Jnani Bajai Chujé Chugúpẽredatéi:
Diti chujé chugúpẽredatei. Ga chi chojninga: “Codé a, a yujé Natingarai te jne.” (Chugúpẽredatei chi i tu Natingarai.)
Chi chojninga: “A yujé jne.”
Mu dacode chojninga: “¡Cucha chuque! Suépise dojode cucha gai ga chi ca chuque.”
Mu Diti chojninga: “Yirote iji jopidé gajño.”
Chi e chirote, mu dacode chojninga: “¡Cucha chuque! Uajate.”
Ebeguejnai ga bajágaja iquei. Ga chi chirote ga chijna dojiguéjnarique. Chijna dagaitéjna, ga chijna ome. Chi chichome dagaitéjna. Ga chojninga: “¡Uté, uté, e di, e di, e di!”
Ga basája gajño ga e chichóji ga chujé. Chicho ga churugúsiji jnumi. Jé u uje chejna. Jé u uje chojninga: “Codé, ¡yujé Natingarai!”
Ga codé chojninga: “¡Cucha daté u bei, mu jé bajé!”
Ga ore doi ga ore chasẽra chugúpẽredatéi ga jiei ore ga ore chasẽra jnese. Ga chi chóna abuei. Chijna iyoi. Chi gajneque iyojna. Ga jé noñája abuei ajei. Gati ajei.
Jé u uje chi datũra changuñéra iyoi aja dabai ga noñáji aoi.
Jé u uje darujna changuñera dabai to ga noña ajei, aoi. Jé u uje ajniecai chujé asi aja dójo, ga jé noñáji ójo, ajniecai.
Diti yuc mu ore chasẽra ga ore chijna adode.
Chi chugúpẽredatéi, ga jnani bajade ore chisa iyoi ga ore churúsãre daguíjnane gáyode ome iyoi. Ore gaidi tu gu uje ore churúsãre daguíjnane piagode ujetiga gatíjna.
Cutamurajane ore edopasa datũra, ajniecai, asi ore.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
