Dupade Ujopié Espíritu Sánto, yoquipotigué ayoréode ore chetaque ñane iji yocajéode:
Yirajai to uje Satanase chise yu, ga deroco Dupade Uruode yúode iji ujade. Mu yirajai u uje Espíritu Sánto chise yu, ga uneripise Dupade uruode yui ome yu. ¡Unere! Yipota ujeta yacate yujode ayoréo. Mu yacaranguipis ome Dupade uje Espíritu Sánto chise yu iji ujade, enga uneripise Dupade uruode ome yu.
Dupade chiraja uje taque yoque ome yocúringane Jesus anguresõre:
Udojo u ujetiga yo Dupade anguretaisṍri iji yu ga ajnusináño to gajine udojo uje yocãrai chi jec u yoque. Yãrai jé u yu.
Dupade, Jesuse chojningame yu dirome: “Bacate ore bisideque diríca. Cucha bisideque bacajnaquéode diríca. Que bei déji darujna aoi to. Que batrabajándoringárique déji yu go. Íjnoque bacajnaquéringo iji yu rĩ.”
Ujetiga Jesus chojningame yu dirome: “Mu bo, acai gajño pioi, bapotigádi casé. Bapotigádi jec u diríca uje bangurenone u bapesute arégode jeta piquetaque ua ome udore. Jé basa ga que bangureta Jesucrísto uyu gotique jeta yique ta ua.” Ga yijnaripísome yui. Yitodo. Yitodo jõronga ujetiga jé ũré uje e chiroque yu aja gajño pioi.
Chi yocangaráni tu dirome, Jesus iji deréjnai uñeque. Ujetiga yi que déji to que, ga yujnúsi jórogui. Yujnúsi jórogui Dupade ucuei casé. Que toque ujetiga qué tiémporaque déji jetiga qué yangureta.
Yicoi ga yejnángo yogaja Dupade:
Beyoi, yujode Jesus anguretaisórone uaque iji de gajiné, enga ca yarángo Jesus. Ca yarángo Jesuse, dayé ore gajiné. Yicoi ga yejnángo yógaja Dupade. Yejnángo yógaja. Ca yarángo Dupade dirome. Ca yocate gajnarétique déji yocáyipie.
Ujetiga uaque gosi cáma icha áyipie go, ga gosi qué pógu datique ome ayoréode uyoque, mu Dupade chiraja. Chise diri dirome ujetiga chajire yoquíode ga íjnoque ujetiga qué chĩro uaque gosi ate gajnaré casodé. Chamáñajé gosi que catecã́ri Dupade ome re gu ome date gajnaré casodé.
Bisidi déji ome yocate gajnaréngone:
Yocacaranguipise gajiné uje bisidi déji ome yocate gajnaréngone enga bisidi u Jesus iyoi. Yicoi ga yutõcoi Jesus jnese ujetiga chĩro yoquisijnaringuéone, enga ca yipójo yocate gajnarétique uñéngome uté: jé ca yãrájo yoque jne.
Que yiraja ujeta Pédro u uje catecã́ri Jesus nanique ga chojninga: “Yocacadisṍri á, ¿jé yoco rique jne ome yocujórique ayoréo ujetiga atígo gajnarécho a? Jeta yṍrango aja guesi, jeta yi perdonar ome.”
Mu Jesuse chi chojninga: “Cachi jiei á. Uacamóño to iji diríca uje qué yiji perdonar ome uaque diríca,” chojninga. “Enga uaque gajnui jé u ome uaque. Chorase yáyipieraque gajiné,” chi Jesus chósi tome dacadigode. Chi íjnoque deréjnai iji dirome, yijorane uaque, iji durase udaque. Mu beyoi ga anguretáyo Dupade jé iji de diri. Ca yãrango yoc.
Gosi ujetiga pógu date gajnaréngone diríca, mu cho Dupade anguretaisṍri iji re, ãrai jec u re. Que chãra Dupade go. Ajnusináño to gajiné uje chi yocãrai jec u yoc. Yãrai tu yu mu yeruei tu dirome iji gajño pioi.
Mu caniraque yocangarádejnai Jesus enga pota chiqueta yoque, enga chojningárasome yoque: “Ujetiga arañiñome cuchade iji jnumi, enga acho Satanas isagode, ga boyo ga abáchoi yu. Ga yamuráse uacagúchade tiji uacabai. Uacagúchade u uacate gajnaréngone. Uje pénu. Abáchoi yu ga yamurase uacagúchade iji uacabai.” Jesuse chósi tome yoque uje anire, cho quique yogome yocate gajnaréngone.
Mu íjnoque dirome panguretaretigai.
Mu íjnoque dirome panguretaretigai. Íjnoque panguretaretigai jeta Jesuse di. Mu gajño pioi déji enga chi gajnáreque. Gajnáreque dequejnaréngone uje chi jiei iji. Dequejnaréngone jiei iji ga jnupuchade chi chuchíja ore. Chójmare ai. Quedéjna ai. Pioi tagu ore, mu que chejna ore go. Ore po. Ore chigase ome damatarane. Ore jnare rĩ iji deréjnane, ga que ore chisapo guetique rĩ. Uásejna dequejnaréngone iji. Dequejnaréngone edo tu.
¿Gotique gu a uje que yitodógo Dupade?
¿Gotique gu a uje que yitodógo aniri, Dupade? Que yitodógo gu uje angoneparique yogome Dupade. Mu chi déji dirome ujetiga yitodógo Dupade, ga yitodógo dirome, mu e íjnoque tiempo. E íjnoque deréjnai ujeta qué yanguretágo. Ga jé areque gajneri ujetiga ca yijárogo yógaja ome Dupade uruode iji deréjnane unojo.
Yacaditigade garósi, mu jé chojmára yocangaráni. Chojmára yacaditigade gajnesṍri ome yoque iji deréjnane unojo. Que uñeque déji siñeque jetiga chécãre Dupade uru quitique. Jé chojmára yocangaráni, ga jé iji deréjnai tudé.
Ueradipise Dupade. Paraque. Arei. Omi. Pajesereringane garani tu. Páyipiedie eruei tu.
Uje yotigáco Dupade enga jé cunguésõri ujetiga ojnicorásome, ‘Ujnué babai.’
Dupade chojninga: “Ayoréode uaque, que uacáyipie tu yáyipie go. Que uacáyipie yáyipie go. Uacáyipiedie catadape. Jé yáyipie chise jnumi eruéode,” chojninga Dupade ome yoque. Jecute ujopierãque ga áyipie sué yoquibai. (Isaías 55:8)
Mu uje que yanguretágo Dupade ga yojnico, ‘Yujnué Dupade gai.’ Mu gajnáreque ujetiga yujnuéngo Dupade gai ome yocajéode. Jeta yojnico, ‘Yujnué gai.’
Uacamóño uje páyipiedie eruei tu. Que yocáyipieraque cuse.
David gotique a u uje chi chojninga: “Yucue jórogui yiquicho erãpe. Yucué, yucué ujetiga qué yacose yu ome Dupade, ga yicai jnumi eruéode. Yicai yote quedéjna ajéode, mu Dupade déji.” (Salmo 139:1 aja 7 ore)
Que eruénique cuse go ome Dupade, jec u deréjna casé, ga jé upo dirome rĩ. Que chẽcare re. Que choquíjna Dupade. Mu choquíjnane u yoque. Choquíjnane uyoque uje angoneparique yógome Dupade gu.
Jesus cho yoquiquique ome cuchade, ome cucha omone yui.
Enga gusu yacajnaquéode iji durase tudaque, mu yujnusinángo gajiné udé yacajnaqué garósiode ome yoque uje que piraque yuruode go. Que piraque yacajnaquéode go. Uje uacojo ayoré yu gu. Uacarajáyopise yacajnaquéode quigode ome Dupade áyipie quigode ome uaque. Ujetiga uacamóño Jesus uté to uje chojninga: “Ajnáño yu aja quedéjnane jetiga jec ũré uaque,” ome dacadigode. “Ajnóraño uacojode ayoré. Ca ajnóra ua. Ajnóra uacojode ayoré. Ujetiga gosi chutai uaque ujetiga bagúchade déji ga asíome. Mu ca acué oréraque,” chojninga Jesus ome yoque, “Ca acuei oréraque.”
Yocacaranguipise gajiné uje yugúcoji udojo. Jesuse uruode ome yoque u ujeta cho yoquiquique ome cuchade, ome cucha omone yui. Ca yijárogo yoque aja ome Jesuse, Yocangarádejna, Yocaquirãsóri udé arecujáidie ome yoque.
“Dajei tu yu,” chojninga. “Uaque uñeque a changureta yu bajaque dirome enga dajei u yu ome Dupade idai, Yocai. Que pibi yocai, yoquidai go ujetiga ca pangureta yu.” Chi ca yacája Dupade idai jne ujetiga ca yanguretágo Dupade abi. (San Juan 14:6)
Jé ca yejnárejo yogome pacajnaquéode gajiné ujetiga jec ũré yoque.
Yocacaranguipise gajine iji durasé uje uacarajáyo yacajnaquei garósiode. Que qué piraque yacajnaquéode, mu que yimo jetiga gajnarécho ome gosi, mu Dupade uruode jec u. Uje chojninga: “Ujetiga gosi cáma changureta yu dirome ga, ujetiga chijároja dangoninguinone ome yu dirome ga, gosi qué uniri tu jnumi gu. Gosi qué uniri tu jnumi ga cáma uniri tu gaté go. Chamáñajé qué chirota jnumi jogosórone cucha, ga chejnáreque yocacajnaquéode. A ore chejnáreque uacacajnaquéode dirome mu jé u,” chojninga Jesucrísto.
Yicoi gajine ga a jé ca yejnárejo yogome pacajnaquéode gajiné ujetiga jec ũré yoque. Uje ujetiga gosi que changureta Dupade, ga ore chejnáreque re. Ore jos eti yipojnángo ore. Chamáñajé Jesus uruode jé u gu. Ore jos eti yipojnángo ore iji jnumi tudé. Chamáñajé cáma ore changureta, cáma ore chiraja danguretique gu. Ore chijnóra jnumi jogosórone cucha. Uje ueracho ome ore.
Mu ome uhuac uje uacanguretáyo, Dupade chojninga: “E uacarajáyo ujeta ca ejnarécho jnumi jogosórone ore urúrigo ome uaque dirome. Cucha bisideque ore uruode udore ome uaque uje que ore changureta yu, ga cucha omone u ome uaque dirome,” chojninga. “Jetiga gosode pésu uaquejóporinguéi dirome enga, a yipésu ore ejoporinguéone to dirome iji dirode eruei.”
Ga jé areque gajine ujetiga jé ca yipéco yocujode Dupade anguresṍre ejóporinguéone to uje Dupade chãraque danguretaisṍrone gu. Chãjé puyaque ore gu. Puyaque Dupade rĩ. Ga chi e mu ore cachodi tu aníri, Jesus diringai. “Angureta yu,” chojninga, “Anguretáyo yu ujetiga jec ũré uaque, ga ujetiga uacojórique ayoré gajnáreque urúrigo ome ua, ga ca achajnáñoi ore,” chojninga, “uje uacangureni tu yu gu. Anguretáyo yu. Jé chicha gosi cachodi taja jnumi eruei dirome,” chojninga. “A yajéngome to dirome ujetiga gosi ca cha date gajnaréngone.”
Mu beyoi uté gosi ujetiga chetaque uaque, ga acatecãchoi Dupade ome. Ga jé ãro uté ate gajnarégone ome uaque gajiné ujetiga yicoi yocangarádejnai Jesuse uru casodicaite ome yoque ujetiga yicatecãcoi Yocangaráni ome. Enga chijna jne jeta di, enga, ¡socaseti chijna dirome, ga yitojmárango iji jnumi á!”
Gusu yacajnaquéode iji durase udaque to ome yoque. Enga yacaranguipise ome uje yijorane ore cho paraque iji yacajnaquéode udé údi. Enga gusu yacajnaquéode.
Dijaide – Rincón de Tigre – 1975
Marina de Morarie churúsãre Dijaide uruode udojo
