Jnu Ãri
Chi ayoré dacasutedie poti tu jnu ãri:
Jnaguto u uje tãre ome iji dati enga chiese ijárogome jnui ore.
Enga chi ayoré dacasutedie ore garani udé.
Enga chi jnu ãri garanome ore úringane dacasuté ome ore nanique uje ore tagu.
Enga chi Jnaguto chimáta cucha ponáyone –cuchisode, ayoréode ore jnese- enga chi chojninga: “Beyoi yijaroi udé jnu ãri ga acho.”
Enga Oroné dayé Jaboidé chatata quigode ome yoque ga chósi te: “Ujode cuchape ore tagu. Ga chi ore tagu ga ujnuéngáyone u uje ore chijna dajéode aja guesode. Enga jé u uje ayoré dacasutedie uñanie chijna dajéode aja guesode nanique iji daruguringane, dajócaningáne (uje ore chugúji, enga ájningarãc ore).”
Ga u udojo: Chiese ayoré asutedie ipesungóri tu udé, jnu ãri udé. Ujnuéngáyone chi ca uñane chijna dajéode aja guesode. Chi ca chijnime uñane arĩ́rique. Chi jé ujnéngáyone u uje udore ore tãraráji jmainie.
Ga chi bajai tu Ugobedai uje choru poridie iji daté. Ore tagu jnu ãri iji taningai ga chinoningase ajei ga ajei gatíjna dosadode, ga pose bajaque ijaroi, mu que yirajapise quigode ome Jaboidé.
Ga chi quigaminóri tu Arori iji datí uje basája poridie enga chi pose bajaque to.
Yocáquiode chojninga: “Jé uacamóño Arori u uje cho dájninga mu que chiraja tijórique (que todo cuchárique).
Enga chi jé u uje ayoréode tagu to ga ujnuéngaisórone u uje ore chijna dajéode aja guesode. Jé uñane ga ore sué gai ga que ore chijna dajéode aja guesode to, que chijnime ore arĩ́rique. Udojo uje chi ayoré dacasutedie posode u nanique iji jnani bajade ore.
(Oidábiadé cho quique: Mu que ore chiraja nanique uje a Satanas utocaidode u nanique, uje ore chiroque yocáquiode ore aja dáringaringo pocaningai gaisóño.)
Chi ayoré dacasutedie gajnenie jé upo udojo cucha rĩ:
Uje yocáquiode ore chatatapo uñeque rĩ uje chi ayoré dacasutedie gajnenie jé u. Chopise ayoré dacasutedie poti jnu ãri adode rĩ. Uje chi ipesudé ayoré dacasutedie nanique jnu ãri.
Chi cucherane ore chujé Poritai nanique:
Uje pésu ore ájningane iji ore ajei uje chi ore chujé jnani bajade ore iñoñai, ome Jaboidé. Jé u uje dacasutedie cucherane chi ore ipesungóri tu ore iñoñai (Poritai). Chi dacasutedie ore ipesungóri udé, ome Jaboidé.
Chi ore chujé ga chi Chiquenone ore chujé bajaque. Chi ore chijna dajéode aja guesi tiji gai. Ga chi ayoré dacasutedie ipesungórone u udojo, ome Jaboidé. Chiquenone chi ore chijna dajéode aja guesi ga ore cho je-je-je iji gai.
Quigade ga Dosapéode ore chujé ga jé isoca ga ore chijna dajéode aja guesi.
Quigade ga Posorajane ore chujé to, mu chi ca ore chijna dajéode aja guesi to.
Chi iñoñai ore sué iñoñai gai gu.
Quigade ga Picanerane ore chujé, mu jé ore cho, chi ca ore chijna dajéode aja guesi to.
Quigade ga Étacorone ore chujé mu ore chijna dajéode aja guesi tiji gai.
Ore chosina dojode ayoré iji erámi nanique:
Enga chojninga, Jaboidé: “Jé uacamóño to uje posito (pijosito) ayoréode yoquiquicujáidie iji erámone. Uje ayoréode yijosínango yocurásade aja quedéjnane nanique ga quigade u udojo uje chi ayoré dacasuté pijositodie chi quicujaidie u udiji iji jnani bajade ore.”
Uje ore chosina dojode ayoré iji erámone nanique ga ore chayome ore uje ore chiraja gu uje sijnaque ayoréode.
Ga Jaboidé chojninga: “Jé uacamóño Picanerane ore to uje ore chosina dojode ayoré iji erámi. Uje ore ujode ayoré chayóna erámi tome ore.
Juruminone chi jé cho ore. Juruminone ujatigui chi ore chujé mu jé cho. Que ore chijna dajéningai aja guetique. Enga chi pijositodie upúsu udiji iji ore quicujáidie. (Positodie jeoga Pijositodie). Uje que sujmáningárique chajire re ome ore nanique ga ore chosina dojode ayoré iji erámi.”
“Uacamóño to,” chojninga, “uje ayoré dacasutedie pijositodie u udiji ore.
Posorajane, Picanerane, Juruminone ore u uje que picasidé ore nanique ga chi u udojo,” ome Jaboidé nanique.”
Ayoré dacasutedie chi ore quigode u udojo uje ayoré dacasuté positodie u uje ore chujé ¡paque! iñoñai Poritai uté, mu que chijnime arĩ́rique uje que chijna dajéode aja guesi.
Chi ayoré dacasutedie u udojo, ome Jaboidé.
Jé u udojo eruei tu, enga que yiraja iqueminóningo.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
