Cabayui Adode:
Chi cabayui jno Ayorei údi. Ga chi Ayorei chirote cabayui iji dajma dújna ga chi chiródiji dajma dújna. Ga chi chijnoque ga jé jno údi. Ga acotéraque chi chise gajmai dújna, mu cabayui e jno abai údi iji gajma dújna.
Ga chi jno ga chorei iji ¡tiii! Ga chi chaguhei chejna ga chi chorei iji ¡tiii! Ga chi chaguhei chejna ga chi chojninga: “¡Ṍroro!” Jnusina cucha pibotique gu.
Ga cabayui chi chojninga: “¿Gotique baruode?”
Ga chojninga: “Que yo cheme.”
Mu cabayui chiraja ga chi chuchi. Ga chi ‘ajidábia’ tṍraji ga chi chipése. Ga chi subudé iji. Cutepéode chiese garani tu cabayúode ome jnani bajade.
Ga jnopo rĩ, ga chaguhei chejna iji ¡tiii! Ga isocai jé u uje chojninga: “¡Ṍroro!” uje jnusina cucha pibotique. Jé u uje cabayui chi chuchi ga cutẽ́ri tṍraji. Ga chipese ga e subudei iji. Ga chiese cutepéode garani u cabayui.
Mu jnopo rĩ ga isocai jé u uje chaguhei chejna iji ¡tiii! Ga Ayorei chojninga: “¡Ṍroro!” uje jnusina cucha pibotique.
Chi cabayui chojninga: “Baruode ¿írique?”
Enga Ayorei chojninga: “Que yo cheme.” Pógu daruode ome cabayui gu. Ga jé u uje jnopo rĩ ga chicáji ¡tiii! Cabayui chuchi ga chi ‘orojonie’ tṍraji ga chipese ga subudé iji.
Ga jé jnopo rĩ ga áyipie doi acoté ga cho ¡ṍroro! Chaguhei chejna gu. Ga cabayui chojninga: “Baruode ¿írique?”
Mu chojninga: “Que yo cheme.”
Ga chi chuchi ga tṍra ‘orójna’ aja guesi ga jé chipese ga subudéji.
Jé noña ga cabayui oidi ayoré noñome cuchiso iji toniñeque.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
