Gajnémiadái Chijñecare:
Gajnémiadái i u Garajade nanique uje jnacare, enga Yocaoi dai uñai u uje dacasute nanique. Chijñecare ga chósi te:
Yijiabi enuei iji de jeta jec ũré yu diríca ga yujé uñeque gajnerĩ, cojñone. Quigade jeta cojñone uñane chujé yu to. A yujé pujñeque bajaque gajnerĩ. Quigade ga a pujñeque chujé yu to.
Yedobu Gajnémiadaté. Dojnóngaja yu diríca mu cáma yise cojñone. Cáma uñéngo chujé yu to. Yise ore iji putugútoi yungóri casé mu ore chisa daboca taja yírique ga ore chinguíraja yu. Que yatígo pijoc ome ga que yujé uñeque.
Ayoréode ore chaquĩ́ra yu iji dejode ga que yatígo pijoc ome ore. Yujé uñeque gajnerĩ ga yajneque yujóraque Chiquéjnoro piya. A yucué guesode gajnerĩ. Yijnapo aja yu gajnerĩ. Cachi cucha pimosoringuei ore ojningámia Erábia.
Yãraque yejode ome jeta moji yari. Que déji yajénic. Que yipotasía. “Besi siñec ga amóji. Que yipota ua.” Mu angoneparé ga moji yari. Yijosa yujórac Chiquejnorodaté. Yoquenocháric bijna ome ñane.
Gajnémiadái – Tobité, Bolivia – 1960.
Joyce Davis Buchegger churúsãre Gajnémiadái iradedie udaji nanique.
