“Yajéode u ujetiga pimeserãcho yuruode udore uje tṍraji yibijnani, jé aja yáyipie quigode udore ore iji baquei, Pangarádejná. Ua u Yãreto cucarané jé aja Yiramesõre.” (Salmo 19:14)
Gayujna chatata dadode:
Yipota jetiga yatata yadode. Gapape yu ica ga que yiraja cuchárique go. Mu ejode ga yiraja. Jéodeti ca cucha ueratique cuse nanique. Que yipésu cuchade. Qué ueracho cuchade ome ñu jnese uje gapape yu. Mu ejode ga yiraja uje cucha omi cuse, cucha ueradi cuse. Déji dirode, diri udojo uje yẽra yu ome Dupade iji.
Ga que toque gotique jetiga yajnésãra yiquigade uje e yẽra yu. Que cucha bisideque go ujetiga yiyáguego iji ore iquei. Que cucha bisideque go. Yiraja yu ga yiyágue iji de. Uje yiraja yu. Yiraja yajei ga yipota jeta yingo yuruode aja ore. Que cucha bisideque go, jé ca yiyáguego ore iquei jetiga yatatago yocadode. Jé areque jetiga yirajágo yóguiji ga yatatágo queyadode. Yiraja yu.
Que yiraja cuchárique ica ga sijnangue yu, sijnanguepise yu. Yipota jetiga jĩraque udute yajnéode darade. Mu ejode gajneri ga ise ga ca yudúdapo daráringo rĩ. Yiraja yu iji, yiraja yajei. Ise ga ca yátapo yu aja puágueraque rĩ gu uje edote cuchábei ayoredie gu enga jé ore chotigase Dupade.
Ise ga ca yátapo yu aja ore rĩ. Yiraja gu. Yiraja uje Dijaide chingome yu uje gajnarengue puáguedie uje edote cuchabei ayoredie. Déji uje uñanie chotigase Dupade. Uje yajéngome ore. Ore edotigade ome Dupade.
Que yiraja cuchárique bisideque go. Yiraja gu Dijaide uje chingome yu. Dijaide chiraja Dupade ga chingo yoque Dupade adode.
Ore chise Señora Marina ica.
Dijaide chingo Señora Marina uruode aja yu ga unere Marina uruode. Dupade chiraja yu ga chise yajei. Chiraja yu ga chimo yu. A ore cháta raja ñane ome yu dirome. E idógosi jeta ore cháta raja uñane ome yu uje ore chimo yu gu. Uje ore chiraja yejnarei.
Yico Cochabamba ica. Yudute Timi uruode ome yangoninguinone. Uje yicagóji daijnai uje yimatarane ũroso. Mu íjnoque yibijnani ga que yingo Timi yuruode mu a Dijaide chingo.
Timi chojninga: “Dijai yá, ¿ga Gayujna changureta Dupade to a? Uje Gayujna e chise daijnane jnese iji erámi.”
Mu íjnoque yibijnani ga que yimo go.
Yiraja yu iji Dupade adode iji udore ejode. Yiraja yu.
Ayorérique que chimo yajei go; gusu uje ore chimo yiguidé iji yibai. Ore chiraja yiguidé enochai, mu que ore chimo yajei go.
Yise yajei. Yiraja yu. Yiraja uje Dupade chimo yu ga chátaja yu ome cuchade. Yutai ga chátaja yu. Yirasique uje eduguéjnane ore chiraja yu iji erámi. Chiese ore chiraja yajei gu. Ore chimo yu. Ore chátaja yu. Yirasique rĩ uje Señora Marina chiraja yu rĩ, ga pota yu. Chiese chiraja yu rĩ. Chiese chimo yajei.
Que disírique déji erámi rĩ jetiga disírique e chiraja Dupade uruode. Mu Josué e pota Dupade uruode. Pota jetiga chacate yoque iji conferenciadie. Que disírique cho Josué go. Yirasique diríca Señora Marina uruode uje chi ore catecãri ome Josué uje disi mu chiraja cuchade.
Don Pablo chiese chiraja yajei rĩ. Mu ise ga ca ore chiraja yajéode go. Ise ga gusu Dupade jetiga chiraja yajéo. Que toque gajneri ujetiga jé yajnésãra yiquigade, que toguipise go. E yiya jetiga yipésu cucha gajnarétic. Ise ga jé ca yudúdapo darárique rĩ iji de ejoi tudé. Que udute darárique go. Déji puáguedie gu uje ayoredie ore chatata cucha bisidégode iji puáguedie.
Ipota jetiga e Dijaide chimate yiguíjnai ga e gusu yu iji ta ga jé ca yudúdapo cuchárique rĩ. Edoite cuchabei ayoredie gu ome Dupade anguretatodie uyoque.
Señora Marina uruode di diríca rĩ.
Ga chi chojningame Dijaidé: “Jé ca adúcho uje queyate uje yanguretágo Dupade ga pumajodaté yoque uje yugúcoji dirode udojo. Chi Dupade Abi jé ate nanique. Chojninga: ‘Que yiraja yibárique mu jé ore chujé yu jne, ga a ore chajo yu aja curesei.’ Chi chojninga, ‘Tamuré uje ayoré uaque iji jnumone udé ga pumajódaté uaque to rĩ.’”
Yirasique uté uje yatata yitestimonio ome Señora Marina ga ore chudute ga tamuré uje ore chudute yuruode gajneri iji erámi. Que cuchárique cuse go jetiga cuchárique qué déji erámi uje chiese uerate, uje gusu Dupade uje uerate ome yoque.
Yurúo rĩ ome yujodie chequei uaque, achẽcho uacangoninguinone gáyode uje que cucha gajnareque Dupade go. Mu que ore chise dajéode gu. Yico yoque ga yico yocajéode.
Yirasique Dijaide rĩ uje Dijaide chingo Dupade uruode aja yoque. Yudute ica rĩ uje ore chojninga: ‘Ise ga tague ga a jé ca chatata Dupade uruode ome.’ Que tague yu go. Yirasique uje Dijaide chingo yoque Dupade uruode.
Ise ga jé ca yajniapo aja yiquigade iji de ejoi rĩ. Yise yu ga que yajni yiquigade go. Jetapure gajneri iji dirode udojo gajneri uje yẽra yu ome Dupade iji. Jetapure rĩ gajneri uje yocujnomei iji erámone déji diri udé. Déji uje uñanie uje ore poja Dupade uruode mu que yibója go.
Yadode gajnaréngome garósi ica. Ore pésu cuchade ica ga gapape yu, mu yipesudode que chise yajei go. Yiraja yajei ga je chise gu. Jetapure iji ejode ga yuruode e jno. Ise ga ca yududapo darárique ga que yudute go. Yise yu gu.
A yujóraque ayoré narari jóroque gajneri: ‘Gayujna todo uati ga que chajnai urúrique go.’
Que yitodótique cuse go.
Yitodódi u Dupade ujuyaquei cuchábi mu que toque go jetiga jé yise. Ga que yise yiquigade ga que yáta yu aja puágueraque go gajneri. Satanas ipesutique puáguerac. Jiei iji erámi uje ayoredie ore chotigase. Yajéngome ore uruode.
Yirajágo Dupade gu. Yajéngome. Yiraja yu iji Dupade uruode ga jé yatata yadode, yate bajade. Que cucha bisideque go. Que cuchárique, que cuse iji erámi jogonónique cuchárique uje uerate, gusu Dupade uje uerate. Gusu uté uje chátaja yóguiji erámi.
Dupade átajapie yu ga jiei uje daijnane ore chátaja yu. Dupade cháta raja daijnane ome yu uje idógosi jeta ore cháta raja uñane ome yu.
Que ayoréraque chimo yu, mu e uté u uje chimo yu. Idógosi uje ore cháta raja uñane ome yu, ore chiraja yu gu. Chiraja yajei.
Yudute ica Señora Marina uruode uje ore chingo yu.
Chi chojninga: ‘Ga yudute Gayujna ica uje chatata datestimónio ica ga chijnime yeducadode.’ Mu yiraja chiese chiraja yajei. Que yimóngo jetiga chiraja yajei. Yirasique uje anire, yangureta Dupade ga chátaja yu ga yise erámi.
A yisapo Rincón dirome rĩ jeta e Dijaide doi enga chicáji ome congreso. A yicopo Señora Marina dirome rĩ. Yirasique uje ore chudute yuruode. Que toque go jetiga jé yajnésãra yiquigade. Que toque go jetiga yudute ayoréraque urúrique ga que toguipise gu.
Sijnangue yu ica ga jĩraque yudute yujodie chequei uruode. Jĩraque chacája yatoi ga unere jetiga yipojna ore. Mu ejode udojo ga yudute uje jiei yududigode, mu jé jĩraque yicadígui.
“Ca uacarúrique gajnareque aja uacojórique ayoré. Mu ueradi u ujetiga uacarúrigo omío ome ñane. Ga ajneráñome uacajorane, ga ore quérã iji Dupade adode. Ga a Dupade chátaja ore ome bojñane.” (Efesio 4:29)
Gayujna – Tobité, Bolivia – 1975
Marina de Morarie churúsãre uruode enga cháta versículode aja to
