Acácomi Yui Caratac
Yingójna “Cucha Urõsódatéi” tuqué gotique gai to gajneri:
(Catecã́ri Caratai)
“Cucha Urõsódatéi á, jé badi írique durasede uje que asururase paicarupe tiẽchui yirabai uqué durasede, ga qué yugúsiji yebiédatérigui. Ga uñeque datéraque qué yugúcoji yoquebiédatérigui iji uñeque quigáningo.
“Cucha Urõsódatéi uripiecojná, basururase yájnape iyiejnai tuqué durasede. Mu ujóriguidatei ore cho cucha pimotomáji ua iji bagachodi.
“Cucha Urõsódatéi á, bamatate yájnatigo, yatígo ore. Gojñáringo a dobi yájnatigo, yatígo ore iji Filadélfia casé gajneri enga gojñáringo a narare gai jne enga chojningame: ‘Yirabai ica Pojórone, yirabai ica Imeserané ore gajneri: Chi Ijnimínayé baque diríca. Mu Cucha Urõsódatéi chóji ñane. Ga noñómiji gaté ga jnutaque degumito ome. Ga ore doi Ijnimínayé uje chi noñome caratai tiji gaté. E mu jnutaque degumito ga ore chujé.’ A gojñáringo chojninga dirome ome yirabai ica Pojórone, Imeserané ore.
“Cucha Urõsódatéi á, bamataté yájnatigo, yatígo ore ome cucha dacadode yúode uje yirãrare ome Dosadídacóde iji yejode. Ga yojningame Dosadídacóde iji yejode: ‘Jé cachi que ducunire maringa, jé ca yo yinamáji jnacarode ore iji yejode, yujnacarode, yatígo ore iji yirosadode udore.’
“Cucha Urõsódatéi á, a angureta jóroque ua ome yajnatígo, yatígo ore to durasedie. ¿Que ajna gójni a? babárique iji ore. Urénga cuchiyíode jõrai tupúsu dajeque toguéodedatéi, dajeque tuguréodedatéi, yajnamenie ore dai tuqué, Dejabi uqué gajneri. Yacãra agoyé uneréjnaja tudaque ome Cucha Urõsódatéi uqué.
“Cucha Urõsódatéi á, ararãre iji jóroque que ome yirabai Yacamai tuqué que: ‘Ga ore ojningai Yacamai gotique casirase yu iji yurugúringui tudé.’
“Urénga, bamatate yirabai Yacamai uqué durasede. Chise pujnomei taningai uqué que ga gojñáringo chojninga durasasede: ‘Chi Yacamai e jnome caratai.’
“Ga yojninga: ‘Cuchiyíode jõrai tu yirabai Yacamai uté. Cuchiyíode jõrai tupo Iboride uqué rĩ ome Cucha Urõsódatéi uqué.’
“¿Que ajna gójni a? babáriguiji udore ore to. Cucha Urõsodaté á, ¿Jé badi tírique que, que asururase yirabai Ijnimínayé tuqué durasede? Ga qué yugúsi yebiédatérigui iji uñeque quigade. Cachi bajuyapise ua ome isa Uragaréjnaidayé uñeque durasede, aja Maríadayé uñeque. Que asa gójni bejóringome ore durasede.
“Urénga jé yirasiguipise yájnatígo, yamaníngo ore durasede ome Cucha Urõsódatéi uqué. Cucha Urõsódatéi tuqué gotique, uje ore chajnangarase Cucha Urõsódatéi tuqué aja darosadode durasede.
“Ore chopise cucha iyiéguiji ua durasede ga que ore chiraja tijóringome ua. Cachi bajuyapise ua ome ore. Bamatate yatígo, yajnatígo ore. Cucha Urõsódatéi á, chise yáqui arójnaringo nanique ga chi jé ca picasite ua nanique ga chi ca bacasingónique ujnájna nanique. Urénga yájnatígo, yatígo ore chopise cucha iyiéguiji ua durasede. Ga jé u uje ore chajnangarasipise ua aja dejode durasede.”
Yiya jne.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
