Ecarai catecã́ri Dupade ome jnanione ore uje a ore chisa dejode jneiji Santa Cruz uéchade.
Yacaranguipis uje bajopié déji yocajei:
Yacaranguipis ome ua uje yudúco baruode iji dirode jnese. Yacaranguipis ome ua uje bajopié tu uje déji yocajei. Ua u uje bapesute yocáyipiedie aja quigode.
Yicatecã́ri ua ome jeta uñengo qué chucué dáyipiedie ome ua:
Yacaranguipis ome ua gójni iji dejai tuné ujetiga arodipise uyóque jnese gajnerĩ. Que gusu banguresórone uje yicatecã́ri ua ome ore. Jé u yoque jnese iji guidai ujetiga uñéngo qué chucué dáyipiedie ome ua. Enga ãro orisijnaringuéone, Yoque Dupade, iji ne guidai. Pujnusiétiga ujetiga yijíñongome yocurasade uñeque iji ne jnumi ujetiga ãri, Yoque Dupade. Mu yicatecã́ri ua ujetiga ore áyipiedie guesája ome baruode enga ore chingo raja ua ujetiga bãro orisijnaringuéone to.
Átaja chequedíe jeta ca ore chimo pajei dotáningárique ome ñane:
Yacaranguipis ome ua ome chequedíe ujetiga átapísaja ore gajnerĩ enga ca ore chimo pajei dotáningárique ome ñane gajnerĩ, yoque Dupade.
Jecute yicatecã́ri ua, yacaranguipis ome ua ome bajopié uje déji erámi jnese.
Jé socaseti jnanione uñane ore changuretapo to rĩ:
Yoque Dupade, yicatecã́ri ua ome bapesute cuchadatei ome yoque iji ne guidai. Yiraja uje ore urasade uñéngo que ore todo cuchárique to, uje que yirajágo gotique, mu gusu ua uje bapésu bajéode ome ore Dupade. Je socaseti betaque ore atígo.
Jé yicoi baruode enga ójne guéode aja yoque gatuaque.
Átaja jnanione uyoque jetiga yicoi yocajesúode iji erámi ga átapísaja banguresórone, betesórone iji erámi jnese rĩ. Jé socaseti ore changuretapo to rĩ, Yoque Dupade.
Átajaja cojñone ujetiga ca ore chimo detétiguiji yoque dirome:
Jetiga átaja yoquirósónique cojñoque dirome. Enga jé ca ajénique dotãre ome yoque. Jé ca chimo detétiguiji yoque dirome ujeta yicoi ore iroquéode.
Átaja bameserãi Dugúidé enga cháta raja yogome baruode jne:
Yoque Dupade, icatecã́ri ua. Dugúidé urasade uje ore déji dasagode gáyode ujetiga arodipise Dugúidé ga chucué dajéo ome ua, ga chajni babai, ga doi baroquéode to, Yoque Dupade. Yiraja uje ca chetaque yoquisatígo cucha ujetiga yicoi trabajándode, mu bameserãi tu ujetiga yátajago yoquisagode aja ñane ujetiga yátajago Baruode aja yoquisagode cucha.
Jecute yicatecã́ri ua iji gajnerĩ ujetiga arodipise Dugúidé ga asi ome pijóningai tome, yoque Dupade.
Dupade, átaja yoque iji gajnerĩ jeta etoque yoque, jé u banguresórone uje ore changuretapise ua. Yimáco ore iji badode, Yoque Dupade.
Átaja Pablo Umari jeta chijna bajnoraquei taja chequedíe iji yoquiquigade:
Átaja Pablo Umari ujetiga chucué dáyipie ome chequedíe ujetiga chijnorapise ore, ujetiga chijna bajnoraquei taja ore dirome iji yoquiquigade.
Jecute yicatecã́ri ua ome cuchade jnese ujetiga arodipise yoque jnese iji dejai. Achai bajmanai yoquibáyode jnese gajnerĩ ga yicoi yocúringáringo ayoré ijõre jnese dirome, yoque Dupade.
Yicatecã́ri ua ome cuchade jnese ome bajnacari Jesuse i. Amẽ.
Ecarai – Tobité, Bolivia – 1970
Marina de Morarie churúsãre Ecarai icatecãraitigade udojo
