Ajei catecã́ri Dupade:
Yoque Dupade, yicatecã́ri ua gajneri. Yacaranguipise uje yingome yóguiji ua iji guedé jnoringai to. Átaja yoque gajnerĩ, Dupade. Dupade, ajé bajmanai tiji yoquibai jnese, Dupade, Davidé (Ecarai) uyoque, Dupade, iji guedé jnoringai.
Unejaque Davidé acaditigade, Yoque Dupade, enga yacaranguipis. Ajé bajmanai ujopié aja yoquibai jnese, Dupade, yocurasade yóguiji ne gajnerĩ, Dupade. Enga yacaranguipise, yoque Dupade, uje unéraja yoque Davidé acajnaquéode iji guedé jnoringai tuné. Yacaranguipise ome baruode, Dupade. Yacaranguipise uje yingome ua ome ore ji guedé jnoringai gajnerĩ.
Bamo uje que cucha putocaitique cuse, Dupade, gusu putocaitó Dupade uje ujopierãc ua, Dupade. Bajneque cuchade, daijna cuchap ua. Bajnué cucha dacadode gai jnese, Dupade. Ajé bajmanai tiji yoquibai, Dupade, iji dejai, iji diri to, iji dirode ore jnese, Dupade.
Ãro yocurõsoringuéone iji yocúdode jnese, Dupade. Yocurajédie, yoquejnarec uñane, Dupade, uje déji chequedíe, disiode ore, jnanione ore jnese, Dupade. Ãro urõsoringuéone iji yocúdode jnese, Dupade. Etoguipise yoque, Dupade, jeta yico dínique jnese, Dupade, ome yocúringai ayoré ijõre.
A yangácoi baruode iji Davidé pijnani gajnerĩ, enga yacaranguipise, Dupade, uje yutṍri ua, Dupade. Bamo uje que yáyipie cho cutu ome bajnacari Jesus uje yisa bajnacari Jesus ome yáyipie, Dupade. Gusu pujnuéngaisõre. Que yicadíjoi ua, Dupade, enga yacaranguipise, Dupade, uje yingome yogome ua iji guedé jnoringai, Dupade. A yico baruode gajnerĩ, Dupade.
Aródape ore to, Dupade, iji dajei. Asíome betotiguei ome camioneta, Dupade, ga ore chicáji Camiri, Dupade, enga quítequiguíji yoque, Dupade, jeta asíome betotigué querui tome ore.
Aródape Davidé urasade to iji oridai Tobité, Dupade. Ajé bajmanai taja ore gai to jne, Dupade, iji dejai tuné. Arote ore ome cucha gajnaréngone to, Dupade, dequejnareque noñángone, Dupade. Que cuchárique pésu urõso ome ore to, iji ore idai, Dupade. Arote ore ome cucha gajnaréngone jnese to, Dupade.
Arote jnanione ore to, Dupade, uje ore déji dajei, Dupade, uje ore chucué pibosode ome yoque, Dupade, enga yacaranguipise gajnerĩ, Dupade.
Ome Satanás, Dupade, arote yóguiji dirode jnese ome Satanás, Dupade, enga yacaranguipise uje yutṍri ua ome yoque iji guedé jnoringai, Dupade, uje yicatecã́ri ua ome bajnacari Jesuse i. Amẽ.
Ecarai acajnaquéode u udojo: (Lucas 16:19-31)
Yacajnaquéode a u anire, Dupade anguretasṍri jmatátique uje i tu Lázaro, uje que tagu dabotique mu tibágui cojñoque ugucharãi jetiga tagu posode iredie.
Mu udé deréjnai ga Pablo que cãra dabosode ome uaque gotique. Jé basa ga jnani bajai chi ugucharãque, mu que chajire Dupade anguretasṍri yúrique go.
Mu chise gójni diri uje Lázaro uté toi ga cojñoque ugucharãi topoi rĩ. Chi Dupade anguretasṍri uté chise dojode Dupade anguretasórone iji gaté iji yocai jnani bajai Abraham gari iji jogadi.
Enga, aníri, cojñoque ugucharãi casica ujuya dabosode iji jnumi, uté qui tu jnaropié. Jé basa ga cojñoque jmatai uje changureta Dupade, enga chicáji Dupade anguretasórone jogadi uté, mu idógosi ore iji jnaropié jogosórone iji te ga. Chi ore chimo ñane, enga chi cojñoque, aníri, ugucharãi, chi chimo Dupade anguretasórone.
Chi chimo Dupade anguretasórone, enga chojninga: “¿Jé gotique ca ango barasai cojñoque jmatai uje i tu Lázaro enga chátaja yu jne? Qué ango barasai jeta chaca jmanai tiji yodi enga chuta yarei tome.”
Mu yocai jnani bajai Abraham chojninga: “Úngare,” chojninga. “Cachi ca toque jeta qué ayoré Dupade anguretasórone uñeque enga chicáji jnaropié jeta chajniapója pucuécaringué ichárique te rĩ.”
Enga chi cojñoque ugucharãi chojningame Abraham: “Jé go ¿qué aroque Lázaro uté aja yocurása casodica iji jnumi te ga, chingo yesa casodica uje yachopise uje yicajnóriji jnaropié udé,” chojninga.
Mu Abraham chojninga: “Úngare, Dupade uruode, Moises urusãrane, déji jnumi casodica ome ore, enga a ore chudute, enga a ore chimate enga ore chicáji yoque to rĩ,” chojninga. “Mu a ca ore tangári acajnaquéode enga ore qui tu uaité to,” chojninga.
Enga jec ũrépise jnani bajai Abraham, uje déji deréjnai tudé to uje cojñone, ayoréode yetájo Dupade Uruode. Enga chise gójni diri ujetiga Dupade jno yocúdi, danguresórone údi, ga yipótago jóroga ore.
Ecarai cho quique Jesus diringai ome ore:
Que toc jeta ayoréode chutṍri Jesus iji diringárique enga ore chojninga: ‘¡Jesus á! ¡Jesute á! Acarape, a yangureta ua jeta yijína ua to é.’ Úngare. Dupade Uruode que qui gotique.
Dupade Uruode chojninga iji deréjnai ome ore: ‘Yiroque yirógode ore aja erámi diríca ujetiga ore chingo yuruode aja ayoréode, cojñone uáguiji erámi, enga, aníri, ore changureta yu, enga gusu ore jeta ore nóna yu to, ore chijína yu.’
Mu jé ũrépise Dupade Uruode uje que toc jeta Jesuse di enga catecã́ri yóguiji jnumi tuné; jé educadode déji yocari iji jnumi.(Hebreos 1:1 aja 2)
Jé basa ga jnani bajade enga Dupade chi chiqueta raja ore nanique uje cama uruode déji darujna arone gotique nanique. Jé basa ga deréjnai uné enga utocaidode cuse uje ore chiraja Dupade Uruode enga ore u uje ore chatata Dupade Ujnacari Jesuse adode aja yoque.
Ugucharãi qué jno daruode údi ome jnani bajai Abraham:
Chi jnani ugucharãi udé chojningame jnani bajai Abraham: “Ango yesai ore enga cáma chicai jnaropié to,” chojninga.
Mu Abraham chojninga: “Úngare, a ca yipésu bojningane udore. Dupade Uruode anguretasórone ore chingome Dupade Uruode ome ore iji jnumi uné, mu que ore changureta go. Enga gusu ore ujetiga ore chicai besai ore jne,” chojninga.
Enga jec u iji deréjnai tudé to, uje a yingo Dupade adode aja uaque gosode, mu jé yoquiqui udé jnese. Mu gosode chetaque Dupade Uruode, enga a gosode adi tu cojñoc ugucharãi uje chirase dáringai ayoré ijõre iji ne jnumi. A ca chise Dupade Uruode unétique gotique iji dáringai uecai, enga Dupade Uruode que chise uqué, ga ca unéningai cuse ome gotic. Chetaque gu.
Ecarai chatata uje changureta Jesuse nanique:
Jecute jnacarode uyoque yingongome don Len nanique ujetiga Dupade chĩro yoquisijnaringuéone enga yojníjo: “Don Len á, yoquigaidi u ujeta yijínango ua to jne aja Dupade idai.”
Adi jé u uné deréjnai, diyajmaque. A déji 20 años, jé u 20 años uje yudúco Dupade uruode ica, mu qué cho, cáma yejnángo sequeré gotique.
Jnani bajade ore chirote Jesute yui te ga, chi déji dos mil año uje ore chirote Dupade ujnacari Jesute yui. Mu uyoque cáma yejnángo sequeredie gotique. Enga ujetiga yanguretágo Dupade enga que yejnatígo gu jetiga Dupade di. (Mateo 24:44)
Mu Dupade uruode qui uñeque déji uje Jesus chojninga: “Que yiraja yiríringai, mu a yiyágue uacamánique,” chojninga, “ujetiga yĩri iji uac.”
Gosode a chojninga: “Tac ua, jecute Dupade ujnacari que di.”
Mu Jesus chojninga: “A yingo yiríringai ome uhuaque gu uje yigaidi tu jeta jec ũrépise uágome uacanguretarétigai jeta yiyague uacamánique,” chojninga.
Jecute yingome uac jeta gosi pota changureta Dupade to ga angome yoque.
Que yiraja jeta uacanguretáyo Jesuse jnese, que yimo jeta anguretáyo, que yimo jeta uaquetácho Dupade jnese. Mu Dupade a chojninga: Gosi ujeta catecã́ri yu, gosi uje chiraja yiradedie, gosi uje chiraja yuruode, mu que changureta yu, a ca toque jne jeta yi údi aja gatajnoquei.
Gusu uje gosi chojninga: “Dupade á, yangureta bajnacari Jesuse jeta chiqueta yu. E yingo yisijnaringuéone aja ua jeta ãro ga. Apésu yu ga o bajnacari iji yu, ga yijína ua to jne aja gatajnoquei to.”
Ga Dupade jĩrique chĩro gosi isijnaringuéone. Que yimóngo jetiga chĩro, que yirajágo isocáringome, mu yirajágo uje Dupade déji yocajei te ga. Cachi yocajei cho pujnui. Cachi yoco pujnúringai yocadode enga unere rĩ Dupade uruode yúode enga unojo u uje yirajágo gu.
Pirajatigai ome Dupade, adode ore que chiqueta ayorérique:
Mu ujetiga gosi chiraja Dupade ajegaidode, chiraja bisideque uje que changureta Dupade enga que toc jeta Dupade jno uaque gosi údi go.(Mateo 7:21)
Dupade Uruode qui u uje chojninga: Gosi a chiraja Dupade Uruode, chiraja Dupade iradedie, chiraja uruode quigode, mu que chingome dasijnaringuéone ome Dupade jeta chĩro, enga que toc jeta Dupade jno uté gosi údi to. (Efesios 2:1, 4, 8, 9)
*Davidé – Ecarai abi i tu David; urasade ore ĩcarai tu Davidé ome Ecarai.
Ecarai – Campamento Ayoré, Bolivia – 1971
Faith Wyma churúsãre Ecarai acajnaquéode udojo nanique
