Jomoné jnusina cinco misionérone:
Chi ‘cinco misionérone’ ore chise Bolivia nanique iji taningapísode uje cáma ayorérique yimóngo cojñotique gotic. Que yimóngo cojñone ore aórique. Mu eduguéjnane bajade ore chudute ayoréode ore ujnomei enga chi ore déji erámi. Ga uje ore chosõripis ore ome cuchade uje, anire, cojñone ore jocaningane ga chi ore chojninga: “Ga yico, ga yico, ga, anire, yucuegoi ayoréode jne.”
Mu que ore áyipieraque déji uje ayoréode sijnanguipise ome ore, cojñone ore jnese iji erámi. Mu chi ore jno ga ore chudute ayoréode ujnomei iji Santiago, Santiágo de Chiquitos. Uje ore tṍraji ome, ayoréode ore tṍraji ome, anire, dajocaningai. Uje ore chise cojñone udore ore uje ore chucué ayoréode ore enga ore jno ga ore chise dedai. Mu chi cojñone ore, udore misionérone, ore chucué ore. Misionérone bajaguipísode u ore iji erámi.
Diyajmanguipíso udojo uje uduco ore ujnoméone to. Uje que ayorérique yocáyipieraque déji nanique ujetiga cojñotique paraque ome ayorérique uyoque. Mu yórango yógome uje udúco ore ujnoméone to.
Uje õsocacade u ore ome ayoréode uyoque ga chi, chi misionérone ore jno ome, anire, dacuegode ayoréo. Ga chi ore chise ore adode ayoréo. Ore chise ayoréode adode, ga que ore áyipieraque déji ujetiga ore chujé ore jne. Ore áyipie gaidi upúsu Dupade ujetiga Dupade chiqueta ore iji, anire, ore uniri uté.
Ore jno ga ugucharãque ore. Que ore chojningame dacotedie, chi ca ore chojningame: “A qué yĩriapo jne dirome rĩ.” Ore áyipie gaidi u ujetiga ore chise dacuegode ayoréode ore uyoque gu. Enga ore chise ore jne jeta ore chingome ore ome Jesute to. Uje ayoréode ore, yirajágo iji dirode udojo uje eduguéjnane chubu erámone gu, anire, uje ore chosõre yoque ome yoquisijnaringuéone iji udé yocuniri.
Ga, chi udore, cinco misionérone ga ore chise ayoréode iji idaidatei. Chi ore eduguéjnarique jé charanguirase ore, mu jé que piminingate uje chojmára, ga ujnájnane u udore uje que ore narare misionéro ore gai to. Ga, chi chise amiri diri uje ore di jne, eduguéjnane ore, ga chi ore eduguéjnane udore ayoré, chajningare, anire u, misionérone ore iji ore garani, ujeta chicho ore ome dojódie. Ga uñeque chi chicho ore bajaque. Que ore áyipieraque déji ujetiga udore, anire, gríngone, uje cinco misionérone ore chiqueta ore dirome, anire, ome cojñone ore jocaningárique.
Chi ore ipotigádi u ujetiga ore eduguéjnai, anínique u, ayoré jeta chujé cojñotígo. Mu que cojñone isocai tu gotic. Cojñone ore ipotigádi u ujetiga paraque ayorérique. Chi jé u uje áyipie u ome enga ore chisí gai ome, aniri, dacotaquei ome anínique u, úringárique uerate. Jeoga canirac. Jeoga, anire, osõcaca ome dojórigo ayoré ujetiga chubúchu ore iji ore ejnarétigo. Mu que cojñone oráyipie u ayoréode áyipie to go. Jecute yirajágo uje ayoréode yirajágopo rĩ uje que qué cuchárique bisideque iji erámi. Ga yirajágo to uje gusu Jesus uje chosõre yógome, anire, yoquejnaréngone. A pota ga chiqueta yoque. Jé pota ga chujé yoque. Ga yirajágo uje udore cinco misionérone toi iji ayoréode jmainie, mu Dupade e chiraja ore cachodi uje cáma tocade.
Chi udore ore osõraquei u jóroque, aniri, gríngone ore, ore ipotigádi u ujetiga yicagoi Dupade idai to jne. Mu que ayoréode yirajágo gotic. Enga que yĩraráco ore gai gotique nanique iji ore diringai. Ga chi ore chujé ore. Ore chasẽra ore ugúchade. Mu jé areque, chi ore chijóchame ore.
Chi diri uñane enga orujode cojñone iji Santiágo chi chudute ore ujnomei. Ga ore eduguéjnai iji Santiago chi chojninga: “Boyo yico. Yucuegoi, anírone u, eduguéjna casode. Ayoréode a chijna ore.” Chi ore chucué ore, mu que ore chise ore go. Ore chise, anírone, oidode foto carubode iji jnumone. Enga ore chiraja gu udojo uje chi ore chejna ore, mu ore chijóchame ore. U ayorepísode ore chijóchame degode ore uje ore pógu ore iji ore idai uté.
Mu, chi chise dirode udojo uje yirajágo uje ore chejna ore nanique.
Yocosõrasórone u misionéro udore. Uje ore chosõre yogome yoquisijnaringuéone iji aníri yocucuécaringuei to iji dirode udojo gajnerĩ. Ga jé yirajágo to uje yocosõrasónique déji siñeque ga Dupade u uje chosõre yoque. Ga jec u uje déji cojñone ore to uje uñéngo chosõre yoque. Jeoga cojñoque atade u. Jeoga cojñoque gajnareque maringa, jé chosõre yoque to. Uje jé jogadi jé u uje chojmára gu ore áyipie qui. Uje jé ore chosõre yoque to.
Ga jé gajnui to gajnerĩ uje Jesuse chosõre yóguiji daríringárique ujeta áyipie déji yoque. Ujeta chosõripise yoque. Enga jé ũrepise uyu uje que yocosõrasónique unájna gotique iji erámi udojo. Ga, jé ũrepise yu ome, anire, udojo jnanione ayoréode yocadode. Uje que anínique unájna gotic ujeta ore, yosõco ñane.
Mu gusu Jesuse u. Acajnaquéode anírone quigode u uje yocosõcacai, yocosõcasṍri chojmára.
Ga jé ũré yu gajnerĩ uje udúcopo to rĩ uje chi u Gutodaté iji udojo iji taningane. Ga chi ore isagué nanique. Cho jóroque ore quic udore, anire, misionérone ome ayoréode uruode. Que toc ujetiga ore catecãri ñane. Uje que ore chiraja ñane urúrique gotique gu. Mu yocacaranguipise ome iji dirode udojo uje ayoréode, cojñone ore yirajágo ñane uruode iji erámi údode jnese. Ga udore misionérone ore chiraja yocuruode. Jeoga cojñoque gajnareque mu, chiraja yocuruode ga jé ueradipíse ujetiga yicatecãcoi uñane iji jnumi jnese.
Uje yirajágo gu uje quigode cuse. Quigode u uje, ujetiga yipótago puru uñeque ga yangácoi. Ga jé u uje, aníri, yirajágo uje pacajnaquéode déji gu. Enga jé areguipise iji dirode udojo gajnerĩ uje yirajágo uje yacágo aja ñane ajéode gu, cojñone, ayoréode ore uyóguiji erámi jnese iji dirode udojo gajnerĩ.
Ga jé ũrépise uyu uje cuchade a qué idája, mu Dupade e chiraja iji yocáyipiedie. Chiraja yoquisijnaringuéone. Jeoga chiraja ujeta jé aregue yocáyipierigui ome, ome Ujnacari. Uje que idája gotique gu. Déji yoquejode iji erámi jnese. Eruei u.
Jomoné – Puesto Paz, Bolivia – 1970.
Faith Wyma churúsãre Jomoné atatagode udojo nanique.
