagode. Jecute jé ũrepíse uje a uaque gosi sue eduguénane ore gai uje uaque gosi u uje uaque gosi que chijnime re ome Dupade Uruode go. Enga chejna, chejna deréjnane. Chejna dirode uje chejna yijmanai. Chise gójni diri te ga changureta rome Dupade Uruode yui. Changureta rome Dupade úringarique irasique yui enga e chajire Dupade Uruode. Uje cha chajire Dupade Uruode, mu e chacate re iji dajei. Pésu dacajnaquéode ome darásade ore ga isagode e gare aja guesi.
Enga ise ga Pablo ore ojningai tu, Pedro ore ojninga tu ome jnani bajai adode unojo nanique. A chise gójni udore uje ore chamáta ñane iji Dupade iguíjnane enga e pésu re ome Dupade Uruode. Pésu dacajnaquéode. Chacate dajei, que chirajaque Dupade atique jne. Chise dire omi te rĩ uje Lunes ga e désu dajéode. E pésu dejnai, enga isagode gáraja guesi. Enga diri tu uje que agutíyamátique cuse. Mu agutiyamáni jé u re. Enga uté u uje Pablo ore chojningame: “Chimo jóroque, uje que judío mu sue judíode yoquibai tome Dupade adode.”
Pésu dejnai. Que yimo jeta pésu dejnatique, mu bamo uje ayoréode uyoque yocucuecaringuei garani tu yoquejnane. Chise gójni Domíngonie enga a pésu Dupade Uruode ome darásade. Enga a uaque gosi a doi Dupade Uruode unojo enga a uaque gosi sue Dupade Uruode jnungórone gosi gai.
Pablo jmainie isagode imanique posode, piguidedie ore ome:
Que ayorérique Dupade Uruode jnungónique u uje di Dupade uruode ome yoque nanique. Que uté chiraja yocuruode iji taningai, mu diga chudute yocuruode enga chirate yocuruode nanique. Mu di bisideque ome uacuñane uje que amesecho Dupade uruode gu, enga que chiraja daru quitígo ome uaque. Jé uaque uñeque jetiga chojninga: “Que yangureta Dupade. Que yagutíyame Dupade isocárique to. Que yiji Dupade Uruode.”
Enga a uyoque gosi jé yocagutíyamáni u Dupade, ga que yirajágo yocuru quitígome uaque gosi go. Mu qué quitique cuse iji Dupade Uruode. Chojninga: “Gosi uje doi Dupade adode iroquéode enga ujetiga gosi iguidedie garani tu Dupade iroquéode.”
Mu uté yocayode jnani bajade uñai San Pablo ore chojninga: “Chamáñaje ueca yu,” chojninga, “enga yucué yáyipie,” chojninga. “Yipésu yisagode to,” chojninga, “yisa yejode to, enga yajiri tu yurásade, yijorane ore iji erámi uje yoquiguidedie garani tu yijmaninie,” chojninga. “Que yedugáta Dupade gotique. Que yedugáta Dupade anguresórone ujetiga yojningame ore ujeta ore chisi yu. Ore chisi yu dagúchade mu yedugáta déji yijmainie,” chojninga. (Hechos 18:2 aja 4)
Dupade Uruode qui uñai cuse ome Dupade irógode uje ore chedu datatagode Dupade urúo:
A uaque gosi a jé gajnui tu San Pablo ujetiga uaque gosi cheduape Dupade ome anínique dajnetique cucha. Gaidi tu uje Dupade irasique. Gaidi tu urasade jeta ore irasique rĩ enga cháta anírone dasagode cucha aja ore. (1 Timoteo 5:17 aja 18)
Jecute yuruode qui u uje ise ga yoc uñeque déji jṍronguiji jeta gosi sue Dupade Uruode jnungórone ore yoquibai.
Ecarai – Tobité, Bolivia – 1960
Marina de Morarie churúsãre Ecarai acajnaquéode nanique
