Siqueré Adode
Yatatagode u siqueré adode:
Jnanione ore chimáta ñane iji siqueredie ga jnani chojmarai chacacãre darásade. Enga acacãrátigade u datatagode udojo ome siqueredie adode.
Chi Dosapeque caratai.
Dosapeque cúcujna.
Dosapeque cucurui.
Dosapeque tachei.
Ga chi siqueré díji ore, ga chi ore chudute siqueré usereréjna. Ore chayo ga caratai chi chojninga: “A yiyame gotique.”
Ga cucujna chojninga: “A yijína yajábi ga yipatíorango ñane ome gotique.”
Ga chi cucurábi patíorã datigate caratai.
Ga tachei chojninga: “Yipatíorã yitigate caratai.”
Ore nero u cucujna. Ga ore chayo ga bajé aja ore iquei.
Ga chi siqueré di iji ore. Chi bajaque duchúbia aja ore iquei ga caratai chisa ga chijna ga chojninga: “¿Cucha pibose gotique u uné?”
Chi jno enga cucurábi chachẽre dutué ga chijna ga chojninga: “Yagu daque jne.”
Cucujna chachẽre mimiré ga chijna ga chojninga: “Yajné nac, a yagu jne.”
Tachei chachẽre guejna ga chijna ga chojninga: “Yagu jne.”
Caratai chachẽre cuguéode ga chijna ga chojninga: “Yijna ga yagu jne.”
Ga Dosapeque ueque siqueré imaningórone ga jé ore edópasa.
Chi ore chiqueta ejodie, ga siqueré diriringai userejna aja jnumi, ga ore doi ga ore chécãraja edo, dutuedie.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
