Ijmai chatata uje chuque misionérone nanique iji 1943:
Chi Cochocoigosode ore chicáji Jnupedogosode nanique iji diri uté nanique uje chuque misionérone iji. Jiei bajade uje e ore jno, mu uñane qué ore sase. Ijmai déji bajade ore ujai nanique enga jno to. Mu Caratábide chicáji dejnai bajaque ga déji uté uje chudute cuchárique. A misionérone u enga ore catecã́ri ñane uje ore chicáji uté yui. Todo ga chayo ga chicáji degúi ujetiga chingo darásade iji uté. Chojninga: “¡Cojñotígo e di é, ayóyome ore!” Enga urasade ore chayo jnese.
Misionérone ore díji ore irengúi.
A ore chimo uje ayoréode déji que, mu e tita ome ore. A misionérone chirote ore yui jeta ore chajníja darengúi, enga diyajmaque ore iji ta. Mu e ayoréode chichongara dojodie. Bajaque Soríané uje chicho ore mu chicho ore ejórique. Mu uñeque chicho udore uñai iji orotadé enga jé u uje misionérone ore chayome ore.
Ayorérique chojninga: “A íjnoque ore pocadie jõ, uje yichongaco yocojodie mu que ore chicho yoque go. Jé u uje uté chaquesu pore jmanecárique, enga chojninga: “Bo yico, yajnángo ore enga a yo yogué iji pore jmanecai udé enga yujégo ore jne.”
Misionérone que ore pógu rac, mu ore chayo iji dajei.
Jé basa ga ayoréode ore chaparu ore gai, mu ore pogu ráguiji poridie ujade. Mu uje misionérone chudute ore enga ore chajire erámi enga ore chisa datójedie enga ore chachia datójedie iji dajmainie iji ore iquei.
Mu ayoréode que ore chiraja jeta ore aringaquei u jéoga ore ininaquéi u. Jé u uje ore pésu dáyipiedie ujetiga ore chujé ore.
Uje e toque misionérone enga ore chijóchame ore iji tié edógai.
A tie tuaté i tu Tucavaca ome cojñone ore nanique. Mu ore todo jeta udore urásarigo chucué ore enga jnutaque ore ome ore. Jecuté ore jnoji ore jogadi uté nanique iji erámi.
Uje e sequeré enga ore chajniapója dejnane jogadi jeta ore na dacade cucha.
Mu cojñone chise ore iji uté enga ore pocadíe cuse enga ore chujé ayorérique iji uté uje i tu Tocoide.
(Uje Ijmai qué déji dojñane gai, mu uñeque chingome Ijmai uje chi Tocoide yuque cojñotique bajaque, enga cho jetiga Ijmai irasique re uje chudute ore ojñane udore.)
Chi uje cojñone jno, enga ayoréode chajniapója pijogadi uté rĩ uje ore gaidi u gu ujetiga ore chijóchame Tocoide. Ijmai chojniga: “Cojñone chicho Tocoide iji etarúdi, jé iji ica, arobé ore to rĩ. Chi Tocoide chirota dacoté uje todo gu ujetiga cojñone chise enga chujé uaté to.
Ijmai chatata misionérone yungórone íode, jé aja ore úringáringo cucherãque.
Chojninga:
- Ore yungóri uñai i tu Chacajnaine Étacorei. Uechamitógose. Cháta raja cojñone iji Rincón de Tigre iji udojo quigade enga chudute Dupade Uruode iji ore idai uté enga jé u uje changureta Jesucristo to.
- Esoi Jnurumini u uñeque. Cochocoigose. (I uñai u Soríané – uje Soría dai u). Cháta raja cojñone iji Tobité nanique enga chudute Jesuse ujnomei iji ore idai uté enga jé u uje changureta Jesucristo to nanique rĩ.
- Upoide Chiquenóri u to enga Cochocóigose uté. Cháta raja darásade iji Tobité nanique. A chudute Dupade uruode iji misionérone pijnanone, mu a cáma changureta uje jĩrique toi gu iji uté.
- Pegai Cutamuraja upo to rĩ. Cochocóigose to. Guidaigosode yuque uté. Jecute que cháta raja cojñone to nanique, uje toi bajaque.
- Arujade Chiquenóri u to ga Pajogose. (I uñai u Ucarede – uje uro i tu Ucaré.) Toji monte nanique enga que chise cojñone gotique. Guidaigosode ore yuque to Arujade nanique.
Misionérone uje chejna yijmanai nanique, ore yungórone urásarigo ore asuté i tu Iringoine. Ore coráchade u asṍrenie, docoguedie ore nanique enga ore chijna udire uje ore chujé ore nanique.
Zapocogosi Cuchacarataide déji to uje Ijmai chatata udore ome yoque. Enga chojninga: “Que pisocai u go ome yoque jeta yujégo gosi uje íjnoque uté gosi coráchatique. ¿Gotique gu a? uje que udore uñeque chaquĩ́ra ore nanique. Ayoréode uyoque yangácoi paquiraquéode gu. A ore bai u uje ore chujé ore. A pijoque misionérone ore áyipie ueradedie uje ore chachía datójedie iji dajmainie, ga imoi u uje ajequeseque ore, mu qué ore chujé ore nanique.”
Dupade anguresórone iji Bolivia, Paraguay ore, ore adebeque uje ore cháta raja ñane ome Dupade Uruode. Ga jé u nanique iji 2 de enero de 1985 uje Ijmai, jorane ore íjnongaja Campo Loro, Paraguay ujetiga ore tangári dojode Dupade anguresórone ore acajnaquéode. Enga jé u nanique uje ugúcoji uté to, Juan uyu, enga Ijmai chingome yoque ome cucha dacadode nanique uje chuque misionéro bajade udore uje ore chucué ayoréode iji montedie nanique iji taningai.
Ijmai – Campo Loro, Paraguay – 1985
Marina de Morarie churúsãre Ijmai atatagode udojo nanique.
