Dijaide atatagode u udojo:
Ga ajnusináño to gajneri, Jesucristo, Yocangarádejnai uruode ome yoque. “Ca amíningacho ore gajiné,” chojninga Jesucrísto, “jetiga ore cho ũrusode iji uaque. Ũrusode jé u ore uje que ore chiraja Dupade, Yocai. Ũrusode jec u ore.”
“Satanas a chósiriji guesi tome uaque ujetiga anguretáyo yu. Mu ujetiga ẽ́cacho yi ga Satanas a chósiriji guesi tome uaque dirome. Mu gosi ujetiga etóguiji darajatigai dirome ga danguretaretigai uté u jetiga chise uéchai,” chojninga Jesucrísto ome yoque.
Jecute yocacaranguipis ome Jesucrísto uje que yugúcoi ojningane udojo cucha go. Que yugúcoji go. Que yipótago erámi jogonórone cucha go. Chamáñaje e yiyógo jnumi gai gu. Jé unejaque yocuniri.
“A ore chejnáreque jne,” chojninga. “A ore chejnáreque yacajnaquéode dirome mu jé adotáyo uáguiji uacarajatigárigo. Ajnusináño uje ore eteque yatígo nanique to,” chojninga Jesucrísto. “Ajnusináño jne uje uyu u uje que yipésu cuchárique nanique, mu ore cho damajo yu. Moitapure dirome uje cucha bisideque uaque ome ore,” chojninga Jesucrísto. “Mu ujetiga gosi chise ore uechai dirome ome danguretaretigai te ga, uté gosi tu ujeta piquetai u.”
Zaquéo dejena Jesus aja daguíjnai:
Yocacaranguipise ome Dupade gajiné iji deréjnai tudé uje que yicoi to gotique udojo. Que yejnaréjo yoque go. Cho jeta Dupade chãraque yoque ome cucha gajnaréngone yúode gu yocúringai ujñepetaque. Mu que qui tu go. Dupade uruode déji to uje chi sijnaque yoque gu. Idájapíse yóguiji Dupade. Idája yoque jnese mu Dupade gajneque yoque. Dupa Pujnuéngaisṍri gajneque yoque jnese, mu yipójo yocadode ome uté, enga que cucha ome yoque uje Dupade chijnóra yoque. Yojnico uje yanguretágo Dupade, mu yicagóji quedéjnai ome iji ujade. (Uyu jé u to. Chamáñaje sijnaque cuchape yu gu.)
Uacamóño Zaquéo gotique to uje chi oriechoqui, sijnaque rĩ, mu el Señor Jesucrísto u uje cojñone ore charatáyime ga uté chijna aja daguíjnai ga chi jé anire, cojñoi chi chojninga: “Jé gotique gu a uje chiese pãraque Jesus múñi, jé taguíji cojñoque sijnai uté gari.”
Mu Jesus chi chudute ore uruode ga chi cho quique enga chojninga: “Que cho ujetiga yicai jnumi tudé gu ujetiga ucué erámi jogosórone ore ujetiga uome ore, ujetiga paraque ore. Yucuegode udojo u uje gajnareque ore adode,” chi chojninga Jesus. Jé jno doquidode údi enga chojninga: “Yucuegode u erámi jogosórone ore uje sijnaque ore. Yucué sijnangone ore iji erámi.”
Yocacaranguipise gajiné uje Jesus ute chimate yogaja re, uje chiraja yocúringane sijnaque múñi. Chimate bisidi. Enga bisidi tu datoringai casicaite.
Enga yujnusínango to gajiné iji deréjnane jnese uje Jesuse u uje chopo ore quique rĩ enga chojningame ore ‘Jesus acadigode.’ Yocacadisṍri u Jesuse to uje qué cho yoquiquique ome cuchade to iji deréjnane unojo to, uje uté acadigode jé upo yoque rĩ. Mu adi jec u. Jesucrísto adi jec u uje cho yoquiquique ome cuchade jeta yirajágo quigode to. Mu arecujaidie u uje chi chojninga: “Cachi que yiraja ya, gusu Yai uje chiraja. Que yiraja yiríringárique yúrique mu ujetiga uacapótayo gajiné jne enga a qué yo quique uñéngome uaque jne,” chi chojninga.
Jesus diringai gãrapiedie u udaji:
Ga jé u uje chatata deréjnai ujetiga di jne. Chojninga: “A chaguhéode déji erámi tudé jne. A adúcho pocaningane anírone jne – pocaningane ujnoméone iji data. Mu jé ca uacagutéraque cho jora ome pocaningane jne. Enga jé chi chaguhérigo déji erámi jne rĩ. Uje jnupe tãrachugode chi déji erámi rĩ.”
Enga uje yinóninga udojo to enga a déji erámi jnese. Déji erámi jnese udojo cuchade.
Qué upo rĩ uje chi uruode uñéngo tocade diríca. Que yiraja puniri uje chi chejna – que yiraja ujeta 3,000 u yugode iji cojñone. Enga yáyipie jĩrique déji diríca Jesus uru casodicaite ome yoque. Enga cojñone ica qué ore chujé ñane. Qué ore déji deréjnane unojo to. Tocade Jesus ojningane cucha.
*Mu chojninga: “Ca chajuque uacagutéraque jne. Chamáñaje uacanguretáyo yu gu.”
Jé areque gajiné ujetiga yiroco Jesucrísto yui tiji deréjnai tudé. Uacamóño uje que pijoque go diringai te que. Chatatame dacadigode ore ga chojninga: “Que yiraja to go yiríringárique dire.”
Mu ojningane déji uje chi chojninga: “Yiríringai tu ujetiga cojñone jnese, menenéngone ore changureta yu. Jeta ore chudute yuruode iji uacabijnanone. Ga yinoningaco rĩ uje e garósi cojñone iji erámone uje ore doi Dupade adode. Ga yirajágo uje e idógosi Jesuse. Yirajágo. Yirajágo, mu, ujetiga gosi cáma changureta Dupade ga gosi a cho bisidéguiji udojo. Mu jec ũré yoque ome yocacajnaquéode udojo uje que yẽcaco quitique go. Mu yocajnai u Jesucrísto uruode ome yoque.
Uje cáma di Jesuse mu a erámi unirisórone atígo cunguésõre Noé urásade adode nanique:
Mu yujnusínango to gajiné uje chi deréjnai tudé chi yocajnúone u anírone, yocajnúi tu Noé. Jesus cho quique enga chojninga: “Noé urásade ore cha tangári Noé acajnaquéode nanique. Enga a ore cha yu to jne rĩ enga a ore cho cucha bisidéguiji yuruode. A ore chicadígui jeta yiríringai tu. A ore cha yu enga a ca ore changureta yu go.”
A déji deréjnai tudé uje cojñone jnese iji erámi ore chijna erámi jogosórone cucha ga que qué ore chucuepoi Dupade gotique rĩ. Enga a ca ore chucuépoi daquetangónique gotique rĩ. Chamáñaje ore chijnóra erámi jogosórone cucha gu. Ore chijnóra ga ore cho Dupa iji erámi jogosórone cucha. Mu a pininaquei jogadi u ome yoque ujetiga Jesus di enga chise yoque uje yiyágo yoquijnoraquéode ome erámi jogosórone cucha iji deréjnane unojo.
Uerate ujetiga yanguretágo Jesus. Uyu ga yangureta Jesus iji deréjnane unojo ga ũré yu ome yanguretigai. Que qué yipótagopo erámi jogonórone cucha rĩ, enga pijoque uje ũré yoque ome yocanguretigade.
Jesus pota jeta yanguretágopise, jé aja ujetiga yijnórango yocujode ayoréo to:
Que yimo ujetiga gajnárecho yacajnaquéode ome uaque. Mu Jesus arecujaidie u ome yoque ome panguretaretigai yui. Chojninga: “Adotáyo uaque. Uaque gosi anguretigai ajãpe marínga, jé omi tu. Omi tu dirome ujetiga uaque gosi changureta yu. Ajnóra bojode ayoré,” chojningapo Jesuse rĩ uje cho quique dacadigode, “Ajnóra bojode ayoré.” Que gusu ore, mu Jesus cho yoquiquique to, enga oquigode jé chojmára ome yoque jnese uje Jesus acadique yoque iji yoquijogadi dire udé to.
Jecute gajneri, yicoi ga yijnórango ñane gajiné. Yoco yoquihermáno iji ñane iji deréjnai tudé. Que taque Jesus go ome uyoque, mu omi tu ujetiga yanguretágopíse. Omi tu. Jesuse diringai idógosi. Idógosi Jesuse diringai. Ca yachógo yui. Ca yachógo Jesuse diringai yui.
Uacamóño uje Jesuse que pijoque diringárique mu idógosi, mu yirajágo uje Yocai Dupade u uje chiraja, enga gusu uté. Uje chi cojñone chudute Dupade uruode jnese ga diringai e u. Jecute yicoi enga yico Jesus ujnomei údi, enga ca yoco uja yocatatagode Jesus acho.
San Pedro uruode u udojo ome yoque. Cho yoquiquique jeta ca yachógo Jesus diringai yui.
Jesus a chucué yoquíode iji dajnéone darujna ao:
Enga chi íjnoque tiempo dirome. Íjnoque tiempo ujetiga qué ayorérique chojninga: “Jesuse, yanguretape ua to gajiné iji deréjnai tudé. Uje e bãri enga yimo ua ome yedodie gu.”
Mu Jesuse chi chojningame uyoque jne uje que yanguretágo to diríca: “Yisiome deréjnai casodé ga íjnoque anire, ga yucué bei tiji darujna aoi to que, mu que yise go. Que yise bei go – que yise bei gotique.”
Jeoga uyu. Qué yo gajnúji yu. Uje Jesuse ujetiga chajire darujna aoi ga yi que déji to ga a yojninga: “Cachi yacate ayoréode diríca, yujode ayoréo ore.”
Dupade a chiraja yu. Chiraja uje yo yiquetangóri iji yate arégode enga que yáyipie déji piquetangóri Jesucrísto adode uje tẽra re ome yoque.
Que cucha uñeque chiqueta yoque go – jeoga yocatígo u, jeoga yoquirajatigade u, jeoga picatecãraitigade u – mu gusúpusu Jesus u yoquiquetangóri. A Dupade chuchẽre piagode gáyode iji dedai ome gosi ujetiga uté cho daquetangóri iji Jesuse enga gusu iji Jesus. Ujetiga yo Jesucristo anguretaisórone uñai iji yu gajiné, mu yãrai jé u yu ujetiga taque yu.
Mu que yãra uaque go. Yacaranguipis ome Dupade uje yangureta Jesucristo to ga que yãra uaque go ome yanguretaretigai. Yiraja uje Espíritu Sánto déji yu. Yipésupú ga ũrepíse uaque to ome uacanguretaretigai ome Dupade Abi Jesucristo enga jé edúyo uacanguretigai ome uté. E gusu.
Dijaide – Rincón de Tigre, Bolivia – 1970
Marina de Morarie churúsãre Dijaide acajnaquéode unojo
