Pablo Dye chatata dadode ome Campo
Loro Gosode:
Yirasique yu uje
yugúsi uacajade iji de Campo Loro. Yacoté i tu Patricia, ga uaté pota jeta
arajáyo uje chi unere uaquéode ome uaté.
Ayoréode chujé Pablo dai nanique:
Yijõrai Cadui a e
chingome uaque uje ayoréode chujé yai nanique iji 1.943 uje qué disape yu
nanique. Jecute que yujnusina yai gotique enga que yujnúsi to go. Yidai u
Tobité nanique uje qué disi yu enga yirasiguipise yidai uté nanique.
Ayoréode u uje ore chujé yai, mu que gusu yai, mu ore chuje yai uñai to uje
i tu Roberto, jé aja udore ore jorane uje ore íode u David, Jorge, Eldon ore.
Yujégo yógaja buéyode gáyode uje yicagóji Tobité nanique:
Uje quene yicagóji Tobité nanique iji taningai enga ité, yinanie, uyoque yujégo yogaja buéyode gáyode. Uje yirõco Tobité yui, mu yai yusṍrone ore chachai yoque. Uje ore chudute uje chi ore yui acoté chicáji Tobité enga ore pota jeta ore chachai uaté. Uje yĩríngo enga ore chojningame ité: “Yoco yocáyugu uje yipéco bajnusiétigade nanique. Ujetiga yirajágorase uje ueradei babai ore áyipiedie nanique enga, a ca yujégorase ore.”
Ité chajnai ore uruode ga chojninga: “Jé arec. Yimo uje e ajéquesé uaque gu.”
Jiei misionérone uje ore tibagui ayoréode uaquedáyode:
Jiei misionérone uje
ore tibágui ayoréode uaquedáyode uje udore ore chiraja Dupade. Yipota jeta
uacáyipiedie déji uje cuchade e chécãre re ome uaque enga ajéquesé uaque gu
uje udore chise uaque nanique enga ore chacate uagome Dupade Uruode. Mu gose
Dupade ijnoraquéi.
Chojninga:
“Yababode uaque a, yoquijnoraquei jé ca u cuchade uje cachi garãte yoquibijnanone. Mu jé ũrepise yoquijnoraquei enga pijóguiji yocadode ome ñane.” (1 Juan 3:18)
Jiei ore uje ore chojninga: “Yijnóra yujode ayoréo arĩa.” Mu cachi ore urúo. Mu Dupade uruode chojninga: ‘Yoquijnoraquei jé ca u cuchade uje cachi garãte yoquibijnanone.’ Cucha ibiraque jeta yojníjo, ‘yijnóra ore,’ mu cucha amiri déji ome yoque ujetiga yipéco, enga u ujetiga yujuséjo yocujode ayoréo to.
“Mu jé ũrepise yoquijnoraquei enga pijóguiji yocadode ome ñane,” chojninga.
Quene yoquijnoraquei pijoque uje yoco ñane quique, jeoga yipéco udore gajnúone, enga jé u uje ore chojninga: a yijõrai uté chijnora dojoi ayoré uje cho quique gu.
Que cachi Dupade urúo uje chijnóra yoque, mu yimóngo ijnoraquédatéi ome yoque uje chiroque dajnacari aja jnumi nanique ujetiga toji curesei gai ome yoque, ujetiga diga yanguretágo enga dai Dupade cho dabode iji yoque to.
Yai, jorane ore, ore chicáji Bolivia nanique:
Yai, uté jorane ore,
ore chicáji ore uniri Bolivia nanique. Que cachi ore urúo uje ore chijnóra
ayoréode ore. Mu ore tẽra re ome ayoréode uje ore chucué ore nanique.
Yirajago uje ũré ore ijnoraquei gu uje ore chucué ore nanique enga ore tẽra
re ome ore.
Dupade Uruode chatata uje tadipise Dupade ijnoraquei ome yoque. Chojninga:
“Que pijnoraquei pijoque gu yoquijnoraquei ome Dupade. Mu pijoque gu Dupade ijnoraquei ome yoque. Uje chingo yoque dajnoraquédatéi uje chiroque dabi aja erámone nanique ujetiga cho yoquisijnaringuéone oré ome datoringai.” (1 Juan 4:10)
Uje Dupade pésu cuchade mu que pésu datígo bisideque. Mu pésu gu dajnoraquei. Uruode chojninga:
“Yirajágo uje uacajnóraño Jesucrísto uje que amóño ome uaquedodie. Que amóño marínga, jé uacanguretáyo. Jecute uacarasiguipise uaque. Enga que uacarúrigo cus ome uacaninaquei uté uje uacarasiguipise uaque gu.” (1 Pedro 1:8)
Que yimóngo Dupade ome yoquedodie, mu yijnórango uté.
Jnani chigocabéode iji Colombia ore chisa yu:
Sequeré bajé u diríca uje chigocabéode iji Colombia ore chisa yu. Uje qué yugúsi ore gare enga yicatecã́ri ore enga yingome ore uje Dupade chijnóra ore to, mu ore chojningame yu diríca: “Que Dupárique cusipise go.”
Mu yojningame ore: “Yingome uaque uje que yimo Dupade ome yedodie, mu yajire Dupade Uruode enga yirãrája gai. Enga uruode u uje chingome yu uje chijnóra yoque. Dupa uecai u uté. Ujetiga ca Dupárique cuse enga a ca erámi, gaté cuse to, uje uté u gu uje ipesute ore nanique.”
Yojninga: “Ome uaque enga ujetiga ca pimo cuchárique, enga íjnoque. Jecute a ca ẽtique cuse uje que pimo emi gu, ¿jec ũré yu a? A uacabéroyopíse uaquedodie iji jeta amoño emi ome uaquedodie, mu a ca amóño jne. Mu uacarajáyo uje déji uje uacamóño adode gu uje chubúchu cuchade.”
Ore cho paraque, uje que ore chiraja daru quitígome yu. Mu quigade enga ore chojninga: “Yimóngo adode ga yirajágo uje emi cuse.”
Yojninga: “Jé ũré uaque. Jé cho Dupade to. Yimóngo uté adode to ga jé u uje yirajágo uje Dupade cuse. Cajicho poridie to, pore umaripísedie ore. Uacaquecáyo, ¿jé ũré yu a? Jecute uje yimo uaquedodie enga yiraja uje uacapesusṍri Dupade a eca to.”
Dire gagájnione u uje ugúsi yisasṍrone ore gari ica:
¿Ama adúcho
yisocáringome yúringai juseque ica ya?
Dejaque ica enga yi guesi, mu yisasṍrone ore mo jnese enga que ore
chimo yu. Dejaque mu yise yachidi cuchabasuc. Yurugusiji yachidi aja dajei, mu
jesi cuse ga que yimopise yajiritique. Mu yacája cuchabasui ajei, enga
yijocase enga jĩraque cuchabasui déji gaté. Mu yajire jeta gasolina cuse, mu yimo uje garósi.
Yojninga: “A una hora enga e íjnoque
gasolina jõ.”
Enga jéc ũré yu uje hora chojmarai enga íjnoque. Cuchabasui doi jnumi mu Dupade pésu ga yico jnumi enga que cuchárique déji yoquiquei. Uje dire enga yimo uje cuchabasui déji pore umarenie ujai, mu que cuchárique chosi ti iji yoc. Yijos eti uyu u ijocayasṍri, mu a Dupade u cuchabasui ijocayasṍripísi diríca jõ.
Jiei ore uje ore catecã́ri Dupade ome yu:
U gu uje jiei ore uje ore catecã́ri Dupade ome yu ica, uje ore chudute yujnomei gu uje chi chigocabéode ore chisa yu. Cojñone iji erámone jnese chiroque darusarane ome yu jeta ore chingome yu uje ore catecã́ripísi Dupade ome yu ica. Ore jnese chojninga: ‘Uje bagúsi basasṍrone ore josipiedie jmainie diríca enga que yibérogo yogome yoquicatecaraitigade ome ua.’
Yiraja uje ayoréode ore catecã́ri Dupade ome yu iji Tobité to. Chiese ore catecã́ri misionerone iji dirode jnese enga ore chojningame ore: ‘¿Pablo déji rique a?’ Enga uje ore chudute uje juseque yu, enga ore ninapúsu raque.
Jé tiógara yoquicotaquéode ome Yocangureni Dupa:
Yoquipesusṍri u gu. Cuchade jnese ipesusṍre uté. Yirajágo ijnoraquedatéi gu ipesudode cucha, cuchiyi tupúsu uje chiroque dajnacari Jesucristo aja jnumi ome yoque ujetiga cho daba yoquisijnaringuéone.
Yacaranguipis ome Campo Loro gosode uaque uje chi uacacatecãchoi Dupade ome yu to ica.
Pablo Dye – Campo Loro, Paraguay – 1985
