Yurigode cuse nanique:
Imo diríca enga e dejaque. Enga icatecã́ri Dupade bajac uje imóngo uje e dejac enga que imo to iji dejai údode. Yúdode urõso, enga dejnínga ga cuchárique a chiqueta raja yu. Basája ne, yibai tiji ne, enga chojninga: “Jec ũré yu.”
Tõria yibai. Chojninga: “Ayoré á, ¿araja yu a?” chojninga.
Enga ojninga: “Iraja ua.”
Enga chojninga: “Uyu ¿gosi te e?” chojninga.
Ojninga: “Iraja ua enga ísenga Jesus gotique u uámia.”
Enga chojninga: “Baraja yu. ¿Jé ca araja Yapade to a?” chojninga.
Enga ojninga: “¡Ẽje!”
Mu chojninga: “Acatecã́ri Yapade ome, jeta araja Yapade,” chojninga.
Icatecã́ri Dupade:
Enga icatecã́ri enga ojninga iji dejai tiji yurigode: “Dupade é, qué icatecã́ri ua iji ne. Yacaranguipise uje babi Jesus chiqueta raja yu, enga catecã́ri yu ome, enga qué icatecã́ri ua ome yu to uje urõsoringuéone uásejna iji yu ujeta átajabá aja yu to,” chiese yojningame Dupade iji yurigode. “Átajape yejnaréngone aja yu,” ojninga iji yurigode ome Dupade. “Yacaranguipise uje babi Jesus chiqueta raja yu,” ojninga.
Ichajúidé e diósi:
Enga gajnerĩ enga Ichajúidé e diósi. Mu Jesus chojninga: (chaquĩ́rasi tiji garani) “A yajúrãi ta, yajúrãi te, ajúrãi, ajúrãi,” chojningame Ichajúidé.
Enga chiese, aníri, gajnerĩ, enga chojninga: “¡Ichajúidé é!”
E chirõrosi enga chojninga: “¡Venid! ¡Venid! ¡Venid!” chi, Jesus chojningame Ichajúidé.
Ichajúidé tibágui enga Jesus chigarúsu Ichajúidé enga chigarúpo yu to rĩ enga chojninga: “Yacaranguipise ayorábi á, ¿ja araja yu to a?” chojninga.
Enga Ichajúidé chojninga: “Iraja ua enga Dupade ap ua enga Jesus u ua,” chi Ichajúidé chojninga.
Chi, uté chojninga uje ore cãra darúo. Jec ore cãra daruode.
“Jec ũré enga uacarajáyo Yapade,” chiese Jesus chojninga.
Jesus chujé yógaja jnumone ome daruode:
Chujé yógaja jnumone ome darúo.
Ore cháji gaté yui, que ore cháji jnumi gotique.
Enga o ta ta ta ta. Ujnusína uje ayoré yu mu Jesus chiqueta raja yu uje chiese, anire, chojninga: “Uacarajáyopise Yapade. Acatecãchobi enga yangarámi uagome uacaru ojningai.”
Icatecãcoi Dupade:
Icatecãcoi iji yurigode enga icatecã́ri enga ojninga: “Dupade, átajape yurigode aja yejnaréngone aja yu,” chiese ojninga. “Uásejna yejnaréngone. Yacaranguipise uje diyajmánguipíse uje ipésu badode to rĩ, diyajmángapo yejnaréngone rĩ,” chiese ojninga.
Chojninga: “Yacaranguipise. E iraja baruode. Gome,” chiese chojninga.
Chiese Ichajúidé catecãrápoi to rĩ, mu que yiraja Ichajúidé uruode. (Ore cãra darúo. Jec ore cãra daruode.)
Jé yuricho diríca:
E gusu yuruode, Señorítabia. Ta jé yuricho diríca. Qué déji yu mu jé cho yojñane uje uásejna.
Atatáji to uje chojninga, chiese Jesus chojninga: “¿Ja ayorérique déji siñeque to a? ujetiga ore chiraja yu,” chiese chojninga.
Enga ojninga: “Ore déji ta.”
Mu chojningame yu: “Atata gotodie ayoredie.”
Mu chiese ojninga: “Que yatata ore uje idája ore iji yu. Jé cachi ca araja ore íode.”
Mu Jesus chojninga: “Yiraja. Acatecã́ri Yapade enga atata ore íode rĩ ome Yapade, enga yiraja ore íode,” chiese chojninga.
O ta ta ta:
Enga yo yojñane diríca. Uje qué yiya iji te, enga o ta ta ta, enga Ichajúidé chaguesi te, enga chojninga: “Acatecã́ri Dupade to iji yocachabie tuté enga icatecãcoi Dupade iji yocurúrigo.”
Enga chojninga: “Irajapise uaque. Ca acadíchoi yu jne,” chiese chojninga.
E gome yuruode:
E gome, Señorita. Señorítabía, ango Daniélné ujeta ese Zapoco uje daté qué eca to, Pajéidé acoté. Danielnacode iji ta. Guidaigosode to enga chi ojninga: “Yujnusiétigade uásejnapise ome ore iji datá, Enuei ore. Yacamai que ore jnoji yajei,” yojninga. Ojningame ore uje Daniélnacode, Pajeidé acoté uruode u udojo. E gusu.
Ucuetódacóde – Zapaco, Bolivia – 1970
Janet Briggs churúsãre Ucuetódacóde atatagode udojo nanique
