Que yiramurase Dupade iji yáyipie iji yajei go:
Yacaranguipise rĩ uje yugúsiji udé yujode Dupade anguretasore ore ajei to iji Cochabamba udaque. Mu uje yirasiguipise yu uje que yicadiguipise Dupade. Que yiramurase Dupade iji yáyipie iji yajei go (yo guardo mi Dios en mi corazón). Yacaranguipise rĩ uje Dupade a jé oite yu aja udojo diríca, Cochabamba, ujetiga – uje pésu yininaquei tome dabi Jesucristo.
Pésu yininaquei uje yátaja Señora Marina:
Dupade a jé iroque yu aja de ujetiga yicáji udé ga jé ca cuchárique chosi tiji yu. Yacaranguipise rĩ uje yacoté e aregue uje yatecãraitigade u gu. Dupade chapúsa dasocade ome yu ome cucha dacadode udojo uje yejna yiguesi ome Dupade uje yicatecã́ri.
Uje yicatecã́ri iji dirode jnese, iji dejade jnese, iji yiguíjnai, iji udé rĩ. E yacaranguipise gajnerĩ uje yacoté e areguepo rĩ. Enga que toque jeta je yiramurase Dupade iji yajei gotique iji deréjnane iji yoquiquéode, u dire uñéngo dirome.
Yajnerame Dupade uruode jeta déji ome yurasade:
Yacaranguipise rĩ uje Dupade chisi ome páyuquetotiguéi tome yu ome daruode to, uje ¡cho jeta yirajarase cuchárique! Yiraja gu Dupade, u ujetiga yiraja cuchade udojo gu; Dupade u uje chisi ome yu páyuquetotiguéi, páyipiejna. Jecute yiraja cuchade udojo – Dupade atuatigade udojo to. Mu yacaranguipise gajnerĩ uje yáyuquetotigué udé que jnoji yu to gotique. Yacaranguipise uje yirasigápo Dupade Uruode to rĩ.
Yate bajade:
Uje yadode jecucha gajnárecho to diríca, mu Satanás u gu; mu yujnusina Dupade ga yicatecã́ri iji deréjnane jnese, ga Dupade doi yáyipie quigode. Nóna yu aja yajesúode, ga Satanás que pesupúsu cucha datérigo ome yu go. No me ha engañado – Dupade jécucha chajnésaru yu aja re uje chiraja uje que yicadígui.
Enga Satanás iroi ga jĩrique chijócãre iji yajei. Dupade iroi Espíritu Santo jĩrique chijócare Satanás irógode iji yajei. Ga jec u uje yáyipie jĩrique chachẽrapo Dupade gari rĩ iji quigade, uje e Satanás íjnonguiji yajei. Ga yirasique yu iji quigade uje cho jetiga ca cucha gajnarétique dépoi yajei rĩ uje yiraja udé uje Espíritu Santo e chise yu gu.
Que toque jetiga yáyipieraque jnopome Dupade rĩ:
Jecute que yáyipieraque jnopome cuchade udojo iji Dupade. Ujetiga cucha gajnarétique chosi ti yu, ati jec u uje yatecã́ri Dupade. Uje que toque jetiga yáyipieraque jnopome Dupade rĩ. Que toc jeta jé yumuchásapo yu rĩ aja Satanás adode. Yacaranguipis ome Dupade uje yimo Satanáse ipesutedatéode uje ueracho ga pipotiguei gajnesṍri Satanás u uje chingome yu.
Chingome yu iji uñane. Chojninga: “Apésu, apésu, ueracho, a ijõre ua jne,” jeoga, “a ataque ua jne.”
Mu yujnusina uje Satanás u ga yetaque. Yojninga ome cuchade uñane uje Satanás chiroque yu aja uje chiese ataque yu: “Úngare, que ataque yu go. Que ataque yu go ome Satanás iroquéode, cuchade iji jnumi tudé. Que yipésu Satanás adode go. Yiji yigaidi Dupade Uruode.”
“Que uerácho go,” yojninga iji yajei, ga jec u uje Espíritu Santo chise yu ga chisipise yajei iji ñane. Uje yetaque Satanás gueranone cucha ome yu.
Disi yu nanique ga Dupade chirodipise yu:
Jecucha yujnusina yu uje disi yu nanique ga Dupade chirodipise yu. Disijate yu ga que yagu yibotique. Que yagu yibotique iji deréjnane, dirode jnese. Íjnoque yiguidedie. Íjnoque yibosode. Íjnoque yiparátadie gãratique. Mu yicatecã́ri Dupade iji yúringai disijat.
Yicatecã́ripisi Dupade ga chisipise yajei. Ga jé u uje chátaja yu. Que gusu iji yúringai disi go, jé aja udojo gajnerĩ, dirode udojo. Uje yisipise yajei ga que yanguretigai que ajãpe go, cuchadaté iji yajei yanguretaretigai.
Yisocai udé uje yicatecã́ri Dupade:
Ga jec u uje yatecã́ri Dupade ome cuchade uje sué yibai. Sué yibai ga que togome yu jeta yimate yu aja uechade cucha dacate gajnaréngone, Satanás ipesudode ome yu; mu yujnusina Dupade uje chi ca cucha uajátique déji ome ga yicatecã́ri ga yojninga: “Dupade, bamo yu uje ayoré gajnareque yu, ga que daijna yu gotique rĩ. Que yipesutique cuchadaté gotique to. Cucha bisidégape yu. Jé basa ga cuchadaté uhua uje bajnué cuchade gai jnese. Jecute yutṍri ua ome udojo cuchade uje que yijnime arínique Que cojñotique chijnime arínique rĩ iji erámi tudé. Enga ajócãre iji yajei.”
Dupade chijócãre Satanás iji yajei:
Yosi ti yicatecãraitigade ga jec u uje Espiritu Santo déji yajei. Ga yirasique yu iji quigade uje cho jetiga ca cucha gajnarétique dépoi yajei rĩ uje yiraja udé uje Espíritu Santo e chise yu gu. Jecute chijócãre Satanás iji yajei. Ga cho sere yáyipie to tome cucha dacate gajnaréngone udojo.
Yigaidi tu Dupade ajéode uje yijócha ajei údi ome yu:
Yujnusinapo dirica rĩ uje – iji udé – uje yicatecãri diríca. Yojninga: “Eti bajéo, Dupade, mu yajéo gajnerĩ, que yajéo iji yajei tudé, yajei bisidei, yajei ayoré tudé. Ba-espíritu Santo áyipie gajnerĩ iji yajei tudé. Babi áyipie gajnerĩ iji yajei ujetiga uacajéo ga yacoté ejnarei íjnongape gajnerĩ iji udé. Bamo uje yujnusipise yabode gu uje yicatecã́ri ua jeta átaja cucha udojo.”
Jesus chósi tome dacadigode: “Boyo ga beyoi ayoré ponáyone ore ga acacho ore.”
Que yicadígapoi Dupade Uruode quigode rĩ uje chi chacate dacadigode nanique ga chi chojninga: “Boyo ga beyoi cojñone iji erámi, ayoré ponáyone ore ga acacho ore.” Enga acadigode chi ore tangaripísi. Chi ore jno ga ore jnome erámi. Chi chojningapome dacadigode rĩ – a chi udojo ore tangaripísi. Chi ore tangaripísi dacadisṍri acajnaquéode uje chi ore pota jeta ore tangaripísi gu.
Chi chojninga: “Boyo gajnerĩ, acayoi erámi.” Ga chi ore jno, ga ore chacate cojñone iji erámi. Cho ore quique ome cucha dacadode. Cho ore quique ujetiga ca ore tangári cojñone ore guetetigade ome raque.
Ga chojninga: “Boyo, acayoi erámi, acacho cojñone, ayoréode, menenéngone ore iji erámone jnese jne. Ga gosi ujetiga cho doré iji yuruode iji udé jnumi – ujetiga chise Yapade idai to iji guéode enga po gosi oré jne.”
Ga chi áyipiedie u udaji ome dacadigode ore. Ga chi ore chisite rágaja erámi ome dacuegode cojñónguiji erámi. Chi Espíritu Santo nóna ore iji erámi. Ga que toc jetiga qué cuchárique cho na ore. Cojñone pojna ore. Ore chaquesu ore údode, mu que ore timíninga ore go. Ore gaidode u dacadisṍri casé áyipiedie gu.
Jnacare bajade udojo, que ore timíninga cucha dacate gajnaréngone:
Ga que jnoji yajei to udojo, uje ujetiga yacãco yógaja udore ore, jnacare bajade udojo gotigo ore, uje chi que ore timíninga cucha dacate gajnaréngone. Jec areque gajnerĩ ujetiga yacãco yógaja udore ore jetiga ca yimíngaco yocujode ayoré jetiga ore chetaque yoque gajnerĩ iji Dupade iguíjnane. Jeta ore chetaque yoque maringa, jeta ore cana yoquibai maringa, jé areque jeta ore cana yoquibai. Mu yicatecãcoi Dupade ome ore gajnerĩ. Uje cáma ore chiraja gu. Jecucha conferenciadie iji guidai, disiode ore cana iji conferenciadie. Mu cama ore chiraja Dupade gu. Jec arec jeta icatecãcoi Dupade ome ore to uje cáma ore chiraja cucha dacate omío.
Satanas pésu ayoréode yocujuredie ome ñane iji jnumi tudé:
Piquetangore Dupade áyipiedie gu. Jé basa gajnaréngome jnanione uyoque uje yirajágo uje cucha dacadode doso ome ayoréode uyoque, doso pipojnaquéode, doso páyuguhebátigade, doso uje ayoréode ore pojna ñane, doso ome ayorérigo uyoque. Mu jetapuré Dupade uje paraque. A dosopise cucha dacadode, yocate gajnaréngone ome, uje que pota jóroga ujetiga yocatígo gajnarengui jorógome ñane. Ipotigádi u ujetiga yijnórango ñane iji jnumi jóroque. Mu Satanás u uje pésu ayoréode yocujuredie ome ñane iji jnumi tudé.
Jé ca yiraco udore ore uje que ore changureta cuchárique:
Mu uduco Dupade Uruode rĩ uje cho yoquiquique, anguretasórone uyoque, ujetiga yidotágo yóguiji yocadode to uje omio. Yidotágo yóguiji yocanguretaretigai ome Dupade. Mu ujetiga yiraco udore ore uje que ore changureta cuchárique, ore áyipiedie gaidipise pisijnaringuei ome dojode ayoréo, ga yijoco ati ayoré cuchape yóguiji, jeta dacajneque yóguiji.
Mu que yajico gaté uje Dupade guetetigade u ujetiga yoco eduguéjna iji yoque, yijoco yoque ome cuchade. Ga que yajico yocujórique ayoré yui. Ga yoco ajningarane aja quedéjnane ga yijoco ati yujnuéngo yocujode ayoré gai.
Mu que Dupade áyipiedie quigode – que u go. Áyipie qui tu jetiga ca yocáyipidie jnoji iji deréjnane. Ga yicoi áyipiedie quigode. Yocáyipiedie ca jnoji gajnerĩ iji Dupade uje cuchadaté tu Dupade iji dirode udojo.
Yicatecãcoi Dupade gajneri uje Satanás atígo sué yoquibai:
Cucha dacadode jetiga Satanás atígo sué yoquibai gajnerĩ, yicoi ga yatecãcoi Dupade gajnerĩ. Yingongome gajnerĩ jeta yanguretágo ga Dupade chijócãrape gajnerĩ iji yocajéode. Ga que chisapo yoque rĩ, Satanás. Yirajago uje Satanás u uje pésu ayoréode yocujuredie ome cuchade. Cuchade jnese. Chingongara cuchade aja yoque iji jnumi tudé jeta ipótago ga ca yangácoi Dupade ome guerãtígo cucha. Satanás ujopierãque to. Satanás u, mu Dupade u uje ujopie sué gai. A jé areque gajnerĩ ujetiga yicoi iroquéode gajnerĩ. Jé ca atique gajnaréngome yoque iji deréjnane udojo, Dupade.
Yacaranguipise uje Dupade chátapísaja yu iji erámone udojo. Que chicadígui yu. Que yicadígui uruode rĩ uje chojninga: “A yijína ua aja erámi eruei. A bojórigo cho damajo ua maringa, cojñone iji erámi ore cho damajo ua maringa, jé yugúsi bari. Jé yugúsi bari iji deréjnane jnese.”
Gusu Dupade Abi ujetiga chécãre ore áyipie quitique:
Jecute que toc jeta jé yicadigui. Yáyipie gaidode u unojo uje que yiramurase Dupade iji yajei. Yatecã́ri iji dejade jnese. Que yiramurase rĩ uje yugúsiji cojñone ujade, iji yujode ayoré ujade rĩ. Uje yajire cojñone iji erámi, yosõre ore to, mu ome Dupade Uruode mu que toc ujetiga yécãre ore atique. Gusu Dupade Abi ujetiga chécãre ore áyipie quitique. Ore chisi re ome Jesucristo to ga churu ore ate gajnaréngone. Ga jec u ujetiga chojmára ore iji jnumi.
Gusu yuruode iji dejai tudé mu ca yicadíjoi Dupade gajnerĩ ome ñane, ayoréode, cojñone uyoque uje yanguretágo, ga yocáyipiedie jé jogádiji deréjnane jnese ome ñane jetiga yicatecãcoi. E gusu yuruode.
Dijaide – Cochabamba, Bolivia – 1970
Marina de Morarie churúsãre Dijaide acajnaquéode
